ပ္ဍဲတိဍာ်ကဝ်ဒူလေဝ် သၟာဒဒိုၚ်ပါဲဘဲပၞာန် စဵုကဵု (၇) ကိုတ်ပြၚ် ဂၠိုၚ်တိုန်ကၠုၚ်

ကဝ်ဒူလေဝ်၊ အံက်တဝ်ဗာ(၁၅)

ပ္ဍဲတိဍာ်အုပ်ဓုပ်ကဝ်ဒူလေဝ် ညးဍုၚ်ကွာန်ပါဲဘဲပၞာန် စဵု (၇)ကိုတ်ပြၚ် နွံကၠုၚ်တုဲ နွံဒၟံၚ်ပၟိက်အရီုဗၚ်ဗ္စာရဏာပရေၚ်မၞိဟ် နဒဒှ်ကာတၟေၚ် ဗွဲမဂၠိုၚ်ဖိုဟ်ဏီရဂှ် ဗဟဵု KNU လလောၚ်တြးလဝ် ပ္ဍဲဂိတုအံက်တဝ်ဗာ စၟတ်တ္ၚဲ (၁၄) ဂှ်ရ။

ပ္ဍဲကဵုခရိုၚ်သဓီု၊ ခရိုၚ်တံၚ်ဥူ၊ ခရိုၚ်ညံၚ်လေဝ်ပေန်၊ ခရိုၚ်ဗိက်ထဝါဲ၊ ခရိုၚ်ဘာပန် ကေုာံ ခရိုၚ်ဒူပလာယာ မၞုံပ္ဍဲတိဍာ်ထိၚ်ဒဝ်ကဝ်ဒူလေဝ်တအ်ဂှ် ဟိုတ်နူပရေၚ်ဒပ်ကံၚ်ဇြဳပၞာန် ဖံက်ပ္ကဝ်အခေါၚ်အရာမၞိဟ် ကေုာံ ပေါဲဗတိုက်က္တဵုဒှ်လဝ် အကြာကံၚ်ဇြဳပၞာန်ကဵု ဒပ်ပံၚ်ကောံ KNLA တအ်တုဲ စဵုကဵုဂိတုအံက်တဝ်ဗာ သၞာံဏံ ညးဍုၚ်ကွာန်ပါဲဘဲပၞာန်စဵုကဵု (၇)ကိုတ်ပြၚ် နွံကၠုၚ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

ပ္ဍဲခရိုၚ်ညံၚ်လေဝ်ပေန် KNU ဂှ် လၟိဟ်ညးပါဲဘဲပၞာန် ၂၄၀,၀၀၀ ပြၚ် နွံဒၟံၚ်လၟိဟ်ဂၠိုၚ်အိုတ်တုဲ ပ္ဍဲကဵုခရိုၚ်သဓီု ၁၄၀,၀၀၀ ပြၚ်ကဵု ပ္ဍဲခရိုၚ်ဒူပလာယာ ဗ္ဒာဲ၁၃၀,၀၀၀ နဒဒှ်လၟိဟ်ဂၠိုၚ်အိုတ် မရနုက်ကဵုဒုတိယကဵု တတိယရဂှ် ဓမံက်ထ္ၜးလဝ်ရ။

လၟုဟ်ဏံမ္ဂး ညးဍုၚ်ကွာန်ပါဲဘဲပၞာန် မၞုံပ္ဍဲတိဍာ်ထိၚ်ဒဝ် KNU တအ်ဂှ် ဒးဆေၚ်ဒၟံၚ်မုက်ကဵု ပရေၚ်ဒၞာဲမံၚ်စံၚ်ဟွံရုံံဂပ်၊ ဇွောံမစၞစဟွံဍိုက်ပေၚ်၊ ဂဥုဲဇဗဟွံရုံဂပ်ရဂှ် KNUဟီုလဝ်ရ။

ပ္ဍဲကဵုသၞာံဏံဂှ် နကဵုဗဟဵု KNU စဳဇန်ဂၠာဲနဲကဲကဵုလဝ်ဂၠံၚ်ဍာန်ဂှ် သွက်ညးဍုၚ်ကွာန်ပါဲဘဲပၞာန် (၂) ကိုတ်ပြၚ် ၜိုန်ရရီုဗၚ်ထံက်ပၚ်ကဵုလဝ် ကပေါတ်စၞစသ္ဇိုၚ် ကေုာံတၚ်နွံပၟိက်တၞဟ်သ္အာၚ် အိုတ်လဝ်သြန်ၝာတ်သေံ ဗ္ဒာဲ (၉) ပြကောဋိကိုတ်မာန်လဝ်ကီုလေဝ် ညးပါဲဘဲပၞာန်ဟွံက္လိဂွံအထံက်ပၚ် နွံဒၟံၚ်ပၟိက် သှ်ေဒၟံၚ်ဗွဲမဂၠိုၚ်ဏီရဂှ် ဟီုလဝ်ရ။

သ္အာၚ်နူဂှ်ပၠန် ပ္ဍဲကဵုသၞာံဏံ သ္ကုတ်ကၠာတေံဂှ် မွဲကရောံကဵုဒပ်ကံၚ်ဇြဳပၞာန် ကၠောန်ရေၚ်တၠုၚ်ကၠုၚ် ဂလိုၚ်ပ္တိုန်လဝ်အသိၚ် ပရေၚ်ချဳဒရာၚ်ပၞာန်ဂှ် ဟိုတ်နူပရေၚ်ဖံက်ပ္ကဝ်လဝ် အခေါၚ်အရာမၞိဟ်တုဲ ပ္ဍဲညးဍုၚ်ကွာန်ပါဲဘဲပၞာန်တအ်ဂှ် နွံဒၟံၚ်ပၟိက် အရီုဗၚ်ဗ္စာရဏာပရေၚ်မၞိဟ် နဒဒှ်ကာတၟေၚ်ဖိုဟ်ဏီရဂှ် KNU လလောၚ်တြးကဵုလဝ်သမ္တီရ။

ပရိုၚ် – သြၚ်လောန်တိုၚ်(မ်)

ဗီု – KNU