လံၚ်လုၚ်၊ နဝ်ဝေမ်ဗာ (၁၀)
ရးဒေသဇၞော်တၞၚ်သြဳ၊ ပွိုၚ်ဍုၚ်လံၚ်လုၚ်၊ ပ္ဍဲဗ္ဒာဲကွာန်ကယေန်ဂျဳဂှ် သ္ပတံနူ ဂိတုနဝ်ဝေမ်ဗာ စၟတ်တ္ၚဲ (၉) အခိၚ်နူဂယး (၈)နာဍဳတုဲ အကြာဒပ်ကံၚ်ဇြဳပၞာန်ကဵု ဂကောံဇြတ်ပၠန်ဂတးတအ် ပေါဲဗတိုက်က္တဵုဒှ်ဒၟံၚ်ရဂှ် ဂွံတီကေတ် နူဒပ်ပၠန်ဂတးဒေသတအ်ရ။
ကရောၚ်ပၞာန်ကံၚ်ဇြဳပၞာန် ဇြဟတ်ဒပ် နွံ ၆၀ ပြၚ်ဂှ် နူကဵုကွာန်ကျောက်ဇြေန် ဟိုတ်နူလုပ်စိုပ်ကၠုၚ် ပ္ဍဲကွာန်ကယေန်ဂျဳဂှ်ရ ပေါဲဗတိုက်ၜါလ္ပာ် က္တဵုဒှ်လဝ်ရ။
ပ္ဍဲကဵုပေါဲဗတိုက်က္တဵုဒှ်လဝ် လအ်ၜိုတ်ပွိုၚ်မွဲနာဍဳဂှ် ကောန်ဒပ်ကံၚ်ဇြဳပၞာန် ဗ္ဒာဲ (၁၀) တၠ ဇီုကပိုက် ဒးချိုတ်လဝ် နွံမာန်ရဂှ် ညးတာလျိုၚ်ဒပ်စဵုဒၞာ ပွိုၚ်ဍုၚ်လံၚ်လုပ် LLPDF မွဲတၠဂှ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ကရောၚ်ပၞာန် လုပ်ကၠုၚ်လ္ပာ်ကွာန်ကယေန်ဂျဳရောၚ် ဂွံလဝ်ပရိုၚ်တုဲ ဒပ်ပံၚ်ကောံစဵုဒၞာဒေသတအ် မၚ်ဗတိုက်လဝ်ရ။
ကြဴဴနူပေါဲဗတိုက်ၜါလ္ပာ် ဒှ်လဝ်တုဲ ဒပ်ကံၚ်ဇြဳပၞာန်ဒးဂိလဝ်ဂှ် ကလေၚ်ဆုတ်တိတ်အာ လ္ပာ်ကွာန်ကျောက်ဇြေန်တုဲ ဖျေံလဝ်ဗဒိုပ် ပ္ဍဲကွာန်ရဂှ် ကောန်ဒပ်ဂကောံဇြဟတ်ပၠန်ဂတးတအ် ဟီုလဝ်ရ။
ဂကောံဇြဟတ်ပၠန်ဂတးတအ်ဂှ်မ္ဂး ဟိုတ်နူကရောၚ်ပၞာန်ကံၚ်ဇြဳပၞာန် နွံဒၟံၚ်တုဲ ပရေၚ်ပၞာန်ၜါလ္ပာ်ကြံၚ်မ္ၚိုဟ်ဒၟံၚ်ဂှ်ရ အခိၚ်ဟွံရုဲ ပေါဲဗတိုက်က္လေၚ်ဒှ်မာန်ဒၟံၚ်ရဂှ် ကဵုလဝ်သတိရ။
ဟိုတ်နူပေါဲဗတိုက်ပြဟ်ဟ်ဏံတုဲ ညးဒေသ နူကွာန်မပ္တံကဵု တေန်ဗဝ်ဇြုက်၊ ပျေန်ဂျဳ၊ ကယေန်ဂျဳ၊ ကာမ်ပနဳတအ် ဒးဂြိပ်ဒဴပါဲဓလေတ်ဒၟံၚ် ပ္ဍဲဒၞာဲဗၠးဘဲရဂှ် ဂွံတီကေတ် နူညးဒေသတအ်ရ။
ကရောၚ်ပၞာန်ဂှ် သ္ပတံနူ ဂိတုနဝ်ဝေမ်ဗာစၟတ်တ္ၚဲ (၁) တုဲ ထ္ပက်လုပ်ကၠုၚ်ကရောၚ်ပၞာန် ပ္ဍဲကွာန် မၞုံပ္ဍဲပွိုၚ်ဍုၚ်လံၚ်လုၚ်တအ်ရ။
ပ္ဍဲပွိုၚ်ဍုၚ်လံၚ်လုၚ် ပ္ဍဲကဵုဂိတုအံက်တဝ်ဗာ တုဲကၠုၚ်တေံ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတအ် ပေါဲဗတိုက်ၜါလ္ပာ် ဒှ်လဝ်ဟွံအောန်နူ (၁၀) ဝါရ ဂွံတီကေတ် အတိုၚ်တၚ်လလောၚ်တြး ဂကောံသုတေသန ပ္ဍဲဒေသတအ်ရ။
ပရိုၚ် – သြၚ်လောန်တိုၚ်မ်
ဗီု – ပကဖတၞၚ်သြဳ
sanlontai