ကွာန်လေတ်တောၚ်ၚေဝ် ရးသေတ်ဂါၚ် ဒးဒုၚ်စံၚ်လဝ် သီုအလုံကွာန်မွဲ

ပလေဝ် – နဝ်ဝေမ်ဗာ(၁၀)

ရးဒေသသေတ်ဂါၚ်၊ ပွိုၚ်ဍုုၚ်ပလေဝ် ကွာန်လေတ်တောၚ်ၚေဝ်ဂှ် ဟိုတ်နူကံၚ်ဇြဳပၞာန် စံၚ်ပလီုလဝ် သီုအလုံကွာန်မွဲတုဲ လၟိဟ်သ္ၚိ ၆၀ ပြၚ် တူပၟတ် ဒးလီုလာ်လဝ်ရဂှ် ABSDF Column -3 ဟီုကဵု ဌာန်ပရိုၚ်သြၚ်လောန်တိုၚ်မ်ရ။

ပ္ဍဲဂိတုနဝ်ဝေမ်ဗာ စၟတ်တ္ၚဲ (၈) တုဲကၠုၚ်တေံဂှ် ပွေက်ဂြိပ်အာဂတ ရေၚ်ယာန်ကွဳစက် ဒပ်ကံၚ်ဇြဳပၞာန် နူကဵုပွိုၚ်ဍုၚ်ပလေဝ် တိတ်ကၠုၚ် လ္ပာ်ယေန်မာပေန်ဂှ် ဂကောံဇြဟတ်ပၠန်ဂတးတအ် ဗတိုက်လဝ်တုဲဂှ် ဟိုတ်နူဒးဂိလဝ်ဂှ်ရ စံၚ်ပလီုလဝ် သီုအလုံကွာန်မွဲရ။

ကွာန်လေတ်တောၚ်ၚေဝ်ဂှ် ဟိုတ်နူလၟိဟ်သ္ၚိ နွံဗ္ဒာဲ ၁၀၀ တုဲ ဒးဒုၚ်စံၚ်လဝ် သီုအလုံံကွာန်မွဲဂှ်ရ ညးဍုၚ်ကွာန်တအ် ဒးပလိုတ်လဝ်ပၟတ် မွဲကရောံကဵုဂကောံဒပ်စဵုဒၞာတအ်ရဂှ် ဂွံတီကေတ်ရ။

ကြဴနူဂကောံဇြဟတ်ပၠန်ဂတးတအ် ဗတိုက်လဝ် ရေၚ်ယာဉ်ကွဳစက်ကံၚ်ဇြဳပၞာန်တုဲဂှ် လ္ပာ်ကောန်ဒပ်ကံၚ်ဇြဳပၞာန် ဒးချိုတ်လဝ် (၂) တၠရဂှ် ABSDF Column -3 လလောၚ်တြလဝ် ပရိုၚ်ရ။

ပွေက်ဂတ ကွာ်ဗက်ကၠုၚ်ဂီုကၠီု ရေၚ်ယာဉ်ကွဳစက်ဂှ်ကဵု ဒပ်ပၠန်ဂတးတအ် ဒှ်လဝ်ပေါဲဗတိုက်ဆေၚ်မုက်တုဲ ပါဲနူဒပ်ပၠန်ဂတးတအ် ဖံက်ခတိုဟ်မာၚ်၊ ပန်ပှော်လဝ်လွဟ်ဇၞော်တုဲ ဟိုတ်နူလုပ်ကၠုၚ် ပ္ဍဲဗွိုၚ်မာၚ်ဂှ်ရ လ္ပာ်ကံၚ်ဇြဳပၞာန် ဒးဂိလဝ်ရဂှ် ညးတာလျိုၚ်လလောၚ်ပရိုၚ် ABSDF Column -3 သ္ဂံၚ်ပျိဖျိုဝ်ကျဝ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။

ပ္ဍဲပေါဲဗတိုက်ဂှ် လ္ပာ်ဒပ်စဵုဒၞာတအ် ပရေၚ်ဇီုကပိုက်ဒးလဝ် ဟၟဲမွဲသာ် ဆုတ်က္လေၚ်တိတ်အာမာန်လဝ်တုဲ ဒပ်ကံၚ်ဇြဳပၞာန်ဂှ် လုပ်စိုပ်အာ ပ္ဍဲပွိုၚ်ဍုၚ်ယေန်မာပေန်ရဂှ် ဂွံံတီကေတ်ရ။

ရေၚ်ယာဉ်ကွဳစက်ကံၚ်ဇြဳပၞာန်ဂှ် ABSDF တံဒပ် စၟတ် ၁၄ ကဵု ဒပ်ဒဳမဝ်ကရေတ်တေတ်ဗၠးၜးကောန်ဂကူဗၟာ (BLDF) ဒပ်ဒမၠုက်ယျေဝ်ခေါၚ်ကဵု ဂကောံစဵုဒၞာညးဍုၚ်ကွာန် ပွိုၚ်ဍုၚ်ပလေဝ်တအ် ပံၚ်တောဲဗတိုက်လဝ်ရ။

ပရိုၚ် – သြၚ်လောန်တိုၚ်မ်

ဗီု – ABSDF Column 3