ပလဝ်၊ မေ (၂၀)
ရးဒေသဇၞော်တၞၚ်သြဳ ပ္ဍဲပွိုၚ်ဍုၚ်ပလဝ် လလောၚ်တြးလဝ် ပရေၚ်အုပဓုပ်ပၞာန်ဂှ် သ္ပတမ်နူဂိတုမေ ဒုတိယသတ္တာဟတုဲ ၚုဟ်သ္ၚု က္ဍၚ်တိုန်ကၠုၚ် ဗ္ဒာဲၜါချတုဲ ပ္ဍဲလ္ပာ်ကွာန်တအ်ဂှ် ဂွံရာန်ကေတ် သာခက်ခုဲကၠုၚ်ရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ၚုဟ်သ္ၚုဂှ် ပ္ဍဲကဵုဂိတုတုဲကၠုၚ်တေံ သ္ၚုမောဝ်မွဲရိုက် နူၚုဟ်နွံဒၟံၚ် မွဲကိုတ်ဒ္ကေဝ်ဂှ် အခိၚ်လၟုဟ်ဏံ မွဲရိုက်မ္ဂး စဵုကဵုမွဲကိုတ်ဘာ်ပြၚ် ၚုဟ်က္ဍၚ်တိုန်ကၠုၚ်တုဲ သ္ၚုပရံၚ်လေဝ် မွဲရိုက် နူၚုဟ်နွံဒၟံၚ် ၈၀၀၀၀ ပြၚ် က္ဍၚ် တိုန်ကၠုၚ် စဵုကဵုမွဲကိုတ်ဒ္ကေဝ်ပြၚ်ရ။
ၚုဟ်သ္ၚုဂှ် ဟိုတ်နူလ္ပာ်ကံၚ်ဇြဳပၞာန် ပိုၚ်ခြာကၠုၚ်အခေါၚ်ပ္ဍိုက်ဏာနၚ်ကီု၊ ယဝ်ပ္ဍိုက်ဏာ လောန်လ္တူမွဲရိုက်မ္ဂး ဒးဒုၚ်သီကေတ် ပ္ဍဲသၞေဟ်ကၚ်စၟဳစၟတ်ကီု၊ ဟိုတ်နူဒှ်အခိၚ်ကသီုတုဲ ၚုဟ်မးက္ဍၚ်တိုန်ကၠုၚ် ဂၠိုၚ်ကဵုချရဂှ် ညးဒေသတအ် ဟီုသ္ဂးလဝ်ရ။
ညးဒေသမွဲတၠဂှ်မ္ဂး ဟိုတ်နူၚုဟ်သ္ၚု က္ဍၚ်တိုန်ကၠုၚ်ဂၠိုၚ်ကဵုချတုဲ သွက်ဂွံရာန်စလေဝ် အခက်နွံကၠုၚ် ဒၟံၚ်ကီု ပ္ဍဲကဵုကွာန်လ္ၚဵုတအ်ဂှ်မ္ဂး စဵုကဵုရာန်ကေတ်သ္ၚုဟွံဂွံ အကာဲအရာပရေံကၠုၚ်ဒၟံၚ်ရဂှ် ဟီုသ္ဂးလဝ်ရ။
သ္အာၚ်နူဂှ်ပၠန် သွံကဵုဒၟံၚ်သ္ၚု ကုဒပ်စဵုဒၞာညးဍုၚ်ကွာန် ကေုာံဗဒိုပ်ပါဲပၞာန်တအ်ဂးတုဲ ကံၚ်ဇြဳပၞာန် ရပ်ဒက်စၟဳစၟတ်ဒၟံၚ် တၠဆေၚ်သ္ၚု ကေုာံတၠဆေၚ်ဖျာတအ်ရ။
မွဲလ္ပာ်ပၠန်လေဝ် ဟိုတ်နူအကာဲအရာပၞာန်ၜါလ္ပာ် အကြာဒပ်ကံၚ်ဇြဳပၞာန်ကဵု ဂကောံဇြဟတ် ပၠန်ဂတးတအ် ကြံၚ်မ္ၚိုဟ်ဒၟံၚ်တုဲ အခိၚ်ညးဍုၚ်ကွာန်ဂမၠိုၚ် ဒးဆေၚ်ဒၟံၚ်မုက်ကဵု အခက်ခုဲကမၠောန်ဂှ် သီုဒးဒုၚ်ဒၟံၚ်ဘဲဒဏ် ၚုဟ်မးဗွဝ်ဖျာ က္ဍၚ်တိုန်ရ။
ပ္ဍဲပွိုၚ်ဍုၚ်ပလဝ်ဂှ်မ္ဂး ကြဴနူဒပ်ပၞာန်သီအဝဵုတုဲ ဟိုတ်နူပေါဲဗတိုက်ၜါလ္ပာ် အကြာဒပ်ကံၚ်ဇြဳပၞာန်ကဵု ဒပ်စဵုဒၞာညးဍုၚ်ကွာန်တုဲ ညးဍုၚ်ကွာန်ပါဲဘဲပၞာန် ဗ္ဒာဲ ၂၀၀၀ တအ် စဵုကဵုလၟုဟ်ဏံ ကလေၚ်စဴဌာန်ဒၟံၚ် ဟွံမာန်ဏီတုဲ ဒးဇူဒီုဗ္ဒာဲဒလာဲဒၟံၚ် ပ္ဍဲကဵုဂြိုပ်ဂၞိၚ် ကေုာံဗဒိုပ်ပါဲပၞာန် ကြပ်ညောန်တအ်ဂှ်ရ။
ပရိုၚ်သြၚ်လောန်တိုၚ်(မ်)
ဗီုရုပ် -CJ
sanlontai