ဒပ်ကံၚ်ဇြဳပၞာန် ထ္ပက်ပၞာန် ပ္ဍဲတိဍာ်ကဝ်တူလေဝ် ဟွံမာန်ရပုဟ်ဂှ် KNU ဟီု

ကဝ်တူလေဝ်၊ အံက်တဝ်ဗာ (၁၄)

ပ္ဍဲကဵုတိဍာ်ပရေၚ်အုပ်ဓုပ်ကဝ်တူလေဝ်ဂှ် ဒပ်ကံၚ်ဇြဳပၞာန်ဝွံ ကၠောန်သ္ပထ္ပက်ပၞာန် ဗီုကၠာတေံ ဟွံမာန်ရတုဲ ဆောံလေၚ်ကၠုၚ်တိဍာ်တံလေဝ် သာဂၠိုၚ်ကၠုၚ်ဂှ် ညးမၞုံအခေါၚ်ဟီုဂး KNU ပဒိုဝ်သဝ်တဝ်နဳ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

အပ္ဍဲကာလဒပ်ပၞာန်သီအဝဵုဏံ ပေါဲဗ္တိုက်အကြာ ဒပ်ကံၚ်ဇြဳပၞာန်ကဵု ဒပ်ပၞာန်ဗၠးၜးကောန်ဂကူကရေၚ် KNLA, ဒပ်စဵုဒၞါကောန်ဂကူကရေၚ် KNDO တံဂှ် က္တဵုဒှ်လဝ် ဗ္ဒါဲမွဲဠက်ရ။

ပ္ဍဲကဵုဏံ အပ္ဍဲသၞာံဏံ နူကဵုဂိတုဂျာန္နဝါရဳ စဵုကဵု ဂိတုသေပ်တေမ်ဗာ အပ္ဍဲပွိုၚ် ၉ ဂိတုဂှ် ပေါဲဗ္တိုက်အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တံဂှ် က္တဵုဒှ်လဝ် စဵုကဵု ၃၅၀၀ ပြၚ်တုဲ လ္ပာ်ကံၚ်ဇြဳပၞာန်ဂှ် ကောန်ပၞာန်ဂၠိုၚ်ကဵုလ္ၚီ ဒးချိုတ်အာလဝ်ရ။

အခိၚ်လၟုဟ်ဂှ်လေဝ် ဒပ်ကံၚ်ဇြဳပၞာန်ဝွံ ယဝ်ရဒးပလံၚ်ဇွောံမ ဇရေၚ်ဗ္ဒိုပ်ဒပ် ဖျေံသ္ဇိုၚ်ဍေံတံဂှ်မ္ဂး နူကဵုတရဴဂၠံၚ်ကုန်ဗလးတိဂှ်မွဲကဆံၚ် ပလံၚ်ဗစိုပ်ဟွံဂွံရတုဲ ပ္ဍဲကဵုဒၞါဲဗွဲမဂၠိုၚ်ဂှ် ပတှ်ေယာန်သၞေၚ်ဝဲတံသၟးတုဲ သုၚ်စောဲဒၟံၚ်တုဲ ဒးပလံၚ်ကၠုၚ်ဒၟံၚ်ဇွောံမတံဂှ် ပဒိုဝ်သဝ်တဝ်နဳ ဟီုရ။

“ ဍေံတံ ( ဒပ်ကံၚ်ဇြဳပၞာန်) ဝွံ ဗီုကၠာတေံဂှ် သာ်လဵုမှ ထ္ပက်ပၞာန်ဟွံမာန်ရပုဟ်။ ဒၞါဲဍေံတံမိက်ဂွံအာဂှ်လေဝ် အာဟွံမာန်ရပုဟ်။ ဒပ်တံဂှ်လေဝ် ဟွံကလေၚ်စိုပ်ပ္ဍဲဗ္ဒိုပ်ဒပ်တံ သီုဖအိုတ်ဏီဂှ်ရ ပ္ဍဲကဵုဗ္ဒိုပ်ဒပ်ဏံဂှ် အာအတေံ အာအဏံလေဝ် ကၠောန်ဟွံမာန်ရပုဟ်။ ဒှ်ဒၟံၚ်အကာဲအရာ ဒးမံၚ်ဒၟံၚ် ညိၚ်ၚ်ရ။ ဒးပလံၚ်ဇွောံမရဂှ် နကဵုတရဴကုန်ကဵု ဗလးတိဏံဂှ် ပလံၚ်ဟွံဂွံရတုဲ ပ္ဍဲကဵုဒၞါဲဗွဲမဂၠိုၚ်ဂှ် ဒှ်ကၠုၚ်အကာဲအရာ ဒးပတှ်ေဒၟံၚ် ယာန်သၞေၚ်ဝဲတံရ။ တုဲပၠန် ဒှ်ပေါဲဗ္တိုက်ရဟီုဂှ် ပ္ဍဲကဵုဒေသကွာန်ရး ပ္ဍဲဗ္ဒိုပ်တံဏံဂှ် ဟွံဒှ်ရတုဲ ပေါဲဗ္တိုက်တံဂှ် ကလေၚ်ဒှ်ဒၟံၚ် လ္တူဂၠံၚ်ဇၞော်တံပၠန်ဂှ် မံက်ကၠးကၠုၚ်ယျ။ မိက်ဂွံသ္ဂးဂှ်တှ်ေ ဗီုကၠာတေံဂှ် ဍေံတံ ချဳဒရာၚ်ဟွံမာန်ရပုဟ်။ ဟီုမ္ဂး ပ္ဍဲကဵုအကာဲအရာသာ်ဏံဂှ် လ္ပာ်ဍေံတံ ဆုတ်ယုတ်စှ်ေကၠုၚ်ဒၟံၚ်ဂှ် သာတုဲဂၠိုၚ်ကၠုၚ်ဒၟံၚ် သိုက်က်ရ။ အကာဲအရာ ဂကောံဒပ်ပိုယ်တံဂှ်လေဝ် ဆုဲလုပ်ကၠုၚ်လ္ပာ်အပ္ဍဲဏံဂၠိုၚ်ကၠုၚ်ဂှ် သက်သဳရဏောၚ်။ ညအ်ဂှ် ဟီုဒၟံၚ်မးမးဟွံသေၚ်ပုဟ်။ ဟိုတ်ဂှ်ရ ပေါဲဗ္တိုက်ပိုယ်တံဂှ်ဝွံ ဆုဲအာဒၟံၚ်ဂတတေံ သိုက်က်ရောၚ်ဟီုဂှ် မိက်ဂွံကဵုသမ္တီ ကုညးဍုၚ်ကွာန်တံရ” သာ်ဝွံ ညးသ္ဂးရ။

အတိုၚ်လိက်ဒုၚ်စဳရေၚ် ဇာဇၞိက်အထံက်အရီုပရေၚ်ၜိုဟ်လလမ်ကရေၚ် KPSN မလလောၚ်ပ္တိတ်လဝ်ဂှ်မ္ဂး စနူအခိၚ်သီအဝဵုတုဲ ပ္ဍဲကဵုသ္ကုတ်ဗၟံက်သၠုၚ်ကျာဍုၚ်ဗၟာဂှ် ပရေၚ်အုပ်ဓုပ်ကဵု ပရေၚ်ပၞာန် ကံၚ်ဇြဳပၞာန်ဂှ် ဟဲဇးကၠုၚ်ဒၟံၚ်သိုက်က်တုဲ ဟိုတ်နူပရေၚ်ဗ္တိုက်ထ္ပက်ပၞာန် မဟာမိတ် KNU တံဂှ်တုဲ ကံၚ်ဇြဳပၞာန်ဝွံ ဒးဆောံလေၚ်ဗလးထောံတဲ စဵုကဵု ဗ္ဒိုပ်ဒပ် ၆၂ ဂှ် ဂွံတီကေတ်ရ။

သ္အာၚ်နူဂှ်ပၠန် မွဲဒမြိပ်ၜဳသြၚ်လောန်ဂှ် လ္ပာ် KNU တံ ကလိဂွံကၠုၚ်ပရေၚ်အုပ်ဓုပ်တံ ဂၠိုၚ်ကၠုၚ်သၟးဟွံက ဂၠံၚ်တရဴဆက်စၠောံ အကြာလ္ဂုၚ်ကဵု နေဗျဳဒဝ်ဂှ်လေဝ် သာတုဲထိၚ်ဒက်ဂွံကၠုၚ်လဝ်ဂှ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ်ဂှ်ရ။

ကြဴနူဒပ်ပၞာန်သီအဝဵုတုဲ KNU ဗ္တိုက်သီဂွံလဝ် ဗ္ဒိုပ်ဒပ်ကံၚ်ဇြဳပၞာန် မွဲဒမြိပ်ၜဳသြၚ်လောန် မၞုံအပ္ဍဲတိဍာ် KNU ဗွဲမဂၠိုၚ်ဂှ်တုဲ ဒေသတိဍာ် သ္ကုတ်ဗၟံက်ၜဳသက်တိုၚ် စဵုကဵု (၇၀) တၟံကၠံဂှ် ထိၚ်ဒက်မာန်လဝ်တုဲ စဵုကဵုသ္ကုတ်ပလိုတ်ၜဳသက်တိုၚ်ဂှ်လေဝ် ဒပ် KNU တံ ထ္ပက်ကၠုၚ်မာန်တုဲ ထ္မံက်ကၠုၚ်ပေါဲဗ္တိုက်တံ အဆက်က်မာန်ဂှ် ပဒိုဝ်သဝ်တဝ်နဳ သ္ဂးရ။

သ္အာၚ်နူဂှ်ပၠန် ပ္ဍဲကဵုခရိုၚ်သဓီု ဒပ်မဟာ (၁) KNU ဂှ်လေဝ် ကရောၚ်ပၞာန်ကံၚ်ဇြဳပၞာန်တံ ထ္ပက်ပၞာန်ဗ္တိုက် စဵုကဵုဒေသလ္ပာ်အပ္ဍဲတေံဂှ် ကၠောန်ဟွံမာန်ရတုဲ မွဲဒမြိပ်ဂၠံၚ်ပျဳထံၚ်သု မတ်မလီု−ရေဝ်−ထဝါဲ စၟတ် (၈) ဂှ်လေဝ် ကၠာတေံ ထိၚ်ဒက်မာန်ကီုလေဝ် အခိၚ်လၟုဟ် ဒပ် KNU တံ ထိၚ်ဒက်လဝ်တုဲ ကၠောန်ကၠုၚ်ပရေၚ်စၟဳတ်တံမာန်ဂှ် ဟီုရ။

သၞာံဏံ ၂၀၂၃ နူဂိတုဂျာန္နဝါရဳ စဵုကဵုဂိတုသေပ်တေမ်ဗာ ပွိုၚ် (၉) ဂိတုဂှ် အကြာဒပ်ကံၚ်ဇြဳပၞာန်ကဵု ဒပ် KNLA, KNDO တံ ပေါဲဗ္တိုက်အပံၚ် က္တဵုဒှ်လဝ် ၃၅၇၀ ဝါတုဲ အပ္ဍဲပေါဲဗ္တိုက်ဂှ် လ္ပာ်ဒပ်ကံၚ်ဇြဳပၞာန် ၃၈၆၅ တၠ ချိုတ်တုဲ စဵုကဵု ၂၂၆၀ တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် အတိုၚ်စရၚ်ပေါဲဗ္တိုက် နူကဵု KNU မလလောၚ်ပ္တိတ်လဝ်ဂှ်ရ။

ပရိုၚ်−သြၚ်လောန်တိုၚ်(မ်)

ဗီု−KNU