ပ္ဍဲရးဒေသတၞၚ်သြဳ ပေါဲဗတိုက် သာသ္ကာတ်မြဟ်ကၠုၚ်မာန်

တၞၚ်သြဳ၊ အံက်တဝ်ဗာ (၁၅)

ပ္ဍဲကဵုရးဒေသတၞၚ်သြဳ သ္ပတံနူရာသဳတၟးဇးကၠုၚ်စိုပ်ဂတဏံတုဲ ဟိုတ်နူပေါဲဗတိုက်ၜါလ္ပာ် သာသ္ကာတ်မြဟ်ကၠုၚ်မာန်ဒၟံၚ်ဂှ်ရ နကဵုညးဍုၚ်ကွာန်တအ် ညံၚ်ဂွံဒ္ဂေတ်ဗက် တၚ်စေဝ်ပၞောန် လလောၚ်တြးလဝ်ဂှ် ညးတာလျိုၚ် (ပကဖ)တအ် ဟီုလဝ်ရ။

ပ္ဍဲရးဒေသဇၞော်တၞၚ်သြဳ ဇြဟတ်ပၞာန်ဒုၚ်ဒဝ်တဝ်စၞေဟ်ညးဍုၚ်ကွာန် ခိုဟ်ဒၟံၚ်ဂှ် သ္ပတံနူ ဂိတုသေပ်တေမ်ဗာ တုဲကၠုၚ်ဏံတုဲ ပေါဲဗတိုက်ၜါလ္ပာ် ကလေၚ်ဒှ်ကၠေတ်ကၠုၚ်ဒၟံၚ်ရ။

ပေါဲဗတိုက်က္တဵုဒှ်ဒၟံၚ်ပြဟ်ဟ်ဏံဂှ် လ္တူနူလ္ပာ်ကံၚ်ဇြဳပၞာန်ထ္ပက်ပၞာန်တုဲ နူလ္ပာ် PDF တအ် အာဗတိုက်လဝ်တုဲ ဒှ်ပေါဲဗတိုက်ၜါလ္ပာ် သာဒှ်ကၠုၚ်လဝ်ရ။

ညးတာလျိုၚ်ဒပ်စဵုဒၞာညးဍုၚ်ကွာန်(ပကဖ) ရးတၞၚ်သြဳ မွဲတၠဂှ်မ္ဂး သၞာံဏံဂှ် ဟိုတ်နူအလဵုအသဳညဳသၟဟ်ကောန်ဂကူ(NUG) စၟတ်သမ္တီကေတ်လဝ် နဒဒှ်သၞာံကဵုသ္ဂုတ်သွာတ်ပၠန်ဂတးဂှ်ရ ပ္ဍဲကဵုရာသဳတၟးဇးကၠုၚ်စိုပ်ဂတဏံ သာတုဲ ကၠောန်အာပရေၚ်ချဳဒရာၚ်ထ္ပက်ပၞာန်ရောၚ်ဂှ် ဟီုလဝ်ရ။

ဟိုတ်ဂှ်ရ ပ္ဍဲကဵုရာသဳတၟးဇး ကၠုၚ်စိုပ်ဂတဏံ ဟိုတ်နူပေါဲဗတိုက်တအ် သာသ္ကာတ်မြဟ်ကၠုၚ်မာန်ဒၟံၚ်တုဲ နကဵုညးဍုၚ်ကွာန်တအ်ဂှ် သွက်ဂွံမၚ်က္လၚ်ဒၟံၚ်ပရိုၚ်ပၞာန် ဟွံသ္ကုတ်ခြာကီု ယဝ်ဒှ်ကၠုၚ်ပေါဲဗတိုက်မ္ဂး ညံၚ်ဂွံဂြိပ်ပါဲဓလေတ် ပ္ဍဲဒၞာဲဗၠးဘဲမာန် ပရဟ်ဒုၚ်ပလေဝ်ပလေဝ်လဝ်ညးသ္ကအ်ညိဂှ် ဗတိုက်ဖ္အောဝ်လဝ်ရ။

ပ္ဍဲရးဒေသတၞၚ်သြဳဂှ်မ္ဂး ပ္ဍဲဂိတုသေပ်တေမ်ဗာတုဲကၠုၚ်တေံ ပ္ဍဲကဵုပွိုၚ်ဍုၚ်ထဝါဲ၊ လံၚ်လုၚ်၊ တယျေတ်ချောၚ်၊ ဍာ်ဗု၊ တၞၚ်သြဳ၊ ကအ်သြံၚ် ကေုာံပွိုၚ်ဍုၚ်ပလဝ်တအ်ဂှ် ပေါဲဗတိုက်ဆေၚ်မုက် ဟွံအောန်နူ (၅၀) ဝါ ဒှ်လဝ်တုဲ ပရေၚ်ဇီုကပိုက်ချိုတ်ဂျိုၚ်ၜါနွံလဝ် သီုၜါလ္ပာ်ရ။

ဟိုတ်နူပေါဲဗတိုက်တုဲ ကောန်ဒေသညးဍုၚ်ကွာန် ၅၀,၀၀၀ ပြၚ် ထောံသ္ၚိဌာန် ဒးဂြိပ်ဒဴပါဲဓလေတ်ဒၟံၚ်တုဲ နွံဒၟံၚ်ပၟိက် အရီုဗၚ်ဗ္စာရဏာပရေၚ်မၞိဟ်ဖိုဟ်ဏီရဂှ် ဂွံတီကေတ် အတိုၚ်တၚ်လလောၚ်တြး ဂကောံရီုဗၚ်ကဵုဒၟံၚ် ညးပါဲဒဴဘဲပၞာန်တအ်ရ။

ပရိုၚ် – သြၚ်လောန်တိုၚ်(မ်)

ဗီု – Dawei PDF