ကံၚ်ဇြဳပၞာန် ပ္ကောံကၠုၚ်ကောန်ထံၚ်တံ သွက်ဂွံကဵုလုပ်ပၞာန်မာန်

မတ်မလီု၊ အံက်တဝ်ဗာ ၃၁

ပ္ဍဲကဵုထံၚ်စာတ် နွံအလုံဍုၚ်မွဲဂှ် လ္ပာ်ကံၚ်ဇြဳပၞာန် ကံက်ဒၟံၚ်တၚ်နၚ် ညံၚ်ရဴစရၚ်လၟိဟ်မၞိဟ်သ္ဂာဗ္တံဂှ်ဝွံ ဒှ်သွက်ဂွံပ္ကောံကောန်ပၞာန် ဒှ်မာန်ဂှ် ညးမၚ်မွဲရီုဗၚ်ကောန်ထံၚ်ပရေၚ်ဍုၚ်ကွာန်တံကဵု ဂကောံဇြဟတ်ပၠန်ဂတးတံ သ္ၚဳဂၠိပ်လဝ်ရ။

ကံၚ်ဇြဳပၞာန်ဝွံ စနူဂိတုသေပ်တေမ်ဗာတုဲ ပ္ဍဲကဵုထံၚ်စာတ်အလုံဍုၚ်မွဲဂှ် ဗက်ကံက်ဒၟံၚ် တၚ်နၚ်ပူဂဵုကောန်ထံၚ်ဂမၠိုၚ် မပ္တံကဵုယၟု၊ အာယုက်၊ ဍာ်ဒကေဝ်ပညာ၊ ပရေၚ်ထတ်ယုက် ခိုဟ်၊ဟွံခိုဟ်တံ ဗွဲလစှ်ေရ။

အတိုၚ်ဇာဇၞိက်ကောန်ထံၚ်ပရေၚ်ဍုၚ်ကွာန် စပ်ကဵုအလုံဍုၚ်ဗၟာ PPNM ဂှ်မ္ဂး ပ္ဍဲအရာကံက်တၚ်နၚ် ဇရေၚ်ကောန်ထံၚ်တံဂှ် စွံအဓိက သၟာန်ဒၟံၚ် ယၟုမ၊ အာယုက်၊ ဂၞန်တၞးကာဒ်ကောန်ဍုၚ်၊ ဌာန်ဒၟံၚ်၊ အိန်ထံၚ် နွံ၊ ဟွံမွဲတံဂှ်တုဲ ထံၚ်မွဲကဵုမွဲ ဟွံတုပ်ပုဟ်ဂှ် သ္ဂးရ။

ကောန်ထံၚ်ဒးဒၟံၚ်ထံၚ် ပ္ဍဲကဵုထံၚ်စာတ်တံဂှ် နူစဒးထံၚ်တေံဂှ်ရ ကံက်လဝ်တၚ်နၚ်ပူဂဵု ၃၂ တၚ် တုဲတုဲဂှ်ရ စပ်ကဵုကံက်ကၠုၚ်ဒၟံၚ် တၚ်နၚ်လစှ်ေသာ်ဏံတုဲ အကြာကောန်ထံၚ်တံ ပရေၚ်ဒှ်ဓဝိၚ်တံ နွံဒၟံၚ်ရ။

ကိုဝ်တိုက်ထောန်ဥူ ညးမၞုံအခေါၚ်ဟီုဂး PPNM ဂှ်တှ်ေ ကံၚ်ဇြဳပၞာန် ကံက်ဒၟံၚ်တၚ်နၚ် လ္တူကောန်ထံၚ်တံဂှ်ဝွံ ရပ်စပ်အာ ပ္ဍဲအရာဂၠါဲပရဲပရေၚ်ဍုၚ်ကွာန် ဟွံသေၚ်မ္ဂး ကဵုကောန်ထံၚ်တံ လုပ်ကၠုၚ်ပၞာန်တံ ကၠောန်ကၠုၚ်မာန်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ ကံက်ကၠုၚ်တၚ်နၚ်ကောန်ထံၚ်တံဂှ်တှ်ေ ရပ်စပ်တၚ်နၚ်ဒေတာညးတံတုဲ ကံၚ်ဇြဳပၞာန် ပ္ဍဲအရာဂၠါဲကၠုၚ်ပရဲပရေၚ်ဍုၚ်ကွာန် ဟွံသေၚ်မ္ဂး ပ္ဍဲကဵုပေါဲရုဲမာဲဂှ် ဖေက်ရပ်စပ်အာဒၞါဲဏံဂှ် နကဵုကောန်ထံၚ်ပရေၚ်ဍုၚ်ကွာန်ဂမၠိုၚ် ဂွိၚ်ဒၟံၚ်နွံတုဲ နကဵုကောန်ထံၚ်ရာဇဝတ်တံဂှ်တှ်ေ ဖအောန်ဖျေံကဵု ဒုဟ်ဒဏ်ညးတံ ဒးဒုၚ်ဒၟံၚ်တံဂှ်တုဲမှ ဒှ်ဗီုပြၚ်ကဵုလုပ်ပၞာန်ဏောၚ်။ အရာမချိၚ်ခယျဒၟံၚ် ကၠောန်ကၠုၚ်မာန်တံဂှ်လေဝ် အပ္ဍဲတေံ နွံဒၟံၚ်ဏောၚ်” သာ်ဝွံ သ္ဂးရ။

မွဲလ္ပာ်ဂှ်ပၠန် ကံၚ်ဇြဳပၞာန်ဝွံ ကြဴနူဒပ်ပၞာန်သီအဝဵုတုဲ ဟိုတ်နူဍုၚ်သ္အာၚ်တံ ကၟာတ်လဒဵုကေတ်အရေဝ်တံတုဲ သၠုၚ်ပ္တိုန်လဝ် ပရေၚ်ဆက်ဆောံ ကုဍုၚ်ရုယှာတုဲ အရာမပံၚ်တောဲရေၚ်တၠုၚ် မစှ်ေကဵုမဟာဗျူဟာတံလေဝ် ကၠောန်ၜိုတ်ဒၟံၚ်ရ။

ရုယှာ ဝေၚ်ကၠုၚ်ပၞာန်သၠိုၚ်လုပ်ၜက်ၜေတ် ကုယူကရုၚ်ဂှ်ဝွံ အပ္ဍဲပေါဲဗ္တိုက်ဂှ် ဟိုတ်နူဇြဟတ်ပၞာန်လေၚ်ဒိုက်ကၠုၚ်တုဲ ဗလးကဵုကောန်ထံၚ်တံဒုဟ်ဒဏ်တုဲ ရပ်စပ်ကၠုၚ်ဒၟံၚ် နဲကဲပကောံကောန်ပၞာန်တံဂှ်ရ လ္ပာ်ကံၚ်ဇြဳပၞာန် ကၠောန်ကၠုၚ်အတိုၚ်ရုယှာမာန်ရောၚ် သ္ၚဳဂၠိပ်ဒၟံၚ်တံလေဝ် နွံဒၟံၚ်ရ။

ကိုဝ်အေမေန်ထောန် ညးဒုၚ်တာလျိုၚ် ခရိုၚ်သဓီု PDF ဂှ်တှ်ေ နကဵုဟိုတ်စရၚ်လၟိဟ်မၞိဟ်ဂှ် ကံက်ကေတ်ဒၟံၚ်တၚ်နၚ်တံဂှ်ဝွံ ကဵုကောန်ထံၚ်ထတ်တ်ယုက်က်တံ လုပ်ကၠုၚ်ပၞာန် ဗွဲအနိၚ်အပိုၚ်မာန်ရောၚ် ဟီုရ။

“နကဵုအဲတှ်ေ ဍေံတံ စၟဳတ်ကံက်ဒၟံၚ် စရၚ်ကောန်ထံၚ်ထတ်တ်ယုက်က်တံဂှ် ညာတ်ကေတ်ရ။ နကဵုကံၚ်ဇြဳပၞာန်ဂှ်တှ်ေ အလုံဍုၚ်မွဲ ဒးပံက်ဒၟံၚ် မုက်ပၞာန်ဒိုဟ်ဇဳ ဒးကၠောန်ဒၟံၚ် ပၞာန်ဒုၚ်တံရ။ တုဲပၠန် ဇြဟတ်တံဂှ်လေဝ် ယအ်စှ်ေကၠုၚ် တၟာဂလိုၚ်ရ။ ဟိုတ်ဂှ်ရ ကၞောတ်တဲ ဒှ်ကၠုၚ်အကာဲအရာ ကဵုကောန်ထံၚ်ပရေၚ်ထတ်ယုက်ခိုဟ်တံ ယိုက်လျိုၚ်ပၞာန် ဗွဲအနိၚ်အပိုၚ်ဏောၚ်ဂှ် ညာတ်ကေတ်ရ” သာ်ဝွံ သ္ဂးရ။

သ္အာၚ်နူဂှ်ပၠန် ကံၚ်ဇြဳပၞာန်ဝွံ ပ္ဍဲကဵုပေါဲဗ္တိုက် က္တဵုဒှ်ဒၟံၚ် အလုံဍုၚ်မွဲဂှ် ဟိုတ်နူကောန်ဒပ်ညးတံ ဇီုကပိုက်ချိုတ်အာ ဂၠိုၚ်ဒၟံၚ်ဂှ်ရ နူကဵုဒိုဟ်ဇဳ ဒးပကောံဒၟံၚ်ကောန်ပၞာန်တံ ဗွဲအနိၚ်အပိုၚ်တုဲ နကဵုညးဍုၚ်ကွာန်တံ သွက်ဂွံစွံသတိအိုတ်ဂှ် ညးဖ္တိုက်ဖ္အောဝ်လဝ်ရ။

အတိုၚ်လိက်ဒုၚ်စဳရေၚ် ဂကောံမၚ်မွဲရီုဗၚ် ကောန်ထံၚ်ပရေၚ်ဍုၚ်ကွာန် AAPP ဂှ်မ္ဂး အပ္ဍဲကာလသီအဝဵုဏံ အလုံဍုၚ်မွဲ မၞိဟ်ဒးဒုၚ်ရပ် ၂၇၀၀၀ ပြၚ် နွံဒၟံၚ်တုဲ ပ္ဍဲကဵုဏံ ၂၀၀၀၀ ပြၚ် ဆက်ဒးဒုၚ်ရပ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−MOI