တၞၚ်သဳ၊ နဝ်ဝေမ်ဗာ ၁၀
ပ္ဍဲဂိတုနဝ်ဝေမ်ဗာ စၟတ်တ္ၚဲ ၈ ကဵု ၉ ဂှ် အာစိုပ်ဗ္တိုက်လဝ် တမ်ဒပ်ကံၚ်ဇြဳပၞာန် ၂ ဒပ် ဖျေံသ္ဇိုၚ်ပွိုၚ်ဍုၚ်တၞၚ်သဳ၊ ရးတၞၚ်သဳ မလလောၚ်တြးလဝ် ပရေၚ်အုပ်ဓုပ်ပၞာန်တံဂှ် ဂွံတီကေတ် နူကဵုဂကောံဇြဟတ်ပၠန်ဂတးတၞၚ်သဳတံရ။
ပ္ဍဲဂိတုနဝ်ဝေမ်ဗာ ၈ အခိၚ်ဇိုၚ်သဝ်တ္ၚဲ ၜိုတ် ၅ နာဍဳဂှ် ဂကောံဒပ်စဵုဒၞါဒေသတံ အာစိုပ်ဗ္တိုက်လဝ် တမ်ဒပ်ကံၚ်ဇြဳပၞာန် ခမရ−၅၅၈ ဖျေံသ္ဇိုၚ်ကွာန်ကမ္မလိုၚ် ပွိုၚ်ဍုၚ်တၞၚ်သဳဂှ်ရ။
ဟိုတ်နူပရေၚ်ဗ္တိုက်ဏံတုဲ ပေါဲဗ္တိုက်ၜါလ္ပာ် ကြဴနူက္တဵုဒှ်လလအ်ပွိုၚ်ဘာ်နာဍဳတုဲဂှ် လ္ပာ်ဂကောံဇြဟတ်ပၠန်ဂတးတံ ကလေၚ်ဆုတ်ကလေၚ်လဝ်ရ။
အပ္ဍဲပေါဲဗ္တိုက်ၜါလ္ပာ်ဂှ် လ္ပာ်ကံၚ်ဇြဳပၞာန်တံ ဗဵုအကြာပ်မွဲတၠပါလုပ်ဂှ် ဟွံအောန်နူကဵု ၃ တၠ ချိုတ်အာလဝ်တုဲ ၆ တၠ ကလိဂွံလဝ်ဝပ်ရောၚ် ညးဒုၚ်တာလျိုၚ် လလောၚ်ပရိုၚ် ပကဖ တၞၚ်သဳ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုနဝ်ဝေမ်ဗာ ၉ အခိၚ်နူဂယး ၜိုတ် ၁၁ နာဍဳဂှ်လေဝ် ဂကောံဒပ်ပံၚ်ကောံစဵုဒၞါဒေသတံ ထောံလဝ်မခတိုဟ် ၃ မ ကဵုက္ၜၚ်ကျာသၟတ် မသက္ကုမၞိဟ်ဒဳ ကုတမ်ဒပ်ကံၚ်ဇြဳပၞာန် ခမရ−၅၅၆ ဖျေံသ္ဇိုၚ်ကွာန်ဇြဝါဂှ်တုဲ ဗ္တိုက်လဝ်ရ။
အပ္ဍဲကဵုပရေၚ်ဗ္တိုက်ထောံမခတိုဟ် နကဵုက္ၜၚ်ကျာမသက္ကုမၞိဟ်ဒဳဂှ် မခတိုဟ်ဂမၠိုၚ် ၜိုန်ရဒတုံဗ္တိုဟ်ထ္ကးအာလဝ် အပ္ဍဲဒပ်ကံၚ်ဇြဳပၞာန်တံကီုလေဝ် ပရေၚ်ဇီုကပိုက်ချိုတ် ကောန်ဂကောံဒပ်ကံၚ်ဇြဳပၞာန်တံဂှ် ဆက်ဂၠိုက်ဂၠါဲဒၟံၚ်ဖိုဟ်ရောၚ် သ္ဂးရ။
အပ္ဍဲပရေၚ်ဗ္တိုက်ဏံဂှ် လ္ပာ်ကံၚ်ဇြဳပၞာန် ၜိုန်ရပန်ပှော်လဝ် လွဟ်ဇၞော် အပ္ဍဲကဵုကွာန် ဒၞါဲညးဍုၚ်ကွာန်ဒေသတံ မသ္ပဒတဴဒၟံၚ်တံ ကြာန်န်ကီုလေဝ် ညးဍုၚ်ကွာန်ကောန်အရာပ်တံ ဇီုကပိုက်ကလိဂွံဝပ် ဟွံမွဲပုဟ်ဂှ် ဂွံတီကေတ်ရ။
ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်တၞၚ်သဳဂှ် ဒၟါနူသၠုၚ်ပ္တိုန်အာ အသိၚ်ပၞာန်တံဂှ်ရ နကဵုညးဍုၚ်ကွာန်ဂမၠိုၚ် ပွမအာကၠုၚ်၊ မံၚ်စံၚ် ဗ္ဒါဲသၞေဟ်ကၚ်စၟဳတ်၊ တမ်ဒပ် ကေုာံ ရေၚ်ကွဳစက်ကံၚ်ဇြဳပၞာန်တံဂှ် သွက်ဂွံဝေၚ်ပါဲကဵုအိုတ်ဂှ် ဒုၚ်လဝ်ဂုဏ်နမေတ္တာရ။
ပရိုၚ်−သြၚ်လောန်တိုၚ်(မ်)
ဗီု−Tanintharyi PDF
sanlontai