ပ္ဍဲကျာ်ထဝ် ရဲကဵုပရိုၚ်ဗၠာဲသၟိၚ်မွဲတၠ ဒးဒုၚ်ပန်ဂစိုတ်

ကျာ်ထဝ်၊ နဝ်ဝေမ်ဗာ (၉)

ပ္ဍဲတွဵုရးဍုၚ်မန်၊ ပွိုၚ်ဍုၚ်ကျာ်ထဝ်၊ ပ္ဍဲကွာန်မယာန်ချံၚ်ဂှ် ပ္ဍဲဂိတုနဝ်ဝေမ်ဗာ ၇ တေံ အခိၚ်ဗ္တံၜိုတ် ၉ နာဍဳဂှ် ရဲကဵုပရိုၚ်ဗၠာဲသၟိၚ်မွဲတၠ ဒးဒုၚ်ပန်ဂစိုတ်လဝ် ကဵုသေနာတ်ရောၚ် ဂွံတီကေတ် ဇရေၚ်ညးဒေသတံရ။

ကိုဝ်လောန်ဝေ မၞိဟ်ကဵုပရိုၚ်ဗၠာဲသၟိၚ် အာယုက် ၄၃ သၞာံဂှ်ဝွံ အခိၚ်စဴကၠုၚ်သ္ၚိ နကဵုကွဳလိုန်ဓာတ် မွဲတၠဓဝ် အတိုၚ်ဂၠံၚ် ခလောန်−သောတ်ပနူ ပွိုၚ်ဍုၚ်ကျာ်ထဝ်ဂှ် မၞိဟ်ဟွံတီယၟု ၂ တၠ မၚ်ဒၟံၚ်တုဲ ပန်ဂစိုတ်လဝ် ကဵုသေနာတ်ရ။

ဟိုတ်နူဒးဒုၚ်ပန်လဝ်ကဵုသေနာတ်ဂှ်ရ ကိုဝ်လောန်ဝေဝွံ ပ္ဍဲကဵုကအ်၊ တဲ ကေုာံ ထာၚ်ဒဳတံဂှ် ကလိဂွံလဝ်ဝပ်ဒးမကမ်တုဲ ပလံၚ်ဗစိုပ်လဝ် ရုၚ်ဂဥုဲညးဍုၚ်ကွာန် ပွိုၚ်ဍုၚ်ကျာ်ထဝ်ဂှ် ဂွံတီကေတ်ရ။

အတိုၚ်ဂလာန်ညးဒေသတံဂှ်မ္ဂး ကိုဝ်လောန်ဝေဝွံ အပ္ဍဲကာလသီအဝဵုဏံ အာကၠုၚ်ဒၟံၚ် ကရောံကောန်ဒပ်ကံၚ်ဇြဳပၞာန်တံ နွံဒၟံၚ်တုဲ ကၠောန်သ္ပဒၟံၚ် သီုကဵုထံၚ်ပရိုၚ် ဂကောံဒပ်စဵုဒၞါညးဍုၚ်ကွာန် PDF တံဂှ်လေဝ် ဟီုဂးလဝ်ရ။

ပ္ဍဲကဵုအကံက်ထလဳဂရာမ် ရဲထံက်ဂလာန်ဒပ်ပၞာန်တံဂှ် ဗော်သွးကောန်ဂကူကရေၚ် KNU ကဵု PDF တံ ကၠုၚ်စိုပ်ပန်ပှော်ဏာလဝ် ကိုဝ်လောန်ဝေဏောၚ်ဂှ် တြးဒၟံၚ်ဝါဒတံ နွံဒၟံၚ်ရ။

ညးဒုၚ်တာလျိုၚ် ဂကောံဒပ်စဵုဒၞါညးဍုၚ်ကွာန်ခရိုၚ်သဓီု PDF ဂှ် ပန်ပှော်လဝ် ကိုဝ်လောန်ဝေဂှ် ဂကောံညးတံ ဟွံသေၚ်ပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲပွိုၚ်ဍုၚ်ကျာ်ထဝ် အပ္ဍဲကာလဒပ်ပၞာန်သီအဝဵုဏံ မ္ၚးနူကဵုဒပ်ကံၚ်ဇြဳပၞာန်ကဵု ကောန်ဒပ်ဗၠာဲသၟိၚ်တံဂှ် သ္ကိုပ်အုပ်ဓုပ်တံကဵု ရဲကဵုပရိုၚ်တံဂှ်လေဝ် ဒးဒုၚ်ပန်ဂစိုတ်ဒၟံၚ် မွဲဏှမွဲဏှတုဲ ကံၚ်ဇြဳပၞာန် ပ္တိတ်လဝ်အမိၚ်ဒေသန္တရ မၞိဟ်တြုံၜါတၠ ညံၚ်ဂွိုအ်ဍိုက်ကွဳလိုန်ဓာတ်တုပ်ပ်ရ။

ပရိုၚ်−သြၚ်လောန်တိုၚ်(မ်)

ဗီု−CJ