သဓီု၊ နဝ်ဝေမ်ဗာ (၁၁)
ပ္ဍဲကွာန်ဝေန်ဇြုၚ်၊ ပွိုၚ်ဍုၚ်သဓီု၊ တွဵုရးဍုၚ်မန်ဂှ် ပ္ဍဲဂိတုနဝ်ဝေမ်ဗာ (၁၀) ပယျာံဂယးပြဟ်ဟ်ဂှ် ဂကောံဒပ်ကံၚ်ဇြဳပၞာန် မရပ်ဒက်လဝ် ညးဍုၚ်ကွာန်မွဲတၠတံ ဒးဒုၚ်ဗ္တိုက်ဂှ်ရ ဒုသ္ကိုပ်တမ်ဒပ် သ္ကိုပ်ဗိုလ်မွဲတၠ မပါလုပ် (၃) တၠ ချိုတ်အာလဝ်ဂှ် ညးဒုၚ်တာလျိုၚ် PDF ခရိုၚ်သဓီု ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တ္ၚဲနေံတေံ ၜိုတ် (၅) နာဍဳပယျာံဂယးဂှ် ဒုသ္ကိုပ်တမ်ဒပ် သ္ကိုပ်ဗိုလ်ချေတ်ဝေန်တူ ကေုာံ ကောန်ဂကောံဒပ်ဂမၠိုၚ် နူကဵုပရေၚ်ပ္ကတ်ပ္ကေၚ်ကံၚ်ဇြဳပၞာန် စၟတ်(၉) ဖျေံသ္ဇိုၚ်သဓီုဂှ် ရပ်ဒက်ညးချဳဒရာၚ်က္တိုၚ်ကၟဟ်မွဲတၠတုဲ မကလေၚ်စဴကၠုၚ်တံဂှ်ဝွံ ကြဴနူဂဗကဵု ဂကောံဒပ်စဵုဒၞါညးဍုၚ်ကွာန်သဓီုတံတုဲဂှ် မွဲလ္ပာ်ကုမွဲလ္ပာ် က္တဵုဒှ်လဝ် ပန်ပှော်ရ။
ပ္ဍဲကဵုပရေၚ်ပန်ပှော်ဂှ် ဒုသ္ကိုပ်တမ်ဒပ် သ္ကိုပ်ဗိုလ်ချေတ်ဝေန်တူ မပါလုပ် (၃) တၠ ချိုတ်အာတုဲ ကောန်ဒပ်ကံၚ်ဇြဳပၞာန်မွဲတၠ ဂြိပ်ဗၠးအာတုဲ ညးချဳဒရာၚ်က္တိုၚ်ကၟဟ် နူဒပ်ကံၚ်ဇြဳပၞာန်တံ မရပ်ဒက်လဝ်မွဲတၠဂှ်လေဝ် ဗၠးအာလဝ်ဂှ် ညးသ္ဂးရ။
အပ္ဍဲပရေၚ်ပန်ပှော်ဏံဂှ် ဂကောံဒပ်စဵုဒၞါညးဍုၚ်ကွာန်သဓီုတံ သီဂိုၚ်ဂွံလဝ် နူကဵုဂကောံဒပ်ကံၚ်ဇြဳပၞာန်တံဂှ် သေနာတ် (၃) ဇကိုအ်၊ ဖုၚ် (၃) မ၊ (၄၀) မမ (၉) မ၊ ဖျေဲလွဟ် (၁၀) ၊ မကမ်ဂမၠိုၚ် ကေုာံ သၠုဲသြန် ဗဒါဲ (၂၃) ကိုဋ်တံ မဒှ်ရ။
အပ္ဍဲကဵုပရေၚ်ပန်ပှော်တုဲဒှ်ဂှ် ကောန်ဂကောံဒပ်ကံၚ်ဇြဳပၞာန်တံ လုပ်စိုပ်ဂၠိုက်ဂၠါဲဒၟံၚ် အပ္ဍဲကွာန်ဝေန်ဇြုၚ်တံကဵု ကွာန်ဗ္ဒါဲဗ္ဒါဲတံဂှ် ဂွံတီကေတ်ရ။
တုဲကၠုၚ်ဂိတုနဝ်ဝေမ်ဗာ (၉) တေံလေဝ် ပ္ဍဲဗ္ဒါဲ (တိုးလ်ဂိတ်) ကွာန်ကျာပါန် ဍုၚ်သဓီုဂှ် ဂကောံပံၚ်ကောံ KNLA တံ ကၠုၚ်စိုပ်ဗ္တိုက်လဝ် နကဵုဒရုၚ် ကုသၞေဟ်ကၚ်စၟဳစၟတ် ဂကောံကံၚ်ဇြဳပၞာန်တံဂှ်တုဲ ပ္ဍဲကဵုပေါဲဗ္တိုက်ဏံဂှ် ကောန်ဒပ်ကံၚ်ဇြဳပၞာန်မွဲတၠ ကလိဂွံအာလဝ်ဝပ်ရ။
ပရိုၚ်−သြၚ်လောန်တိုၚ်(မ်)