ကျာ်ထဝ်၊ နဝ်ဝေမ်ဗာ ၂
ပ္ဍဲတွဵုရးဍုၚ်မန် ပွိုၚ်ဍုၚ်ကျာ်ထဝ်ဂှ် အကြာဒပ်ကံၚ်ဇြဳပၞာန်ကဵု ဒပ်ပၞာန်ဗၠးၜးကောန်ဂကူကရေၚ် KNLA ၊ ဒပ်ပၞာန်စဵုဒၞါညးဍုၚ်ကွာန် PDF တံ ပေါဲဗ္တိုက် သ္ကာတ်မြဟ်ဒၟံၚ်ရောၚ် ဂွံတီကေတ် ဇရေၚ်ဂကောံဇြဟတ်ပၠန်ဂတးတံရ။
ဒပ်ကံၚ်ဇြဳပၞာန်ဝွံ တုဲကၠုၚ်ပ္ဍဲဂိတုအံက်တဝ်ဗာ ၃၀ တေံတုဲ ထ္ပက်ကၠုၚ်ကရောၚ်ပၞာန် ပ္ဍဲကွာန် (ကျောက်ပုံ၊ မဲရုံကြီး၊ မိုးဘောနတ်စၚ်) ပွိုၚ်ဍုၚ်ကျာ်ထဝ် ဒၞါဲဂကောံဇြဟတ်ပၠန်ဂတးတံ ချဳဒရာၚ်ဒၟံၚ်ဂှ်တုဲ ပေါဲဗ္တိုက်ၜါလ္ပာ် က္တဵုဒှ်လဝ်ရ။
ပေါဲဗ္တိုက်တံဏံဝွံ နူဂိတုအံက်တဝ်ဗာ ၃၀ စဵုကဵုဂိတုနဝ်ဝေမ်ဗာ ၁ အခိၚ်နူဂယးဂှ် ပေါဲဗ္တိုက်ၜါလ္ပာ် က္တဵုဒှ်လဝ် ဟွံအောန်နူကဵု တြဴဝါဂှ် ဂွံတီကေတ် အတိုၚ်ဂလာန် တမ်ရိုဟ်ပရိုၚ်ဗလးတိတံရ။
ပဒိုဝ်သဝ်အေနာၚ် ညးမၞုံအခေါၚ်ဟီုဂး ခရိုၚ်သဓီု ဗော်သွးကောန်ဂကူကရေၚ် KNU ဂှ် ပေါဲဗ္တိုက်က္တဵုဒှ်ဒၟံၚ်ကီုလေဝ် အကာဲအရာဇီုကပိုက်ချိုတ်အာ ဗွဲလစှ်ေတံ ဟွံဂွံတီကေတ်ဏီပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲပေါဲဗ္တိုက်ၜါလ္ပာ်ဂှ် ဒပ်ကံၚ်ဇြဳပၞာန် စံၚ်ပလီုလဝ် သၞေဟ်ကၚ်စၟဳတ် KNLA/PDF နွံပ္ဍဲကွာန် (ကျောက်ပုံ) တံဂှ်တုဲ အခိၚ်လၟုဟ်လေဝ် ထပ်ထ္ပက်ဒၟံၚ်ကရောၚ်ပၞာန်ဂှ် သ္ဂးရ။
ဟိုတ်နူပေါဲဗ္တိုက် မက္တဵုဒှ်ဒၟံၚ်ပြဟ်ဟ်ဏံတုဲ ညးဒေသ ၅၀၀ ပြၚ် နူကဵုကွာန်ပိကွာန် ပါလုပ်သီုကဵုကွာန် (ကျောက်ပုံ) တံ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ဂှ် ဂွံတီကေတ်ရ။
အတိုၚ်ဂလာန် ညးတာလျိုၚ် ဂကောံဇြဟတ်ပၠန်ဂတးတံဂှ်မ္ဂး ကရောၚ်ပၞာန်ကံၚ်ဇြဳပၞာန်ဝွံ နူကဵုကွာန် (မဲရုံလေး) ဂှ် ဟိုတ်နူဒှ်ဒၟံၚ်အကာဲအရာ ထပ်ထ္ပက်အာကရောၚ်ပၞာန် စဵုကဵုကွာန်ကျံက်ဖျာဂှ်တုဲ ပေါဲဗ္တိုက်ဂမၠိုၚ် သာသ္ကာတ်မြဟ်ကၠုၚ်မာန်ရောၚ် သ္ၚဳဂၠိပ်လဝ်ရ။
တုဲကၠုၚ် ဂိတုဂျူလာၚ်တေံ ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲကဵုကွာန်ကျံက်တာန်ကဵု ကွာန်ပုၚ်နေဝ်ကုန် ပွိုၚ်ဍုၚ်ကျာ်ထဝ်ဂှ်တုဲ ပေါဲဗ္တိုက်ၜါလ္ပာ် က္တဵုဒှ်လဝ်တုဲ အပ္ဍဲပေါဲဗ္တိုက်ဂှ် ကောန်အရာပ် ဟွံအောန်နူကဵု ၁၀ တၠ ဇီုကပိုက်ချိုတ်အာလဝ်ရ။
ပရိုၚ်−သြၚ်လောန်တိုၚ်(မ်)
ဗီု− CJ