ဒဒှ်ရလိက်ကသုက် NCA လီုဂှ် KNU, CNF, ABSDF ထပ်သ္ပဒတန်

နေဗျဳဒဝ်၊ အံက်တဝ်ဗာ (၁၅)

အခိၚ်ကံၚ်ဇြဳပၞာန် ပလေဝ်ပလေတ်ဒၟံၚ် သွက်ဂွံကၠောန်ဗဒှ် တ္ၚဲကၠောံသၞာံ NCA ပေၚ် ၈ သၞာံဂှ် တၚ်လလောၚ်တြး ဂကောံ EAO ပၠန်ဂတး ပိဂကောံ မလလောၚ်ပ္တိတ်လဝ်လစွံစိုတ်ဂှ်ဝွံ ဒဒှ်ရလိက်ကသုက် NCA လီုဂှ် ထပ်သ္ပဒတန်လဝ်ရောၚ် KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

KNU, CNF ကေုာံ ABSDF မထ္ပက်လဝ်စၟတ်တဲ ပ္ဍဲကဵုလိက်ကသုက်ဒေါအ်ပန်ပှော်အလုံဍုၚ် NCA တံဂှ်ဝွံ ပ္ဍဲဂိတုအံက်တဝ်ဗာ ၁၂ တေံ လလောၚ်ပ္တိတ်လဝ်လစွံစိုတ်ပံၚ်တောဲ လ္တူကိစ္စပေါဲသဳကၠဳပ္တောံကံၚ်ဇြဳပၞာန် မဒုၚ်သ္ဇိုၚ်ကဵု NCA ဂှ်ကဵု လ္တူကိစ္စကၠောန်ဗဒှ် တ္ၚဲ NCA ပေၚ် ၈ သၞာံဂှ်ရ။

ဟိုတ်နူပြဝကံၚ်ဇြဳပၞာန် မကၠောန်သ္ပဒၟံၚ် ပရေၚ်ဗ္တိုက်စွံပွန် လ္တူညးဍုၚ်ကွာန်တံဂှ်တုဲ ဒဒှ်ရလိက်ကသုက် NCA လီုအာဂှ် သ္ကဵုခိုၚ်ကၠိုက်တဴရောၚ် ဂကောံ EAO ပိဂကောံ မထ္ပက်လဝ်စၟတ်တဲဒေါအ်ပန်ပှော် ပၠန်ဂတးဒၟံၚ် ကုဒပ်ပၞာန်ဂှ် လလောၚ်တြးလဝ်ရ။

ဒှ်သာ်ဂှ်ရ လလောၚ်ပ္တိတ်ကၠုၚ်လဝ် တၚ်ဒတူလိုၚ်ပရေၚ်ဍုၚ်ကွာန် ကေုာံ တၚ်ရန်တၟံပရေၚ်ဍုၚ်ကွာန် စပ်ကဵုပရေၚ်ဒက်ပ္တန်ကၟိန်ဍုၚ်ပံၚ်ကောံ ဖေဝ်ဒရာဒဳမဝ်ကရေဇြဳတံကီု သီုကဵုတၚ်နၚ် လုကဴဒပ်ပၞာန် ဟွံတိတ်နူပရေၚ်ဍုၚ်ကွာန်မ္ဂး သ္ဂောံဆဵုဂဗသဳကၠဳဟွံမွဲတံ ဗွဲမလုပ်သၞောဝ်ရ။

ပဒိုဝ်သဝ်ကလေဝ်သေ ညးမၞုံအခေါၚ်ဟီုဂး ဗော်သွးကောန်ဂကူကရေၚ် KNU နူကဵုဂကောံ EAO ပၠန်ဂတးပိဂကောံဂှ် ဒဒှ်ရလိက်ကသုက် NCA လီုအာဂှ် ထပ်သ္ပဒတန်လဝ်တုဲ တၚ်တုပ်စိုတ်ပရေၚ်ဍုၚ်ကွာန်ဂမၠိုၚ်ဂှ် ယဝ်ရဂကောံဇြဟတ်ဘဝတုပ်အိုဿီု ပံၚ်တောဲရေၚ်တၠုၚ်အာ မွဲအခိၚ်ဓဝ်မ္ဂး အံၚ်ဇၞးဏောၚ် ပတှ်ေစှ်ေစိုတ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ ဒှ် statement ထပ်သ္ပဒတန်လဝ် NCA လီုအာယျဟီုဂှ် ပိုယ်တံ မိက်ဂွံဟီုရ။ နွံမွဲဂှ်တှ်ေ ယဝ်ရဂကောံဇြဟတ်ဘဝတုပ် မဒးဒုၚ်စသိုၚ် ညံၚ်ရဴကောန်ဍုၚ်အရၚ်ပိုယ်တံ သီုဖအိုတ်ဂှ် ပံၚ်တောဲရေၚ်တၠုၚ်အာညးသ္ကအ် မွဲအခိၚ်ဓဝ်မ္ဂး တၚ်ရန်တၟံပရေၚ်ဍုၚ်ကွာန် တၚ်တုပ်စိုတ် (၅) တၚ်ဏံ အံၚ်ဇၞးဏောၚ်ဂှ် ပိုယ်တံ ပတှ်ေစှ်ေစိုတ်ရ” သာ်ဝွံ ညးသ္ဂးရ။

ဂကောံ KNU, CNF, ABSDF မဒှ်ဂကောံပၠန်ဂတး EAO ပိဂကောံတံဂှ်ဝွံ ဟိုတ်နူဒပ်ပၞာန် ကလေၚ်သီအဝဵုမွဲဝါပၠန်ဂှ်တုဲ ၜိုန်ရထ္ပက်လဝ်စၟတ်တဲ ပ္ဍဲ NCA ကီုလေဝ် ဟွံကၠောန်သ္ပဆဵုဂဗသဳကၠဳ ကုကံၚ်ဇြဳပၞာန်မွဲသာ် ပံၚ်တောဲကဵု ဂကောံဇြဟတ်ပၠန်ဂတးတံ၊ ဂကောံဒပ်စဵုဒၞါညးဍုၚ်ကွာန် PDF တံတုဲ လုပ်ဒၟံၚ်ပေါဲဗ္တိုက်ရ။

ပရေၚ်ပၞာန်သီအဝဵုဂှ်ဝွံ ပလီုကၠေံ သ္ဇိုၚ်မူ NCA ကဵု တၚ်ရန်တၟံတံဂှ်တုဲ ဟိုတ်နူသၞောဝ်သ္ဇိုၚ်ဒက်ပ္တန် ၂၀၀၈ ​လေဝ် လီုအာဂှ်ရ လၟေၚ်ကမၠောန်မဒုၚ်သ္ဇိုၚ်ကဵု NCA တံကဵု ဂၠံၚ်တရဴပေါဲသဳကၠဳတံဂမၠိုၚ် ဒေါအ်ဒေၚ်အာလဝ်ရောၚ်ဂှ် ဂကောံ EAO ပၠန်ဂတး ပိဂကောံတံ သ္ဂးလဝ်ရ။

ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် စနူအခိၚ်ဒပ်ပၞာန်သီအဝဵုတေံတုဲ လိက်ကသုက် NCA ဝွံ လမျီုဟွံလုပ်ရပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“လိက်ကသုက် NCA ဟီုဂှ် ဒုၚ်သ္ဇိုၚ်ကဵု သၞောဝ်သ္ဇိုၚ်ဒက်ပ္တန် ၂၀၀၈ တုဲ မံက်ဂတဝ်ကၠုၚ်လဝ်ဏောၚ်။ နူကဵုကံၚ်ဇြဳပၞာန်ဂှ် ပလီုကၠေံ တၚ်စၞောန်ပျး ပါလုပ် ပ္ဍဲသၞောဝ်သ္ဇိုၚ် ၂၀၀၈ မဒှ်သ္ဇိုၚ်မူလိက်ကသုက် NCA ဂှ်တုဲ စနူဒပ်ပၞာန်သီအဝဵု ပ္ဍဲဂိတုဖေဖဝ်ဝါရဳ ၂ သၞာံ ၂၀၂၁ တေံဂှ်တုဲ လိက်ကသုက် NCA ဝွံ လမျီုဟွံလုပ်ဟဂှ်ရ၊ အဓိပ္ပာယ်လေဝ်ဟွံမွဲရပုဟ်” သာ်ဝွံ သ္ဂးရ။

နဒဒှ်အဆက်လက္ကရဴ ပရေၚ်ပၞာန်သီအဝဵုဂှ် နူကဵုကံၚ်ဇြဳပၞာန် ကၠောန်သ္ပပကီုပရာပ် ဍဵုဍိုက်လဝ် လ္တူညးဍုၚ်ကွာန် အလုံဍုၚ်မွဲတံဂှ် နူကဵုအာဇြဳယာန် ဖျေံလဝ်သ္ဂုတ်သွာတ်ကီုလေဝ် ကံၚ်ဇြဳပၞာန် ဟွံဒ္ဂေတ်ဗက်ပုဟ်ဂှ် ထံက်ထ္ၜးလဝ်ရ။

ကံၚ်ဇြဳပၞာန်ဂှ် နကဵုဗီုပြၚ် လိက်ကသုက် NCA နွံဒၟံၚ်ဗွဲမလုပ်သၞောဝ် ဟွံလီုဏီဂှ် ကၠောန်ဗဒှ်အာ တ္ၚဲကၠောံသၞာံ NCA ကုက္ဍိုပ်သ္ကိုပ်ကောန်ဍုၚ်အရၚ် ဂကောံ EAO တံကဵု ဍုၚ်သ္အာၚ်တံဏီဏောၚ် မဒှ်ရ။

လိက်ကသုက်ဒေါအ်ပန်ပှော် NCA ဂှ်ဝွံ ပ္ဍဲသၞာံ ၂၀၁၅ ဂိတုအံက်တဝ်ဗာ ၁၅ လက်ထက်သမ္မတဥူတုၚ်ဇြုၚ်တေံဂှ် ဂကောံရပ်လွဟ်ကောန်ဍုၚ်အရၚ် ၈ ဂကောံဂှ်မွဲလ္ပာ် အလဵုအသဳ၊ ဒပ်ပၞာန်၊ ကၠတ်ထဝ်ဂှ်မွဲလ္ပာ် ပါလုပ်ထ္ပက်လဝ်စၟတ်တဲရ။

ကြဴနူဂှ်တုဲ ပ္ဍဲလက်ထက်အလဵုအသဳ NLD သၟဝ်ပၠတရဴဒဝ်အံၚ်သာန်သုကျဳ ပ္ဍဲသၞာံ ၂၀၁၈ ဂိတုဖေဖဝ်ဝါရဳ ၁၃ ဂှ် ဗော်ဍုၚ်မန်တၟိကဵု ဗော်သွးဒဳမဝ်ကရေတ်တေတ်လာဟူတံ ပါလုပ်ထ္ပက်လဝ်စၟတ်တဲ ပ္ဍဲလိက်ကသုက် NCA ရ။

ပရိုၚ်−သြၚ်လောန်တိုၚ်(မ်)

ဗီု−MRTV