ညးမိက်ဂွံက္လေၚ်ကေတ်သြန် နူလိက်ကသုက်တိုက်သြန် NUG တအ်ဂှ် က္လေၚ်ကဵုအာရောၚ် ကဵုလဝ်သမ္တီ

မတ်မလီု – နဝ်ဝေမ်ဗာ(၁၀)

လိက်ကသုက်တိုက်သြန် ရာန်ကေတ်လဝ် နူအလဵုအသဳညဳသၟဟ်ကောန်ဂကူ NUG အခိၚ်ပေၚ်ကၠုၚ်ပွိုၚ် (၂) သၞာံဂှ် ကလေၚ်ကဵုအာ ညးမိက်ဂွံက္လေၚ်ကေတ်သြန်တအ် ဗွဲမကိတ်ညဳကဵုစေဝ်ပၞောန် ပါလုပ်ဒၟံၚ် ပ္ဍဲလိက်ကသုက်တအ်ရောၚ်ဂှ် ဌာနဝန်ဇၞော်ပရေၚ်ဘဏ္ဍ ကေုာံ ပရေၚ်ဓလိုက်တမ်ရိုဟ် လလောၚ်တြးလဝ်ပရိုၚ်ရ။

တ္ၚဲဏံ ပ္ဍဲဂိတုနဝ်ဝေမ်ဗာ စၟတ်တ္ၚဲ (၉) ဓမံက်ထ္ၜးလဝ် ပ္ဍဲကဵုတၚ်လလောၚ်တြး ကဵုလဝ်သမ္တီ ကုညးဍုၚ်ကွာန်ပၠန်ဂတး နူကဵုအလုံမွဲဂၠးကဝ် ရာန်ကေတ်လဝ် လိက်သုက်တိုက်သြန်အလဵုအသဳတအ်ရ။

လိက်ကသုက်တိုက်သြန်တအ်ဂှ် စသွံတြးလဝ် ပ္ဍဲသၞာံ ၂၀၂၁ ဂိတုနဝ်ဝေမ်ဗာ စၟတ်တ္ၚဲ (၂၂) တေံတုဲ လိက်ကသုက်တိုက်သြန် ရာန်ကေတ်လဝ် နူအခိၚ်ပြဟ်ဟ်တေံဂှ် ပ္ဍဲဂိတုဒဳဇြေမ်ဗာ စၟတ်တ္ၚဲ (၁) သၞာံ ၂၀၂၃ ဏံ ပေၚ်ကၠုၚ်အာယုက်ၜါသၞာံရ။

ၜိုန်ရအာယုက် ပေၚ် (၂) သၞာံကီုလေဝ် သွက်ညးရာန်ကေတ်လဝ် အစဳဇန်သွက်ဂွံကလေၚ်နုက်ကေတ် ဟၟဲဏီတအ်ဂှ် ကဵုအာ နနဲကဲဂၠံၚ်တရ ၜါနဲတုဲ နဲကဲဂမၠိုၚ်တအ်ဂှ် ထပ်ဂလိုၚ်ပတိုန်လဝ်အာယုက်ကီု သီုကဵုပိုၚ်ခြာစၟတ်သမ္တီကဵု နဒဒှ်ဂအာၚ်ကၠအ် အလဵုအသဳ NUG သွံကဵုဒၟံၚ်၊ ဗ္ဒမ်တိုက်တအ်ကဵု ပရေၚ်ပိုၚ်ပြဳယှေဝ်ယာတအ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

သ္အာၚ်နူဂှ်ပၠန် တၚ်ဂၞၚ်သောဲသောဲဗြောဲဗြောဲတအ်ဂှ်လေဝ် နူကဵုအဳမေလ်ညးရာန်ကေတ်လတ်လိက်ကသုက်တိုက်သြန်တအ်မွဲကဆံၚ် ကဵုအာသမ္တီရောၚ်ဂှ် ဂွံတီကေတ်ရ။

နကဵုအလဵုအသဳညဳသၟဟ်ကောန်ဂကူ NUG သီုသ္ပဏာရှ်ေသှ်ေ ကုညးဍုၚ်ကွာန်ပၠန်ဂတး ရာန်ကေတ်ဓလိုက်လဝ်တမ်ရိုဟ် လိက်ကသုက်အိက်ဟၟဲ နကဵုစိုတ်ဓာတ်အံၚ်ဇၞးတအ်ဂှ်တုဲ စဵုကဵုဂွံပေါဲအံၚ်ဇၞး သွက်ဂွံဆက်ကဵုအာအထံက်အရီု နကဵုဇဲလွဳ ဟွံဆုတ်ကလေၚ်ဂှ်လေဝ် လၟၚ်ဒုၚ်လဝ်ဂုဏ်ရ။

အလဵုအသဳ NUG ဂှ် လိက်ကသုက်တိုက်သြန်ဏံ မၞိဟ်မွဲမွဲကီုကဵုဒှ် ဗက်ကဵုဂကောံကဵုဒှ် ညံၚ်ဂွံပံၚ်ကောံရာန်ကေတ်မာန် သွံကဵုလဝ်ရ။

သြန်ဂအုံဘဏ္ဍာ သွံတြးလဝ် နကဵုရမျှာၚ်ကြဵုဇာ တၠအဝဵုပၞာန်ရိုဟ်ကၞက်ဂွံပိုတ် ရာန်ကေတ်လိက်ကသုက်တိုက်သြန်အိုတ်စိုအ် တအ်ဂှ် ပ္ဍဲအရာကေတ်ဒၟံၚ်ပေါဲအံၚ်ဇၞး ပၠန်ဂတးက္ညၚ် ပ္ဍဲအခိၚ်တ္ၚဲဏံ ဒှ်ဒၟံၚ်ဇြဟတ်အဓိကမွဲတန် ဒှ်ဒၟံၚ်အထံက်အရီု စိုပ်တရဴရဂှ် ဌာနဝန်ဇၞော် ကဵုလဝ်သမ္တီရ။

ပရိုၚ် – သြၚ်လောန်တိုၚ်မ်

ဗီု – MOPFI