ပ္ဍဲသၞေဟ်ကၚ်ညံၚ်ခါယှေ ဂၠံၚ်ကွဳစက်လ္ဂုၚ်−မတ်မလီုဂှ် ကွဳစက်ဂၠိုၚ်ကဵုလ္ၚီဖ္ဍိုက် ဆိုအ်ဗဒၟံၚ်

မတ်မလီု၊ နဝ်ဝေမ်ဗာ ၁၀

ပ္ဍဲကဵုသၞေဟ်ကၚ်စၟဳတ်ညံၚ်ခါယှေ ဂၠံၚ်ကွဳစက်လ္ဂုၚ်−မတ်မလီုဂှ် ဒၟါနူပရေၚ်ဂၠိုက်ဂၠါဲစၟဳတ်ကၟာတ်လဒဵု ကံၚ်ဇြဳပၞာန်တံတုဲ ကွဳစက်ဆိုအ်ဗတံ က္တဵုဒှ်ဒၟံၚ်ဂှ်ရ ကွဳစက်ဂၠိုၚ်ကဵုလ္ၚီဖ္ဍိုက် ကၟာတ်ဒးဒၟံၚ်ရောၚ် ဂွံတီကေတ် ဇရေၚ်ညးအာတရဴတံရ။

ကံၚ်ဇြဳပၞာန်ဝွံ ပ္ဍဲကဵုသ္ကုတ်သၟဝ်ကျာတွဵုရးသေံဂှ် ကြဴနူဗ္ဒိုပ်ဒပ်ကံၚ်ဇြဳပၞာန်တံ ဒးဒုၚ်သီဒၟံၚ်အဆက်က်တုဲဂှ် ပ္ဍဲကဵုသၞေဟ်ကၚ်စၟဳတ် X-Ray မၞုံဗ္ဒါဲကွာန်ညံၚ်ခါယှေ ရးဗဂေါဂှ် စၟဳတ်ဂၠိုက်ဂၠါဲကၟာတ်လဒဵုဒၟံၚ် ကွဳစက်မွဲဖ္ဍိုက်တုဲမွဲဖ္ဍိုက်ရ။

ကောန်ဒပ်ကံၚ်ဇြဳပၞာန်သၟဝ်တဲတံကဵု ဌာနမဆေၚ်စပ်တံဂှ် နကဵုဟိုတ်ပရေၚ်ဂီုကၠီုဂှ် စၟဳတ်ဒၟံၚ်ကွဳစက်ဂမၠိုၚ် ပ္ဍဲကဵုသၞေဟ်ကၚ်စၟဳတ် X-Ray အခိၚ်ဗွဲမလအ်လဂှ်ရ ကွဳစက်ကၟာတ်ဆိုအ်တံ က္တဵုဒှ်ဒၟံၚ်ရ။

ဟိုတ်နူကွဳစက်ကၟာတ်ဆိုအ်တံ က္တဵုဒှ်ဒၟံၚ်ဂှ်ရ သီုကဵုကွဳစက်သ္ၚိတံကီု ကွဳစက်အာတရဴ ကေုာံ ကွဳစက်ဖ္ဍိုက်ဗၞိက်တံဂမၠိုၚ်ဝွံ ဆက်အာတရဴဟွံဂွံမွဲသာ် အခိၚ်ဗွဲမလအ်လ ရေၚ်တုဲဒးမၚ်ဒၟံၚ် ပ္ဍဲကဵုသၞေဟ်ကၚ်စၟဳတ် X-Ray ဂှ်ရ။

ဟိုတ်နူပရေၚ်စၟဳတ်ကၟာတ်လဒဵု ကံၚ်ဇြဳပၞာန်တံတုဲ ကွဳစက်အာတရဴဂမၠိုၚ် သွက်ဂွံဂွံအခေါၚ်တိတ်အာနူကဵု သၞေဟ်ကၚ်စၟဳတ်ညံၚ်ခါယှေ ဂှ် ဒးမံၚ်ဒၟံၚ် မွဲတ္ၚဲကဵု မွဲဗ္တံရောၚ် ညးဒဳယာန်ဖ္ဍိုက်ဗၞိက်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဒၟါနူကွဳစက်ကၟာတ်ဆိုအ်ဒၟံၚ်ဂှ်တုဲ က၊ ၚုဲ ကေုာံ ဖျုန်ဂံက်က် မဒးပလံၚ်ပ္တိုန် ရးဒေသနာနာ ပါလုပ်သီုကဵုလ္ဂုၚ်၊ မာန္တလေဝ်တံဂှ်သၟးဟွံက သၞေဝ်ကေဝ်တံလေဝ် လီုလာ်ဆောံလေၚ်အုဲအေၚ်အာအိုတ် က္တဵုဒှ်ဒၟံၚ်ဂှ် ဂွံတီကေတ် ဇရေၚ်သၟာဗၞိက်တံရ။

သၞေဟ်ကၚ်စၟဳတ်ညံၚ်ခါယှေ ဂှ်ဝွံ နွံဒၟံၚ် လ္တူဂၠံၚ်ဇၞော်ပျဳထံၚ်သု လ္ဂုၚ်−မတ်မလီုတုဲ နွံဒၟံၚ် လ္တူဂၠံၚ်သွံရာန်ဗၞိက် မဒှ်ဂၠံၚ်အဓိကသုၚ်စောဲဒၟံၚ် ပ္ဍဲအရာအာကၠုၚ် ရးတၞၚ်သဳကဵု တွဵုရးကရေၚ်တံရ။

ဟိုတ်နူကွဳစက်ကၟာတ်ဆိုအ် သၞေဟ်ကၚ်ညံၚ်ခါယှဂှ်ေတုဲ ဆေၚ်ကၠေၚ်စက် မၞုံအပ္ဍဲတွဵုရးဍုၚ်မန် ဗွဲမဂၠိုၚ်ဂှ် ကၠေၚ်ပိုတ်အိုတ်တံ က္တဵုဒှ်ဒၟံၚ်ရောၚ် ဂွံတီကေတ် အတိုၚ်ဂလာန်ညးဒေသတံရ။

ပရိုၚ်−သြၚ်လောန်တိုၚ်(မ်)

ဗီု−CJ