လ္တူတၚ်စောဲစပ် က္ဍိုပ်သ္ကိုပ်ပၞာန်ဂှ် ဂကောံကဝ်က ကလေၚ်ခၠေဝ်သာ်လဵုရော

လာယှိုဝ်၊ နဝ်ဝေမ်ဗာ ၁၀

ဂကောံကဝ်က MNDAA ဝွံ ရပ်စပ်ဒတုဲဖဵု ကလိဂွံနၚ် နူကဵုဂဥုဲၜူမာဲတံဂှ်တုဲ ဒၟါနူမိက်ဂွံဒက်ပ္တန်အဝဵုသြဇာတံဂှ်ရ စလဝ် ချဳဒရာၚ်ပၞာန် ၁၀၂၇ ဂှ်ဏောၚ်ဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် စောဲစပ်လဝ်ရ။

ကံၚ်ဇြဳပၞာန် မ္ဒးဂိဒၟံၚ် ဟိုတ်နူချဳဒရာၚ်ပၞာန် ၁၀၂၇ ဂကောံမဟာမိတ်ကောဒေံပိဂကောံဂှ်ဝွံ ပ္ဍဲဂိတုနဝ်ဝေမ်ဗာ ၈ တေံ ကော်လဝ်ကောံဓရီုဂီုကၠီုစဵုဒၞါ မလေပ်ကော်တဴ အခိၚ်အာယုက်ကာလကာတၟေၚ်ကြပ်အိုတ်ဂှ်တုဲ ကၠောန်ဗဒှ်လဝ်ရ။

အပ္ဍဲကဵုကောံဓရီုဏံဂှ် က္ဍိုပ်သ္ကိုပ်ပၞာန်ဂှ် ဂကောံကဝ်ကတံ ကေတ်အခေါၚ်ခိုဟ်ကဵု အကာဲအရာ မ္ဒးရေၚ်တၠုၚ်သောၚ်ကလးဒၟံၚ် ယဲကပ်ကဝ်ဝေဒ်ကဵု ကလိုက်ကၟဵုအပ္ဍဲဍုၚ် အဓိကဂှ်တုဲ လုပ်စိုပ်ဗ္တိုက်လဝ် ဗ္ဒိုပ်ဒပ်ကံၚ်ဇြဳပၞာန်တံ မွဲအခိၚ်ဓဝ်ရောၚ်ဂှ် ဟီုဂးလဝ်ရ။

အခိၚ်လၟုဟ် ပရေၚ်ဗ္တိုက် ဂကောံမဟာမိတ်ကောဒေံပိဂကောံဂှ် ကလေၚ်ထိၚ်ဒက်မာန်လဝ်တုဲ ရေၚ်တၠုၚ်အာ ပရေၚ်ခၠေဝ်ပလန် မၞုံပၟိက်တံဏောၚ်ဂှ် က္ဍိုပ်သ္ကိုပ်ပၞာန် ကြဵုဇာလဝ်ရ။

ညးမၞုံအခေါၚ်ဟီုဂး ဂကောံကဝ်က MNDAA လဳကျာဝေန်ဂှ် တၚ်စောဲစပ် က္ဍိုပ်သ္ကိုပ်ပၞာန်ဂှ်ဝွံ ရိုဟ်ကၞက်ဟွံမွဲတုဲ ပရေၚ်လၞိန်ဗပိန်ဂဥုဲၜူမာဲဂှ် စရေၚ်တၠုၚ်ကၠုၚ်လဝ် နူကဵုသၞာံ ၂၀၀၀ တေံရဂှ် ကလေၚ်ခၠေဝ်ပလန်လဝ်ရ။

“လ္တူမစောဲစပ်ဒၟံၚ် နကဵုဂဥုဲၜူမာဲဏံဂှ် နကဵုဒေသတၟေၚ် ၁ ပိုယ်တံ နူကဵုသၞာံ ၂၀၀၀ တေံရ သၟဝ်သ္ကိုပ်သ္ကဥက္ကဌဇၞော်ပိုယ်တံ ဥူဖုၚ်ကျာယှေန်ဂှ် ဗ္တိုက်သ္အးၚးတးလဝ် ဂဥုဲၜူမာဲပိုယ်တံဏံမာန်လဝ်ရ။ ညအ်ဂှ်လေဝ် ဒှ်အရာပြာကတ်ပ္ဍဲဝၚ်မွဲကီုရ။ ပ္ဍဲသၞာံ ၂၀၀၀ ဂှ် ဖ္တိုက်သ္အးလဝ် ဂဥုဲၜူမာဲမာန်လဝ်တုဲ တဵုလဝ်စၞး လက်ဖက်ဟကှ်တံ၊ ၜဴတံမာန်လဝ်ရ။ ဍေံတံ (စကစ) ဂှ် အခိၚ်လၟုဟ်မှ ကၠုၚ်စောဲစပ် နကဵုသြန်လုပ် ကလိဂွံ နူကဵုဂဥုဲၜူမာဲဂှ်တုဲ ဟွံကၠိုဟ်လဝ်မွဲသာ်ဂှ်တှ်ေ အခိၚ်လၟုဟ် ပ္ဍဲကဵုဒေသဂှ်ဂှ် ဂဥုဲၜူမာဲဂှ် နွံဒၟံၚ်ဖိုဟ်ဟာ။ ယဝ်ရ ဗ္ဒါဲဗ္ဒါဲဂှ်နွံဒၟံၚ်ဏီဏောၚ်ဟီုမ္ဂး ဂကောံကောန်ရုပ်ကဝ်ကတံ ကၠောန်ဒၟံၚ်ဂဥုဲၜူမာဲ ဒှ်သဘဴဏံရ“ သာ်ဝွံ ဟီုဂးလဝ်ရ။

က္ဍိုပ်သ္ကိုပ်ပၞာန်ဂှ် ဂကောံကဝ်ကဝွံ သွက်ဂွံဗ္တိုက် ဗ္ဒိုပ်ဒပ်ကံၚ်ဇြဳပၞာန်တံဂှ် ကြဴနူကၠောန်ၜိုတ် ပရေၚ်ပလေဝ်ပလေတ်ဒစးဒုၚ်ပရေၚ်ပၞာန် ပ္ဍဲကဵုဒေသ “ဝ” နူကဵုသၞာံ ၂၀၂၂ တေံဂှ်တုဲ ပ္ဍဲဂိတုအံက်တဝ်ဗာ ၂၇ ဂှ် စဗ္တိုက်လဝ်ရောၚ် ဟီုရ။

ပ္ဍဲကဵုကောံဓရီုဂီုကၠီုစဵုဒၞါဂှ် သမ္မတယာယဳ ဥူမျေတ်ဇြိုယ်ဂှ်လေဝ် စပ်ကဵုပေါဲဗ္တိုက်ရးသေံသၟဝ်ကျာတုဲ နကဵုဒပ်ပၞာန် ယဝ်ရရေၚ်တၠုၚ်ကၠေံ သ္ကေက်က်သ္ကာသ္ကာဟွံမာန်မ္ဂး ကၟိန်ဍုၚ်ဏံ ထ္ကးပြးအာမာန်တုဲ ကိစ္စလၟုဟ်ဏံဂှ် နွံပၟိက်ဒးရပ်စပ်အာ ချိုတ်တ်ပၠိုတ်တ် ဗွဲမစှ်ေကဵုသၞောတ်ဏောၚ်ဂှ် ဟီုဂးလဝ် ပ္ဍဲကောံဓရီုဂီုကၠီုစဵုဒၞါဂှ်ရ။

ညးမၞုံအခေါၚ်ဟီုဂး ဂကောံကဝ်က MNDAA လဳကျာဝေန်ဂှ် ဟိုတ်နူချဳဒရာၚ်ပၞာန် ၁၀၂၇ ဂှ်တုဲ ဂလာန်မဟီုဂးဒၟံၚ် ကၟိန်ဍုၚ်ထ္ကးပြးအာမာန်ဂှ်ဝွံ ဒဒှ်ရဒုၚ်တဲဟွံမာန်ဂှ်ကီု ချဳဒရာၚ်ပၞာန်ဏံဝွံ ညံၚ်သၞောတ်တၠအဝဵုပၞာန် ဂွံအိုတ်အာဂှ်ကဵု သွက်ဂွံဒက်ပ္တန် ကၟိန်ဍုၚ်ပံၚ်ကောံဖေဝ်ဒရာတၟိတုဲ ဒးထ္မံက်လဝ်ရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ကၟိန်ဍုၚ် ထ္ကးပြးအာမာန်ဟီုဂှ် အဲဒုၚ်တဲဟွံမာန်လးလးရ။ မူဟိုတ်ရောဟီုတှ်ေ Operation ပိုယ်တံဂှ် ညံၚ်သၞောတ်တၠအဝဵုပၞာန် ဂွံအိုတ်အာ၊ ညံၚ်ဂွံဒက်ပ္တန်ကၟိန်ဍုၚ်ပံၚ်ကောံဖေဝ်ဒရာတၟိမာန် တုဲပၠန် ညံၚ်ဂွံထပိုတ်ရိုဟ်ကၞက် အောန်လာၚ်ဂိမ်ကျဖျတံမာန်တုဲ မ္ဒးကၠောန်လဝ် Operation ဏံရောၚ် မဒှ်ရ“ သာ်ဝွံ ညးသ္ဂးရ။

နူစတ္ၚဲချဳဒရာၚ်ပၞာန်စတေံ စဵုကဵုဂိတုနဝ်ဝေမ်ဗာ ၈ အပ္ဍဲပွိုၚ် ၁၃ တ္ၚဲ ဍုၚ်ဇကုတံ မသီဂွံလဝ်ဂမၠိုၚ်ဂှ် နကဵုဂကောံကောဒေံ ၃ ဂကောံတံ ဆက်ထိၚ်ဒက်လဝ်ပေၚ်ၚ်မာန်တုဲ သွက်ဂွံထ္ပက်အဇာ နကဵုပရေၚ်အုပ်ဓုပ်အပိုၚ်မာန်ဂှ် ပ္တိတ်ဒၟံၚ်ဇြဟတ်ရောၚ် လလောၚ်ပ္တိတ်လဝ်ရ။

အပ္ဍဲချဳဒရာၚ်ပၞာန် ၁၀၂၇ ပွိုၚ်ၜါသတ္တာဟဂှ် ဂကောံမဟာမိတ်ကောဒေံပိဂကောံတံ သီဂွံလဝ် ဗ္ဒိုပ်ဒပ်ကံၚ်ဇြဳပၞာန် ဗ္ဒါဲ ၁၅၀ ကဵု ဍုၚ်ဇၞော်မၞုံပ္ဍဲရးသေံသ္ကုတ်သၟဝ်ကျာ ၆ ဍုၚ်ဂှ်တုဲ ပ္ဍဲကဵုသက်ကိုၚ်ဂှ်တှ်ေ ဂကောံပံၚ်ကောံ PDF တံ သီဂွံလဝ် ၂ ဍုၚ်ရ။

အခိၚ်လၟုဟ်ဂှ် ရးသေံသၟဝ်ကျာတေံသၟးဟွံက ပ္ဍဲကဵုရးသက်ကိုၚ်ဂှ် ဂကောံကောဒေံပိဂကောံဂှ်ကဵု ဒပ်ပၞာန်ဗၠးၜးကချေၚ် KIA ၊ ဒပ်မဟာမိတ် KIA တံပါလုပ်ဂှ် ဂကောံပံၚ်တောဲ PDF သၟဝ်တဲ NUG တံ ဗ္တိုက်ဒၟံၚ် ကံၚ်ဇြဳပၞာန်ရ။

ပ္ဍဲကဵုသ္ကုတ်သၠုၚ်ကျာကၟိန်ဍုၚ်ဂှ်တှ်ေ ပ္ဍဲကဵုပွိုၚ်ဍုၚ်မၞုံတွဵုရးကရေၚ်ကဵု တွဵုရးဍုၚ်မန်တံဂှ် ဂကောံပၠန်ဂတးရပ်လွဟ်ဂမၠိုၚ် ဗ္တိုက်ထောံမခတိုဟ် နကဵုဒရုၚ် အပ္ဍဲဘာလကျာ်တံကဵု ရုၚ်ဌာနမဆေၚ်စပ် ဒၞါဲဒပ်ကံၚ်ဇြဳပၞာန်တံ မဖျေံသ္ဇိုၚ်မံၚ်တန်တဴဒၟံၚ်တံဂှ် နွံဒၟံၚ်ရ။

ဂကောံမဟာမိတ်ကောဒေံပိဂကောံဂှ် ချဳဒရာၚ်ပၞာန် ၁၀၂၇ ကံၚ်ဇြဳပၞာန် မဒးဂိဒၟံၚ်ဂှ် အပ္ဍဲပရေၚ်ပၞာန်သီအဝဵုဏံ ပံၚ်တောဲအာကဵု ဂကောံရပ်လွဟ်ကောန်ဍုၚ်အရၚ်တၞဟ်သ္အာၚ်ဂမၠိုၚ်ညဳညဳသၟဟ်ဟ်တုဲ ဗဒှ်အာ အလုံကၟိန်ဍုၚ်ပြးဇးဏောၚ်ဂှ် ကဵုသမ္တီလလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−MOI