မတ်မလီု၊ အံက်တဝ်ဗာ (၁၄)
ပ္ဍဲဍုၚ်ဗၟာ အပ္ဍဲသၞာံဘဏ္ဍာဏံ သြန်လုပ်နူကဵုပရေၚ်သွံရာန်ဗၞိက်ဍုၚ်သ္အာၚ်ဂှ် စှ်ေကၠုၚ် ဂၠိုၚ်ကဵုဗဳလျာန်ဂှ် ဂွံတီကေတ် အတိုၚ်တၚ်လလာၚ်တြး ဌာနဝန်ဇၞော်ကူသာန်သွံရာန် ကေုာံ ပရေၚ်ပိုန်ဒြပ် သၟဝ်တဲကံၚ်ဇြဳပၞာန်ရ။
ပရေၚ်ကူသာန်သွံရာန်ဗၞိက်ဂှ်ဝွံ ပ္ဍဲကဵုသၞာံဘဏ္ဍာတုဲကၠုၚ်တေံ နူကဵုဂိတုဨပရဴ စဵုကဵုဂိတုသေပ်တေမ်ဗာဂှ် သွံရာန်ဂွံလဝ်ဗၞိက် စဵုကဵုဒဝ်ဠာအမေရိကာန် ၁၆ ဗဳလျာန်ကီုလေဝ် အပ္ဍဲသၞာံဘဏ္ဍာသၞာံဏံ အပ္ဍဲအခိၚ်ကာလတုပ်ဂှ် ဟိုတ်နူဂွံလဝ် ဒဝ်ဠာအမေရိကာန် ၁၅ ဗဳလျာန်ဓဝ်ဂှ်ရ ပရေၚ်သွံရာန်ဗၞိက် စှ်ေကၠုၚ်လဝ် ဒဝ်ဠာ မွဲဗဳလျာန် ပြၚ်ရ။
သ္အာၚ်နူဂှ်ပၠန် ပ္ဍဲကဵုပရေၚ်သွံရာန်ဗၞိက်ဍုၚ်သ္အာၚ်ဂှ် အပ္ဍဲသၞာံဘဏ္ဍာဏံ အပ္ဍဲပွိုၚ် ၆ ဂိတုဂှ် ပ္ဍဲကဵုကဏ္ဍဗၞိက်ပလံၚ်ဂှ် ကလိဂွံလဝ် ဒဝ်ဠာအမေရိကာန် ၇ ဗဳလျာန်ဓဝ်ကီုလေဝ် ပ္ဍဲကဵုကဏ္ဍဗၞိက်ပၠောပ်ဂှ် ကလိဂွံလဝ် ဒဝ်ဠာအမေရိကာန် စဵုကဵု ၈ ဗဳလျာန်ပြၚ်ဂှ်ရ ပရေၚ်သွံရာန်ဗၞိက်ဂှ် ထ္ၜးဒၟံၚ် ဒဒှ်ရနွံပၟိက်ကုသြန်လုပ် မွဲဗဳလျာန်ပြၚ်ရ။
တၠပညာပရေၚ်ပိုန်ဒြပ်မွဲတၠဂှ် ပရေၚ်သွံရာန်ဗၞိက်ဂှ်ဝွံ ပ္ဍဲရာသဳဗြဲကျာတၟးဏံလေဝ် ဂွံတောတက်ကၠုၚ် ဟွံမွဲဂှ်ရ ထပ်ဒးဂဗကၠုၚ် ကုအကာဲအရာနွံပၟိက်သြန်လုပ်တံကဵု ပရေၚ်သွံရာန်ဗၞိက်ပယျဵုတံမာန်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ပ္ဍဲကဵုရာသဳဗြဲကျာတၟးဏံဂှ်တှ်ေ ဗၞိက်ပလံၚ်ဂှ် မလဵုစၟဳစဂွံရောဟီုတှ်ေ ဗၞိက်ပရေၚ်တဵုလွဳမွဲရ စၟဳစဂွံဏောၚ်။ ဟီုမ္ဂး ဗၞိက်တိတ်နူပရေၚ်တဵုလွဳတံဂှ်လေဝ် သ္ၚုဂှ် အပ္ဍဲဍုၚ်ရဂှ် ၚုဟ်တိုန်ဒၟံၚ်တုဲ ဗၞိက်ပလံၚ်ဂှ်တှ်ေ ထိၚ်တုဲ ဒးဗလးဒၟံၚ်ရ။ ဗၞိက်ပလံၚ်လေဝ် ဂွံတိုန်ကၠုၚ်တီတီဂှ် သ္ဇက်ဂွံတိုန်ဟွံမွဲပုဟ်။ မွဲပၠန်ဂှ် ဗၞိက်ပလံၚ်နူကဵုကဏ္ဍပုဂ္ဂလိက ပလံၚ်ပ္တိုန်ဒၟံၚ်ဂၞန်မွဲဂှ်တှ်ေ နူကဵုကမၠောန်ဇိၚ်ဂၠိက်ယာတ်တံရ။ ဆ္ဂး အရာတံဏံလေဝ် ပြသၞာနာနာသာ်၊ ကမၠောန်ဇိၚ်ဂၠိက်ယာတ်ဏံဂှ်လေဝ် ဗက်ကၟာတ်ဒၟံၚ် ဗီုကၠာတေံ သိုက်က်ဟွံသေၚ်ပုဟ်။ ကၟာတ်ထောံ အတိုၚ်ကမၠောန်မွဲရ။ ဝးပ္ကဝ်အခေါၚ်အရာသၟာကမၠောန်ဂးတုဲ ပရေၚ်ထ္ၜးဆန္ဒတံ က္တဵုဒှ်တုဲ တဆိပ်ခိုဟ်ဟ်တံဂှ်တှ်ေ ဟွံအပ်ကမၠောန် ကုဍုၚ်ဗၟာရပုဟ်။ ဟီုမ္ဂး လ္ပာ်ကမၠောန်ဇိၚ်ဂၠိက်ယာတ်ဏံဂှ်လေဝ် သ္ဇက်ဂွံကဵုဟွံမွဲစကွေံပုဟ်။ ပ္ဍဲကဵုရာသဳဗြဲကျာတၟးဏံ တိုန်ကၠုၚ်ညိညမာန်ဂှ်တှ်ေ ဗၞိက်ပလံၚ် တိတ်နူပရေၚ်တဵုလွဳတံရဏောၚ်။ ၜိုတ်ဗၞိက်ပရေၚ်တဵုလွဳတံရနွံဏောၚ်။ ပရေၚ်ကူသာန်သွံရာန်ပယျဵုတံဂှ်လေဝ် ထ္ၜးဒၟံၚ်သြန်နွံပၟိက်တံဂှ်ဏောၚ်။ တုဲပၠန် ပ္ဍဲကဵုသြန်ဘဏ္ဍာ (ဗာတ်ဂျက်) ဂှ်လေဝ် ထ္ၜးဒၟံၚ်သြန်နွံပၟိက်မ္ဂး ဂွံလွဳအာဂှ် ဝါတ်အာဏောၚ်။ ဍုၚ်ဗၟာဂှ် ဒးဂဗဒၟံၚ် ကုအကာဲအရာသာ်ဏံ သီုၜါဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် ပရေၚ်သွံရာန်ဗၞိက်ဍုၚ်သ္အာၚ်တံ ဂွံကလေၚ်သၠုၚ်တိုန်ကၠုၚ်ဂှ် တၚ်စၞောန်ဟွံမွဲပၟိက် မလလောၚ်ပ္တိတ်လဝ် ပ္ဍဲကဵုကဏ္ဍဗၞိက်ပၠောပ်၊ ဗၞိက်ပ္တိုန်တံဂှ် ဒးရုပ်သီဏောၚ်တုဲ ၚုဟ်လှုဲဍုၚ်သ္အာၚ်ဂှ်လေဝ် ဒးညိၚ်နွံဂှ် ညးဆက်ဟီုရ။
တၠကမၠောန်ပရေၚ်ပိုန်ဒြပ်မွဲတၠပၠန်ဂှ်လေဝ် ပရေၚ်သွံရာန်ဗၞိက်ဍုၚ်သ္အာၚ် ဂွံသၠုၚ်တိုန်ကၠုၚ်ဟီုမ္ဂး သွက်ဂွံကၠောန်ပ္တိတ် ဗၞိက်ပ္တိတ်အပ္ဍဲဍုၚ်တံမာန် ၚုဟ်လှုဲဒးညိၚ်ဝတ်ကဵု ညံၚ်ပၟတ်ဓာတ်လလဳ ဂွံမှာန် ဒးကၠောန်ကဵုကၠာဏောၚ်ဂှ် ဟီုရ။
“ပိုယ်တံဂှ်တှ်ေ အဓိက ၚုဟ်လှုဲဒးညိၚ်ဏောၚ်။ တုဲပၠန် ပၟတ်ဓာတ်လလဳ ညံၚ်ဂွံဂွံခိုဟ်ဟ်။ ၚုဟ်လှုဲတံ ဟွံညိၚ်ဟွံဝတ်ဒှ်ဒၟံၚ် တိုန်စှ်ေဒှ်ဒၟံၚ်တှ်ေ ဟွံပြေပြံၚ်ပုဟ်။ တုဲပၠန် ဟွံဂွံပၟတ်ခိုဟ်ဟ်မ္ဂးလေဝ် ပရဲဂွံအဏံဂှ် ကလေၚ်ပါအာ ပ္ဍဲကဵုၚုဟ်ကၠေၚ်တံဂှ်ပၠန်ရ။ မွဲပၠန်ဂှ် ပရေၚ်ဍုၚ်ကွာန်ညိၚ်ဝတ် ဍုၚ်ပိုယ်ဏံရ။ ပရေၚ်ဂီုကၠီုဂှ်တှ်ေ လၟုဟ်မ္ဂး အာကီု၊ ကၠုၚ်ကီုဂှ် အခက်အခုဲနွံဒၟံၚ်ဏောၚ်။ သွက်ဂွံလိၚ်ကောန်ကမၠောန်တံဂှ် အခက်အခုဲနွံကၠုၚ်ရ။ ညအ်ဂှ် အာဇီုကပိုက်ဒၟံၚ် ကုပရေၚ်ကၠောန်ပ္တိတ်ဗၞိက်တံရ။ ဇီုကပိုက်အဏံဗက် သြန်လုပ်မၞိဟ်တံဂှ် စှ်ေကၠုၚ်ရ။ စှ်ေကၠုၚ်ဗက်ဂှ် ဇြဟတ်ရာန်မၞိဟ်တံဂှ်လေဝ် အောန်စှ်ေကၠုၚ်ရ။ အရာတံဏံအိုဿီုဂှ် ဆက်စပ်ဒၟံၚ်ဏောၚ်လေဝ်” သာ်ဝွံ သ္ဂးရ။
ဍုၚ်ဗၟာဝွံ ပလံၚ်ပ္တိုန်ဒၟံၚ် ဍုၚ်သ္အာၚ်ဂမၠိုၚ် မပ္တံကဵု ဗၞိက်ပ္တိတ်နူပရေၚ်တဵုလွဳဂမၠိုၚ်၊ ကပေါတ်တိတ်နူ ကတိုၚ်ရတ် (သတ္တု) ဂမၠိုၚ်၊ ဗၞိက်တိတ်နူဒေသ ပါလုပ်သီုကဵု ဗၞိက်တိတ်နူဍာ် ကေုာံ ဂြိုပ်ဆုတံဂှ်တုဲ နူကဵုဍုၚ်သ္အာၚ်တံဂှ် ဒးပၠောပ်ပ္တိုန်ဒၟံၚ် ဗၞိက်မၞိဟ်အရပ်စပ်၊ ဂဥုဲဇဗ၊ ဗၞိက်စၞစသုၚ် ကေုာံ ကပေါတ်ဗၞိက်အပြောံ အရပ်စပ်နာနာတံ အဓိကရ။
ဆ္ဂး ပ္ဍဲလက်ထက်ကံၚ်ဇြဳပၞာန် ဟိုတ်နူပြသၞာ နွံပၟိက်ကုသြန်လုပ် စပ်ကဵုပရေၚ်သၠာဲဂတးဗၞိက်တံဂှ်တုဲ ဒးဂဗကၠုၚ်ဒၟံၚ် အကာဲအရာ ၚုဟ်မးသြန်ဗၟာ စှ်ေကၠုၚ်ကီု၊ ကပေါတ်ဗၞိက်အပြောံတံကဵု ၚုဟ်ဗၞိက်စၞစသုၚ်သ္ဇိုၚ်တံ သၠုၚ်တိုန်ကၠုၚ် ဂၠိုၚ်ကဵုဆတံဂှ်ရ။
တိုက်သြန်ဂၠးတိဂှ် ကြဴနူဒပ်ပၞာန်သီအဝဵုတုဲ အကာဲအရာပရေၚ်ပိုန်ဒြပ်ဍုၚ်ဗၟာ မဂြုဲဂြဟ်စှ်ေကၠုၚ်ဒၟံၚ်ဂှ်ဝွံ ဒဵုကဵုအခိၚ်လၟုဟ် ကလေၚ်ယိုပ်ယာကၠုၚ်ဟွံမာန်ဏီတုဲ ဒၟါနူမူဝါဒဗၠေတ်တ်ဂမၠိုၚ်တုဲ အရာမစှ်ေကၠုၚ်ဒၟံၚ် ဂၠိုၚ်ၚ်ကဵုဝါတံဂှ်ဝွံ သ္ကဵုဇီုကပိုက်တဴ ကုပရေၚ်ပိုန်ဒြပ်ကၟိန်ဍုၚ် မွဲအာယုက်ဏောၚ်ဂှ် လလောၚ်ပ္တိတ်လဝ် ပ္ဍဲလိက်ဒုၚ်စဳရေၚ် သၞာံဏံမံက်တေံဂှ်ရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai