ဝါယှေန်တန်၊ အဝ်ဂတ် ၉
ပၞောဝ်အာကဵု ညးကူသာန်သွံရာန် ဂဥုဲၜူမာဲဂမၠိုင်မ္ဂး သမ္မတ ဗင်နဳဇဲဠာ မာဒူရိုဝ် ဂှ် ဒှ်မၞိဟ်သွံရာန်ဂၠိုင်အိုတ်မွဲ အမေရိကာန် စောဲစပ်တုဲ သွက်ဂွံရပ်ကေတ်ညးတေံမာန် ကဵုနင်တင်နင်ပရိုင်မ္ဂး ကဵုသြန်လာဘ် ဒဝ်ဠာ ၅၀ ပြကောဋိကိုတ်ရောင် လလောင်တြးလဝ်ရ။
ပေါဲရုဲမာပရေင်လီဠာန်နွံစောစပ်လဝ်တေံ ပ္ဍဲကဵုဂျာန်နဝါရဳဂှ် လ္တူညးမကလေင်ကလိဂွံလဝ်အဝဵု သမ္မတ မာဒူရိုဝ်ဂှ် သမ္မတ အမေရိကာန် ဒဝ်နေဝ်ထရ ပါ်ပါဲကၠုင်မံင် လံကွေံကွေံရ။
လ္တူပေါဲရုဲမာဲဏံ ပွဳဗွိုင်ဍုင်ဂၠးကဝ်ဂမၠိုင် ပါဲတးကၠုင်လဝ် သၠဲသၠဲလးလးနွံရ။
မူလတေံ ပတိတ်ကၠုင်လဝ် လာဘ် ၂၅ ပြကောဋိကိုတ်ကီုလေဝ် ဟပဵုတိုန်ၜါအဆရောင် မာဒူရိုဝ်ဂှ် တိုက်ရိုက် မဆက်စပ်မံင်ကဵု ပရေင်သွံရာန်ဂဥုဲၜူမာဲတံဂှ်ရောင် သ္ကိုပ်ဗက်အမှုအလဵုအသဳ ပမ် ဗန်ဒဳ ဟီုရ။
ထပ်ဟပဵုပတိုန်ဏာ သြန်လာဘ်ဗီုဏံဂှ် သွက်ဂွံတြးဝါဒ ပရေင်ဍုင်ကွာန်ဟေင် ဒှ်တုဲ ဒးဆာန်ဍူထေက်ရ သာ်ဝွံ ဝန်ဇၞော်ပရေင်ဍုင်သအာင် ဗင်နဳဇဲဠာ ဝိုင်ဗန် ဂီလ် ဟီုရ။
သ္ကိုပ်ဗက်အမှုအလဵုအသဳ ပမ် ဗန်ဒဳ ဂှ် စပ်ကဵု ပရေင်ဥပဒေ ကိစ္စဖံက်ပကဝ်ပရေင်လိင်တုဲ ဒးရပ်စပ်မံင်အမှု ဂျက်ဖရီ အက်ပ်စတိင်ဂှ်ရ အခိင်ပါမံင် ပ္ဍဲက္ဍိုပ်ပရိုင်ဇၞော်ဇၞော်တံဂှ် သွက်ဂွံပြံင်သၠာဲအာရီု ကလေင်ပလန် ဖန်ကၠောန်လဝ်သာ်ဏံရောင် ဝန်ဇၞော်ဍုင်သအာင် ဗင်နဳဇဲဠာ ဟီုရ။
ပ္ဍဲအယုက်သမ္မတ ထရ အလန်ပထမတေံလေဝ် အလဵုအသဳအမေရိကာန် စောဲစပ်ပတိုန်လဝ်အမှု နကဵုပရေင်ဂဥုဲၜူမာဲ ပရေင်ပကီုပရာတ်နာနာ ကု မာဒူရိုဝ်ကဵု ညးတာလျိုင်အဆံင်သၠုင် ဗင်နဳဇဲဠာတံ နွံကၠုင်လဝ်ရ။
မာဒူရိုဝ်ဝွံ ပံင်ကဵု ဂကောံပၠန်ဂတး ကိုဝ်လမ်ဗဳယာ ဖာတ်သ်တုဲ ဂဥုဲၜူမာဲ ကိုဝ်ကေန်ဂှ် စကာနနဲလွဟ်လက်နက်တုဲ အလုံဍုင်အမေရိကာန်မွဲ ညံင်ဂွံပေင်ပြးဇးအာ ကၠောန်လဝ်ရောင် အခိင်တေံ ဌာနသၞောဝ်ဓရ်အမေရိကာန် ဟီုလဝ်ရ။
မာဒူရိုဝ်ဝွံ ပံင်ကဵု ဂိုဏ်ရာဇဝတ် ဗင်နဳဇဲဠာတံကီု၊ ဂိုဏ်ဂဥုဲၜူမာဲ မက္ကသဳကိုဝ်တံတုဲ နနဲဂၠံင်ဒမၠု ပ္ဍဲကဵု ပရေင်ကူသာန်သွံရာန်မံင် ဂဥုဲၜူမာဲတံဂှ် တိုက်ရိုက်ပါလုပ်မံင်ရောင် ဗန်ဒဳ ဟီုရ။
ဆက်စပ်မံင်ကဵု မာဒူရိုဝ်ကေုာံ ရဲသ္ကံဍေံမွဲကရောံတုဲ ကိုဝ်ကေန်လျိုင်တန်ဗွဲမဂၠိုင်တံဂှ် နူကဵုဌာန ပရေင်ဗတိုက်သရိုဟ်ဂဥူဲၜူမာဲ ရပ်ဂွံလဝ်နွံ ဗန်ဒဳ သ္ဂးရ။
အပ္ဍဲကဵု ပရေင်သွံရာန်ဂဥုဲၜူမာဲတံ တိုက်ရိုက်ပါလုပ်မံင်ရောင် ပရေင်အမေရိကာန်တံ ဟီုမံင်ဂှ် သမ္မတ မာဒူရိုဝ် အခိင်ကၠာတေံ ကေင်တးပါဲလဝ်ကီုရ။
Ref:BBC