နေပျဳဒဝ်၊ မေ ၁၆။
ဂၠံၚ်ကွဳပၟတ် ရေဝ်-ထဝါဲ ပဵုတုဲညံၚ်ဂွံခိုဟ်တိုန်အာ နူကဵုဂၠံၚ်လၟုဟ်တုဲ ဒဳအာအတိုၚ်မွဲဒမြိပ် ဇိုင်ပြင်ၜဳမာန် ညံၚ်ဂွံတံၚ်ဂြဲစိုတ် ရဲအာတရဴ ကောန်ဍုၚ်သအာၚ်တံမာန်ဂှ် သွက်ဂွံဖံက်ကၠောန်အာ သမ္မတ သီအဝဵု ဥူမေန်အံၚ်လှာၚ် ဟီုရ။
အပ္ဍဲဂိတုမေ ၁၄ တုဲကၠုၚ်ဏံ အခိၚ်ညးအာစိုပ်လဝ် ဇရေၚ်ရုၚ်စက် ဗဂပ်က္ဍိုပ်ကွဳပၟတ်တၟိ ဌာနအေန်ဂျေန်နဳယျာ ကွတ်စက်ဓါတ်လလဳ ကွဳပၟတ်ဍုၚ်ဗၟာ၊ ဌာနဝန်ဇၞော်ပရေၚ်ပလံၚ်ဗစိုပ် အပ္ဍဲပွိုၚ်ဍုၚ်ပုဗ္ဗသဳရိ နေပျဳဒဝ်ဂှ် ညးကဵုလဝ်စၞောန်ပညုၚ် ဇရေၚ်ညးတာလျိုၚ် ဌာနသၟဝ်တဲညးတံရ။
အခိၚ်လၟုဟ်ဝွံ ဂၠံၚ်ကွဳပၟတ် လ္ဂုၚ်-မတ်မလီု-ရေဝ်-ထဝါဲဂှ် ရေၚ်တၠုၚ်ကၠောန်မံၚ်တုဲ သ္ကုတ်ဂၠံၚ် ရေဝ်-ထဝါဲတံဂှ် အတိုၚ်ဇိုင်ပြင်ၜဳမွဲဒမြိပ် သွက်ဂွံဖံက်ကၠောန်အာ ညးကဵုကၠုၚ်လဝ်စၞောန်ပညုၚ်ရ။
တုဲပၠန် သွက်ဂွံကလေၚ်ပဠေဝ် သၠုၚ်ပတိုန်ကဆံၚ် ဂၠံၚ်ကွဳပၟတ် ပြန်-ဗကာံ ဂှ်လေဝ် ဗီုရုပ်သဘာဝ သာယာကျေဝ်ဂေါဝ်တံ ညံၚ်ဂွံပါလုပ် ဂှ်ကီု ကေုာံ ညံၚ်ဂွံအာစိုပ်လ္ၚောဝ်အာ ကျာ်စေတဳပဋိမာရုပ် အပ္ဍဲဒေသယေန်သၞာၚ်တြေံ ဗကာံတံဂှ်လေဝ် ရေၚ်တၠုၚ်အာညိဂှ် ညးဟီုလဝ်ကီုရ။
ပရေၚ်သၠုၚ်ပတိုန် ကဆံၚ်ဂၠံၚ်ကွဳပၟတ် ကေုာံ အရာဖံက်ဂၠံၚ် ကွဳပၟတ်တၟိတံမ္ဂး သွက်ဂွံသၠုၚ်ပတိုန်အဆံၚ် ကမၠောန်ပရေၚ်အာတရဴ တံဂှ်လေဝ် တော်စုတ်ရုဲစှ်ကၠောန်အာညိဂှ် သမ္မတသီအဝဵု ကဵုလဝ်စၞောန်ပညုၚ်ရ။
ဂၠံၚ်ကွဳပၟတ် နိဂီုဍုၚ်ဗၟာတံဂှ်တှ်ေ ဍာ်ဒကေဝ်သၞောတ်ဗ္ၜတ်ကီု ကဆံၚ်လေဝ်ဍိုန်လျမံၚ်ဂှ် ဆဵုညာတ်မံၚ်ရောၚ် သမ္မတသီအဝဵု ဒုၚ်လဝ်ဝန်တုဲ ယဝ်ရနွံကဵုဍာ်ဒကေဝ် နွံကဵုကဆံၚ်မှလေဝ် သၠုၚ်အသိၚ်ဒဳအာ နကဵု အသိၚ်ဟရိပ်ပြဟ်ဟ်မာန်တုဲ သွက်ဂွံသၠုၚ်ပတိုန်အာကဆံၚ်ဂှ်လေဝ် ညးဟီုလဝ်ရောၚ်။
အခိၚ်လၟုဟ်ဏံဂှ်တှ်ေ ကဵုဖျုန်ဂၠံၚ်ကွဳပၟတ် လ္ဂုၚ်-မာန္တလေဝ်၊ လ္ဂုၚ်-မတ်မလီု ကေုာံ လ္ဂုၚ်-ပြန်တံတုဲ ဒးကလေၚ်ပဠေဝ် သၠုၚ်ပတိုန်ကဆံၚ် ဂၠံၚ်ကွဳပၟတ်တံ ညံၚ်ဂွံစိုပ်ကဆံၚ်ခိုဟ်ဟ်ဂှ် ဗီုလဵုဒှ်ဒှ် ဒးကၠောန်ဟေၚ်ရောၚ် သ္ဂးလဝ်ရ။
အပ္ဍဲအရာကၠောန်အာ ဂၠံၚ်ကွဳပၟတ်တံမ္ဂး သွက်အခိၚ်အနာဂတ်တေံ စဵုကဵုဂၠံၚ်ကွဳပၟတ်သၟဝ်တိ ညံၚ်ဂွံဖံက်ကၠောန် သုၚ်စောဲအာမာန် ဒးလ္ၚတ် သ္ပသုတေသန ရုဲစှ်တော်စုတ်ကၠောန်အာ ဗွဲမစှ်ေသၞောတ်ရောၚ် သမ္မတသီအဝဵု ကဵုလဝ်စၞောန်ပညုၚ် မဒှ်ရ။
ပရိုၚ် – သြၚ်လောန်တိုၚ်မ်
Photo – MOI