ၜိုန်ရကောန်ဂကောံလ္ၚဵု အာတိုန်စိုပ် တ္ၚဲ NCA ပေၚ်သၞာံ နွံကီုလေဝ် ဟွံသ္ပစၞးကဵုဂကောံပုဟ် ABSDF ဟီု

နေပျဳဒဝ်၊ အံက်တဝ်ဗာ (၁၅)

သွက်ဂွံတိုန်စိုပ်အခန်ကၞာ တ္ၚဲ NCA ပေၚ်သၞာံ ကံၚ်ဇြဳပၞာန်က္ဍိုက်က္ဍိုပ်ကၠောန်ဗဒှ်လဝ်ဂှ် ကောန်ဂကောံလ္ၚဵု စိုပ်ဒၟံၚ်နေပျဳဒဝ်တအ်ဂှ် ဟွံသ္ပစၞးကဵုဂကောံရောၚ် ဒပ်ပၞာန်ဒဳမဝ်ကရေတ်တေတ်တာတ်ဥူ ကွးဘာဆေၚ်ကဵုအလုံကၟိန်ဍုၚ်ဗၟာ (ABSDF) ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

သွက်ဂွံတိုန်စိုပ် အခန်ကၞာတ္ၚဲလိက်ကသုက်ဒေါံပန်ပှော်အလုံကၟိန်ဍုၚ် (NCA) ပေၚ် (၈) သၞာံဂှ်ဂးတုဲ သ္ဂံမျိုဝ်ဝေန် နူဒပ်ပၞာန်ဒဳမဝ်ကရေတ်တေတ်တာတ်ဥူကွးဘာဆေၚ်ကဵုအလုံကၟိန်ဍုၚ်ဗၟာ (ABSDF) ကေုာံ ဂကောံတအ်ဂှ် စိုပ်ကၠုၚ်ဒၟံၚ်နေပျဳဒဝ် ပ္ဍဲဂိတုအံက်တဝ်ဗာ စၟတ်တ္ၚဲ (၁၃) ဂှ်ရ။

ပ္ဍဲကဵုလိက်ပရိုၚ်တြးဝါဒကံၚ်ဇြဳပၞာန် ပ္တိတ်လဝ်တ္ၚဲဏံဂှ်မ္ဂး သုၚ်စောဲလဝ်ဝေါဟာ က္ဍိုပ်သ္ကိုပ် EAO ဥူမျိုဝ်ဝေန် ပါလုပ်ထ္ပက်လဝ်စၟတ်တဲ ပ္ဍဲ NCA တုဲ ဥူခွောန်ဥက္ကာ နူ PNLO ကဵု ဥူခိုၚ်သိုဝ်နိုၚ် နူ ALP တအ်ဂှ်လေဝ် သုၚ်စောဲလဝ်ဝေါဟာတုပ်ဗီုဂှ်ကီုရ။

သ္ဂံၚ်သလိုၚ်ယျဝ်အောၚ် ညးလုပ်ဂကောံကဝ်မတဳက္ဍိုက်က္ဍိုပ်ဗဟဵု ABSDF ဂှ်မ္ဂး ပရေၚ်ကော်ဘိက် သွက်ဂွံတိုန်စိုပ်အခန်ကၞာ NCA ဂှ် နွံဒၟံၚ်ပိဂကူတုဲ သ္ဂံၚ်မျိုဝ်ဝေန်ကဵုဂကောံညး အာတိုန်စိုပ်လၟုဟ်ဂှ် သ္ပလဝ်စၞးကဵုဂကောံ ဟွံသေၚ်ရဂှ် ဟီုလဝ်ရ။

“ပရေၚ်ကော်ဘိက်အခန်ကၞာ NCA ပေၚ် (၈) သၞာံဂှ် ဂွံမိၚ်လဝ် နွံပိဂကူရ။ ပထမဂှ် ဂကောံထ္ပက်လဝ်စၟတ်တဲ NCA ၊ ဒုတိယဂှ် ကော်ဘိက်လဝ် ညးထ္ပက်လဝ်စၟတ်တဲ NCA၊ တတိယမွဲဂှ် ညးဒးဒုၚ်ဘိက်လဝ်ဗွဲတၟေၚ်ဂးတုဲ ဘိက်လဝ်ရ။ ဒုၚ်သ္ဇိုၚ်ကဵုလ္တူဏံတုဲ သ္ဂံၚ်မျိုဝ်ဝေန်တအ် အာတိုန်စိုပ်လဝ်ရ။ သ္ဂံၚ်မေန်ဇြဝ်ကဵု သ္ဂံၚ်မောၚ်ဥူတအ်လေဝ် ပါဒၟံၚ်ရ။ ဟီုတှ်ေ ပရေၚ်ညးတအ်တိုန်စိုပ်ဂှ် သ္ပစၞးကဵုဂကောံဟွံသေၚ်ပုဟ် မိက်ဂွံဟီုရ”ဂှ် ညးသ္ဂးလဝ်ရ။

သွက်ဂွံတိုန်စိုပ်အခန်ကၞာ NCA ဂှ် ကော်ဘိက်လဝ် ဂကောံရပ်လွဟ်ကောန်ဍုၚ်အရၚ်ထ္ပက်လဝ်စၟတ်တဲ လိက်ကသုက်ဒေါံပန်ပှော် NCA တအ်ကဵု ဂကောံရပ်လွဟ်ကောန်ဍုၚ်အရၚ် ဟွံဂွံထ္ပက်လဝ်စၟတ်တဲဒေါံပန်ပှော်ရဂှ် ဓမံက်ထ္ၜးလဝ် ပ္ဍဲလိက်ပရိုၚ်ကံၚ်ဇြဳပၞာန်ပ္တိတ်လဝ်ရ။

က္ဍိုပ်သ္ကိုပ်ကောန်ဍုၚ်အရၚ်ကရေၚ် ထ္ပက်လဝ်စၟတ်တဲ NCA သဝ်မူတူဇြေဖိုဝ်၊ ဥက္ကဋ္ဌ ကံၚ်ဇြဳကလေၚ်ဒက်ပ္တန်ဍုၚ်သေံ RCSS ဂအုပ်ဗိုလ်ဇၞော်ယွောတ်သေတ်၊ ဥက္ကဋ္ဌဗော်သွးလာဟူဒဳမဝ်ကရေတ်တေတ် (LDU) ကျာသဝ်လမန်တအ်လေဝ် တ္ၚဲတနေံတေံ အခိၚ်တ္ၚဲစေၚ်ဂှ် နူကဵုဍာန်ကျာတာချဳလုက် စိုပ်ကၠုၚ်နေပျဳဒဝ်ညးသ္ကအ်ရ။

ကြဴဴနူဒပ်ပၞာန်သီအဝဵုတုဲ သ္ကုတ်လကြဴဏံ ABSDF ဂှ် ဟွံကၠောန်သ္ပ ပရေၚ်သဳကၠဳဓဝ်ၜိုဟ်လလံကဵု ကံၚ်ဇြဳပၞာန်တုဲ ပါလုပ်ဒၟံၚ် ပ္ဍဲပရေၚ်ပၠန်ဂတးက္ညၚ် မွဲကရောံကဵု ဗော်သွးကောန်ဂကူကရေၚ် KNU ၊ ဒပ်ပၠတရဴဴချေၚ် CNF တၚ်ဒတူလာၚ် တုပ်သၟဟ်တအ်ဂှ်ရ။

ဒုၚ်သ္ဇိုၚ်လ္တူ NCA ကံၚ်ဇြဳပၞာန်တုဲ ပ္ဍဲလ္တူကၠောန်ဗဒှ် ပေါဲသဳကၠဳပတောံ စၟတ်သမ္တီ NCA ပေၚ် (၈) သၞာံဂှ် ABSDF၊ KNU ကေုာံ CNF ပါလုပ်ဒၟံၚ် ပ္ဍဲပၠန်ဂတးတအ်ဂှ် လလောၚ်တြးလဝ် တၚ်လစွံစိုတ် ပ္ဍဲအကြာမွဲၜါတ္ၚဲတုဲကၠုၚ်ဏံရ။

ဟိုတ်နူကမၠောန်ပြဝကံၚ်ဇြဳပၞာန် ကၠောန်သ္ပဒၟံၚ်ပရေၚ်ဗတိုက်ပန် ပ္တဝ်လဝ်ကဵုညးဍုၚ်ကွာန်တုဲ လိက်ကသုက်ဒေါံပန်ပှော် NCA လီုလာ် သာတုဲကဵုခိုၚ်ဗိုန်ဒၟံၚ်ရဂှ် ဂကောံ EAO ပၠန်ဂတးတအ် လလောၚ်တြးလဝ် ဗွဲမကၠးဖ္ဍးရ။

ပရိုၚ် – သြၚ်လောန်တိုၚ်(မ်)

ဗီု – ယှိုဲတြိဂါန်တတေန်လွှာ