ကောန်ဒပ်ကံၚ်ဇြဳပၞာန် နူတံဒပ်ဖျေံသ္ဇိုၚ်ဖေဝ်ခုမ်မွဲတၠ လုပ်စိုပ်ကၠုၚ်ဖျေံလဝ်လွဟ် သီုလွဟ်မကမ်ပေၚ်ၚ်

​

ဖေဝ်ခုမ် – နဝ်ဝေမ်ဗာ(၉)

ကောန်ဒပ်ကံၚ်ဇြဳပၞာန် နူတံဒပ် ခ.မ.ရ ၄၂၂ ဖျေံသ္ဇိုၚ်ဍုၚ်ဖေဝ်ခုမ်၊ တွဵုရးကရေၚ်ဍာဲမွဲတၠ သီုလွဟ်လက်နက်မကမ်ပေၚ်ၚ် လုပ်စိုပ်ကၠုၚ်ဖျေံလဝ်လွဟ်ရဂှ် PEKHON PDF -2 (B-1006) လလောၚ်တြးလဝ် ပရိုၚ်ရ။

ပ္ဍဲဂိတုနဝ်ဝေမ်ဗာ စၟတ်တ္ၚဲ (၇) တုဲကၠုၚ်တေံဂှ် ဃောရေၚ်တၠုၚ်ဒၟံၚ် ပရေၚ်ဂီုကၠီု ဂၠံၚ်ပလံၚ်ဗစိုပ်ဒပ်ကံၚ်ဇြဳပၞာန်တအ် ပ္ဍဲဒၞာဲမုက်ပၞာန် တွဵုရးသေံသၟဝ်ကျာဂှ် ဂြိပ်ကၠုၚ်လဝ်တုဲ လုပ်ဖျေံလဝ်လွဟ်ရ။

ကောန်ဒပ်ကံၚ်ဇြဳပၞာန် လုပ်စိုပ်ကၠုၚ်ဖျေံလဝ်လွဟ်ဂှ် ဒပ်လ္ပာ်ဗိုလ်တထောၚ် ဖျေံကဵုလဝ် လာဘ်သြန်တုဲ မၚ်မွဲကဵုလဝ်ခိုဟ်ဟ်ကီု ပ္ဍဲကဵုဂိတုသေပ်တေမ်ဗာတေံလေဝ် ကောန်ဒပ်ကံၚ်ဇြဳပၞာန် (၃) တၠ လုပ်စိုပ်ကၠုၚ်ဖျေံလဝ်လွဟ် ဇရေၚ် PEKHON PDF -2 (B-1006) သီုလွဟ်လက်နက်မကမ် ပေၚ်ၚ်ရဂှ် ဂွံတီကေတ်လဝ်ရ။

ကြဴနူဒပ်ပၞာန် သီကေတ်အဝဵုကၟိန်ဍုၚ်ဗၟာတုဲ သ္ကုတ်လကြဴဏံ ကောန်ဒပ်ပၞာန် ကေုာံကောန်ဒပ်ဗၠာဲသၟိၚ်တအ် ကၠုၚ်ပံၚ်တောဲလဝ်ကဵု ညးဍုၚ်ကွာန်တအ် ၁၅၀၀၀ ပြၚ် နွံကၠုၚ်ရဂှ် ဂွံတီကေတ် အတိုၚ်တၚ်လလောၚ်တြး NUG ရ။

ညးလ္ၚတ်သ္ၚဳဂၠိပ် ပ္ဍဲဒပ်ပၞာန်တအ်ကဵု ညးရီုဗၚ်ကဵုဒၟံၚ် CDM တအ်ဂှ်လေဝ် ဟိုတ်နူဒပ်ကံၚ်ဇြဳပၞာန် ဒးဂိဒၟံၚ် ပ္ဍဲပေါဲဗတိုက်ဗလးမုက်တိတအ်တုဲ မၞိဟ်ကၠုၚ်ပံၚ်တောဲလဝ်ကဵု ညးဍုၚ်ကွာန်တအ် ဂၠိုၚ်တိုန်ကၠုၚ်မာန်ဒၟံၚ်ရဂှ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။

ပရိုၚ် – သြၚ်လောန်တိုၚ်မ်

ဗီု – PDF-ဖေဝ်ခုမ်