ကာဘူလ်၊ အံက်တဝ်ဗာ(၁၅)
ဟိုတ်နူကသဳတိချဳတုဲ ညးဒးချိုတ်လဝ် ၜိုန်ရနွံ ၂၄၀၀ ပြၚ်ကီုလေဝ် ဌာနဝန်ဇၞော်စဳမာန်ဖန်ဇန်ဘဲအန္တရာယ်သဘာဝအာဖဂါန်ဂှ် ပလေဝ်ပလေတ်လလောၚ်တြးလဝ် နွံ ၁၀၀၀ ပြၚ်ဟေၚ်ရဂှ် ညးမၞုံအခေါၚ်ဟီုဂး အလဵုအသဳဌာနဝန်ဇၞော်ဂှ် ဟီုလဝ်ရ။
ပ္ဍဲကဵုဟာရေတ် မဒှ်ခရိုၚ်ဒေသန္တရ သ္ကုတ်ပလိုတ်ဂှ် ပ္ဍဲကဵုတ္ၚဲသ္ၚိသဝ်ကဵု တ္ၚဲဗုဒ္ဓဝါ ဒးဒုၚ်လဝ်ဘဲတိချဳ ဂၠိုၚ်ကဵုဝါရ။ ကောန်ဍုၚ်တအ်ဂှ် ဟိုတ်နူဒးဒုၚ်ဒၟံၚ် သီုဘဲဒဏ်ပၞာန်ဂှ်ရ အပံၚ်လၟိဟ်ကွာန်ဗွဲမဂၠိုၚ် ဒးလီုလာ်လဝ်တုဲ ကောန်ဒေသဗွဲမဂၠိုၚ်တအ်လေဝ် ဒးဆုဲပြံၚ် မံၚ်တန်တဴလဝ် ပ္ဍဲဒၞာဲဒေသသ္ၚောဲခြာတအ်ရ။
“လၟိဟ်မၞိဟ်မွဲလ္ၚီပြၚ်ပြၚ် ဒးချိုတ်လဝ်တုဲ လၟိဟ်မၞိဟ် ၂၀၀၀ ပြၚ်ဇီုကပိုက်ဒးလဝ်ဘဲဝပ်ရဂှ် ပၠုပ်လဝ်စရၚ်တုဲ အပံၚ်လၟိဟ်သ္ၚိ ၜိုတ် ၁၃၂၀ ဒးလီုလာ်လဝ်ရ”ဂှ် ဌာနဝန်ဇၞော်စဳမာန်ဖန်ဇန်ဘဲအန္တရာသဘာဝတာလဳဘာန် ဟီုသ္ဂးလဝ်ရ။
“ပရေၚ်ချိုတ်ဂျိုၚ်လလောၚ်တြးလဝ်အခိၚ်တုဲကၠုၚ်ဟွံလအ်တေံဂှ် ဒှ်ဆၜိုတ်တၚ်ချိၚ်ခယျဟေၚ်ရ”ဂှ် ညးတာလျိုၚ်ဝန်ဇၞော်တအ် ဟီုလဝ်ရ။ ပ္ဍဲကဵုတၚ်လလောၚ်တြးဌာနဝန်ဇၞော်ပရေၚ်ထတ်ယိုတ်ဂှ်လေဝ် မၞိဟ် ၁၀၀၀ ပြၚ်ဟေၚ် ဒးချိုတ်လဝ်ရ”ဂှ် ဟီုလဝ်ရ။
ပ္ဍဲကဵုတၚ်လလောၚ်တြးရုၚ်အထံၚ်အရီုဗ္စာရဏာပရေၚ်မၞိဟ်ကုလသမဂ္ဂဂှ်မ္ဂး လၟိဟ်မၞိဟ် ၜိုတ် ၁၃၀၀ ဟေၚ်ဒးချိုတ်လဝ်ရဂှ် ဟီုလဝ်ရ။
ပ္ဍဲကဵုခရိုၚ်ဒေသန္တရ လ္ပာ်ပလိုတ်အာဖဂါန်ဂှ်ဟေၚ် ပ္ဍဲကဵုဂိတုအံက်တဝ်ဗာ စၟတ်တ္ၚဲ (၁၁) ဂှ် တိချဳလဝ်မွဲဝါ မၞိဟ်ဒးချိုတ်လဝ် (၃) တၠတုဲ ဒးလဝ်ဘဲဝပ် (၁၆၄) တၠရဂှ် ဌာနဝန်ဇၞော်စဳမာန်ဖန်ဇန် ဘဲဒဏ်သဘာဝတာလဳဘာန် ဟီုဗပေၚ်လဝ်ရ။
ပ္ဍဲကဵုတ္ၚဲဂှ်ဟေၚ် တိချဳလဝ် ပ္ဍဲကဵုကွာန် (၂၀) ကွာန် ပ္ဍဲလ္ပာ်သ္ကုတ်ဒိုဟ်ဗာယဝ်အာဖဂါန်ရဂှ် ညးပိုၚ်ပြဳအဝဵုအာဖဂါန်တအ် ဟီုလဝ်ရ။ ပ္ဍဲကဵုလိက်ဒုၚ်စဳရေၚ် ကုလသမဂ္ဂဂှ်လေဝ် ပ္ဍဲကဵုခရိုၚ်ဇြေန်ဒါဂျာန် လ္ပာ်ဒိုဟ်ဗာယပ်ဂှ် ပါလုပ်သီုဘာ (၆) ဘာ သ္ၚိဒၟံၚ်ဗ္ဒာဲ ၁၀၀ တၟံကၠံ ဒးလီုလာ်လဝ်ရဂှ် ဓမံက်ထ္ၜးလဝ်ရ။
သၞောတ်မၚ်မွဲပရေၚ်ထတ်ယိုတ်အာဖဂါန် ဒးနိဿဲဗ္ဒဗ္ဒာဲဒၟံၚ် အရီုဗၚ်ကၟိန်ဍုၚ်နာနာပေၚ်ၚ်ဂှ် ပ္ဍဲကဵုပွိုၚ်ၜါသၞာံ ကြဴနူတာလဳဘာန်တအ် သီကေတ်အဝဵုတုဲဂှ် ဒးဆေၚ်ဒၟၚ်မုက်ကဵု ပရေၚ်ဆောံလေၚ်တုဲ အရီုဗၚ်ကၟိန်ဍုၚ်နာနာ မဒှ်ဇုတ်ဓရံၚ်ပရေၚ်ပိုန်ဒြပ်ကၟိန်ဍုၚ်ဂှ်လေဝ် ဒးဒုၚ်ဒေါံဇူလဝ်ရ။
သွက်ဂွံရပ်စပ် အကြေပ်ဂြတ်ညးဗြဴ ကေုာံပရေၚ်ထံက်ရံၚ်ဗ္စာရဏာပရေၚ်မၞိဟ် ဆေၚ်ကဵုဂၠးကဝ်ဂှ် တၚ်ပိုၚ်ခြာတာလဳဘာန်တအ်ဂှ် ဒှ်ကၠုၚ်သွက်ဂွံကလေၚ်ရုပ်သီ အထံက်ပၚ်ပရေၚ်ဘဏ္ဍာ ကၟိန်ဍုၚ်နာနာရဂှ် ကလုတ်တမာန် ကေုာံ ညးပိုၚ်ပြဳအဝဵုပရေၚ်ကဵုအရီုဗၚ်တအ် ဟီုရ။
ကြဴနူကသဳတိချဳလဝ်ပ္ဍဲအာဖဂါန်နေဿတာန်တုဲဂှ် မၞိဟ်ဂၠိုၚ်ကဵုလ္ၚီ ဒးဒှ်လဝ်ညးဟၟဲကဵုသ္ၚိဌာန်ရ။ သွက်ဂွံရီုဗၚ်ကဵု နဒဒှ်ကာတၟေၚ်ဂှ်လေဝ် ဂကောံပရေၚ်အုပ်ဓုပ်ဒေသန္တရတာလဳဘာန်တအ် အာတ်မိက်လဝ်တုဲ အေဂျေန်ဇြဳကဵုအရီုဗၚ်တအ်လေဝ် ကၠောန်သ္ပကဵုဒၟံၚ် ပရေၚ်အာတ်မိက်သြန်ဂအုံတၟိရဂှ် ဂွံတီကေတ်ရ။
Ref – REUTERS
sanlontai