သွက်ဂွံဒက်ပ္တန် ကဝ်တူလေဝ်ဖေဝ်ဒရာယူနေတ်ဂှ် သၠုၚ်ပ္တိုန်အာ အသိၚ်ပၞာန်ဏောၚ် KNU ဟီု

ကဝ်တူလေဝ်၊ နဝ်ဝေမ်ဗာ ၉

ပ္ဍဲကၟိန်ဍုၚ်ပံၚ်ကောံဖေဝ်ဒရာအနာဂတ်ဏံ သွက်ဂွံဒက်ပ္တန်အာ ကဝ်တူလေဝ်ဖေဝ်ဒရာယူနေတ်ဂှ် သၠုၚ်ပ္တိုန်အာအသိၚ်ပၞာန်ဏောၚ်ဂှ် ညးမၞုံအခေါၚ်ဟီုဂး ဗော်သွးကောန်ဂကူကရေၚ် KNU ပဒိုဝ်သဝ်ကလေဝ်သေ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဗော်သွးကောန်ဂကူကရေၚ် KNU ဝွံ ကြဴနူကောန်ကရိတ် မရနုက်ကဵု ၁၇ ဝါတုဲ ကၠောန်ဗဒှ်လဝ် ကောံဓရီုတတိယ ကမ္မတဳကေၚ်ကာဗဟဵု နူဂိတုနဝ်ဝေမ်ဗာ ၂ စဵုကဵု ၅ တုဲကၠုၚ်တေံ ဗွဲမအံၚ်ဇၞးဂှ် ပ္ဍဲဂိတုနဝ်ဝေမ်ဗာ ၆ တေံ KNU လလောၚ်ပ္တိတ်လဝ်ရ။

ပ္ဍဲကဵုကောံဓရီုဏံဂှ် နူကဵုကမ္မတဳမဆေၚ်စပ် ကေုာံ ဌာနနာနာတံ သွက်ဂွံစ ထ္မံက်ရုပ်ရဴ ကုမူဝါဒ၊ ကမၠောန်ပြုပြေၚ်ပလေဝ်ပလေတ် အပ္ဍဲဂကောံ ကေုာံ ပရေၚ်ဂီုကၠီု၊ ပရေၚ်အုပ်ဓုပ်၊ ပရေၚ်ဍုၚ်ကွာန် စပ်ကဵု ပရေၚ်ထ္မံက်ရုပ်ရဴ တၚ်ရန်တၟံ ကဝ်တူလေဝ်ဖေဝ်ဒရာယူနေတ်တံမာန်ဂှ် သ္ပဒတန်သ္ဂုတ်သွာတ်လဝ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

ပဒိုဝ်သဝ်ကလေဝ်သေ ဂှ် သွက်ကဝ်တူလေဝ်ဖေဝ်ဒရာယူနေတ်ဂှ် မ္ၚးနူကဵုပရေၚ်ဍုၚ်ကွာန်၊ ပရေၚ်အုပ်ဓုပ် ကေုာံ ပရေၚ်ဂီုကၠီုတံဂှ် သၠုၚ်ပ္တိုန်ရေၚ်တၠုၚ်အာ လ္ပာ်ပၞာန် အဓိကဏောၚ်ဂှ် ဟီုဂးကၠုၚ်ရ။

“တၚ်အာတ်မိက်ပရေၚ်ဍုၚ်ကွာန်ပိုယ်တံ တၚ်ရန်တၟံပရေၚ်ဍုၚ်ကွာန်ပိုယ်တံဂှ် ဒှ်သၞောတ်ဖေဝ်ဒရာဒဳမဝ်ကရေဇြဳရဏောၚ်။ ကၠာတေံဂှ်တှ်ေ ပိုယ်တံ သဳကၠဳချပ်ဂၞန်ကဵု ဂကောံတၞဟ်သ္အာၚ်တံတုဲ ကေၚ်အာတ်မိက်လဝ်နွံ။ အတိုၚ်ဂလာန် ဥက္ကဌဇၞော်ပိုယ် သဝ်ဘဥူကျဳ ဟီုလဝ် ကံကုသိုလ်ကရေၚ် ကရေၚ်ဒးဖန်ဖက်ဂှ် အခိၚ်လၟုဟ် သွက်ဂွံဖန်ဖက်ကံကုသိုလ်ပိုယ်မာန်ဂှ် နူကဵုညးလဵုမွဲမှ ပိုယ်တံဟွံအာတ်မိက်ရတုဲ ကံကုသိုလ်ဇကုဂှ် ဇကုဖန်ဖက်ကေတ်တုဲ အလဵုဇကုဇကု ကၟိန်ဍုၚ်ဖေဝ်ဒရာ ဖေဝ်ဒရာယူနေတ်ဂှ် သွက်ပိုယ်ဂွံဒက်ပ္တန်အာ မိက်ဂွံသ္ဂးသာ်ဏံတုဲ ပ္ဍဲအရာကၠောန်သာ်ဏံဂှ်လေဝ် ဗွဲအဓိကမ္ဂး ပိုယ်တံ သွက်ဂွံသၠုၚ်ပ္တိုန်အာ လ္ပာ်ပရေၚ်ပၞာန် မပ္တံကဵု ပရေၚ်ဂီုကၠီု၊ ပရေၚ်အုပ်ဓုပ် ကေုာံ ပရေၚ်ဍုၚ်ကွာန်တံဂှ် မိက်ဂွံဟီုအဓိကရ“ သာ်ဝွံ ပဒိုဝ်သဝ်ကလေဝ်သေ ဟီုရ။

နကဵု KNU ကဵုအာက္ဍိုပ်ရေၚ်တၠုၚ်အာ ညံၚ်ကဝ်တူလေဝ်ဖေဝ်ဒရာယူနေတ်မွဲ မဒ္ဂေတ်ဗက်သၞောတ်ဒဳမဝ်ကရေဇြဳ မၞုံကဵုအခေါၚ်စၞောန်ပျးအပိုၚ် ဂွံမံက်ဂတဝ်ကၠုၚ်ပြာပြာကတ်တ်ဏောၚ်ဂှ်တုဲ ဒဒှ်ရဒက်ပ္တန်အာ ကဝ်တူလေဝ်ဖေဝ်ဒရာယူနေတ်ဂှ် ပ္ဍဲကဵုပေါဲသောၚ်ကလးလိက်ပရိုၚ် မကၠောန်ဗဒှ်လဝ် အပ္ဍဲဂိတုအဝ်ဂါတ်တုဲကၠုၚ်တေံဂှ် သ္ကိုပ်အုပ်ဓုပ်ကာနာနာ KNU ပဒိုဝ်သဝ်တာဒိုဝ်မှူ ဟီုဂးလဝ်ရ။

ပြဟ်ဟ်ဏံ ပ္ဍဲကဵုဒပ်မဟာ ၃၊ ဒပ်မဟာ ၅၊ ဒပ်မဟာ ၆ မၞုံအပ္ဍဲတိဍာ်အုပ်ဓုပ် KNU တံဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံပၠန်ဂတးတံဂှ် ပေါဲဗ္တိုက်ဆေၚ်မုက်တံ က္တဵုဒှ်ဒၟံၚ်ရ။

တုဲကၠုၚ် ပ္ဍဲတ္ၚဲအကြာတေံဂှ်လေဝ် ဂကောံဒပ်ပံၚ်ကောံပၠန်ဂတးတံ လုပ်စိုပ်ဗ္တိုက်လဝ် ဗ္ဒိုပ်ဒပ်ဂမၠိုၚ် ကေုာံ ဒၞါဲဒပ်ကံၚ်ဇြဳပၞာန်တံ မဖျေံလဝ်ဒပ် ဗ္ဒါဲပယျဵုသေံ−ဗၟာကဵု ဍုၚ်လှာဒကှ် တိဍာ်ဒပ်မဟာ ၆ ဂှ်တုဲ ပရေၚ်ဇီုကပိုက်ချိုတ်သီုၜါလ္ပာ်တံ နွံလဝ်ရ။

ပ္ဍဲကဵုတိဍာ်အုပ်ဓုပ်ကဝ်တူလေဝ်ဂှ် အပ္ဍဲသၞာံဏံ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံဂှ် ပေါဲဗ္တိုက်ၜါလ္ပာ် က္တဵုဒှ်လဝ် စဵုကဵု ၃၅၀၀ ဝါပြၚ်တုဲ ကောန်ဒပ်ကံၚ်ဇြဳပၞာန် ဂၠိုၚ်ကဵုလ္ၚီ ချိုတ်အာလဝ်ရောၚ် ဂွံတီကေတ် အတိုၚ်စရၚ်ပေါဲဗ္တိုက်သရောပ် KNU မလလောၚ်ပ္တိတ်လဝ် အပ္ဍဲဂိတုအံက်တဝ်ဗာ တုဲကၠုၚ်တေံဂှ်ရ။

ပရိုၚ်−သြၚ်လောန်တိုၚ်(မ်)

ဗီု−KNU