မတ်မလီု -ဒဳဇြေမ်ဗာ(၂၉)
ကွးဘာတက္ကသိုလ်မတ်မလီု ရူပဗေဒ သၞာံလကြဴအိုတ် ကိုဝ်မျောဒူရအံၚ်ဂှ် ကံၚ်ဇြဳပၞာန် ဖျေံကၠုၚ်အသံပၟိၚ် ဒဏ်ထံၚ်ပွိုၚ် ၁၃ သၞာံ ပ္ဍဲဂိတုဒဳဇြေမ်ဗာ စၟတ်တ္ၚဲ ၂၇ ဏံရဂှ် သမဂ္ဂကွးဘာ တက္ကသိုလ်မတ်မလီု လလောၚ်တြးပ္တိတ်လဝ်ရ။
ကိုဝ်မျောဒူရအံၚ်ဂှ် တုဲကၠုၚ်ဂိတုဂျောန် ပ္ဍဲစၟတ်တ္ၚဲ ၃၀ ဂှ် ဒးဒုၚ်ရပ်လဝ် ပ္ဍဲသ္ၚိဒၟံၚ်ညးတုဲ လအ်အာပွိုၚ် ၅ ဂိတုတုဲဂှ် ဒးဒုၚ်ဖျေံကၠုၚ်ဒဏ်ထံၚ် သၞာံဇမၠိၚ်ဗီုဏံ နူကဵုရုၚ်သၞောဝ်ဓဝ်တၟေၚ် ထံၚ်စာတ်ဘာအၚ်ရ။
ကံၚ်ဇြဳပၞာန် ရပ်ကေတ်ကိုဝ်မျောဒူရအံၚ်တုဲဂှ် စောဲလဝ်ဂဗုတ် နကဵုၝောံပိုဒ် ၂ ၝောံပိုဒ်တုဲ အခိၚ်လၟုဟ်ဏံဂှ် သွက်ၝောံပိုဒ် မွဲၝောံပိုဒ် ဒးဒုၚ်ဖျေံလဝ်ဒဏ်ထံၚ် သၞာံဇမၠိၚ်ရ။
ဥက္ကဋ္ဌသမဂ္ဂ တက္ကသိုလ်မတ်မလီု မေန်တာန်ဇြေန်ဥူဂှ်မ္ဂး ကံၚ်ဇြဳပၞာန်ဂှ် ရပ်ဒက်ဒၟံၚ် ကွးဘာညးဍုၚ်ကွာန်ဂမၠိုၚ် ဟွံဗဗွဲကဵုဓဝ်တုဲ ဗီုနွံပၟိက် ဗ္ဂပ်စုတ်ၝောံပိုဒ်တအ်တုဲ ဖျေံကၠုၚ်ထံၚ်သၞာံဇမၠိၚ်ဂှ် ကၠောန်ရေၚ်တၠုၚ်ဒၟံၚ် အတိုၚ်ဒ္ဂေတ်စရိုတ်တၠအဝဵုတအ်ရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကိုဝ်မျောဒူရအံၚ် ဒးဒုၚ်ဖျေံလဝ်ဒဏ်ထံၚ် သၞာံဇမၠိၚ်ဂှ် ဒှ်ညးလုပ်ဂကောံ ညးရေၚ်တၠုၚ်ကေၚ်ကာဗဟဵု သမဂ္ဂကွးဘာ အလန်စတုတ္ထကီု သီုဒှ်ညးတာလျိုၚ် ပတိုန်စၟတ်သမ္တီ ကေုာံသုတေသနတြေံမွဲတၠရ။
အတိုၚ်အကံက်တၚ်ဂၞၚ် ဗော်ဒုၚ်ကာသုတေသန သမဂ္ဂကွးဘာတက္ကသိုလ်မတ်မလီုမ္ဂး ကြဴနူဒပ်ပၞာန်သီအဝဵုတုဲ ကွးဘာတက္ကသိုလ်မတ်မလီု တြုံ၊ ဗြဴ ၇၈ တၠ ဒးဒုၚ်ရပ်လဝ်တုဲ ညးဟွံပါလုပ် ပ္ဍဲစရၚ်လေဝ် နွံမာန်ဏီရဂှ် လလောၚ်တြးလဝ်ရ။
ပရိုၚ် – သြၚ်လောန်တိုၚ်(မ်)
ဗီုဓာတ်-သမဂ္ဂကွးဘာတက္ကသိုလ်မတ်မလီု