ဗိက်၊ နဝ်ဝေမ်ဗာ (၁၁)
နကဵုညးတၠကမၠောန်ခရိုဝ်နဳ မၞုံပွိုၚ်ဍုၚ်ဗိက်၊ ရးဒေသတၞၚ်သြဳတအ် ပံၚ်တောဲကဵုကံၚ်ဇြဳပၞာန်တုဲ ပရေၚ်ထံက်ပၚ်ကဵုဒၟံၚ် သွက်ဂွံဒေါံအာလွာဲလၟုဟ်ဂှ် ဂကောံစဵုဒၞာညးဍုၚ်ကွာန် ပွိုၚ်ဍုၚ်ဗိက် (ပကဖ) လလောၚ်တြးလဝ် လိက်ကဵုသတိ နကဵုစၟတ်တ္ၚဲ ဂိတုနဝ်ဝေမ်ဗာ (၉) ရ။
ပ္ဍဲကဵုလိက်ကဵုသတိဂှ်မ္ဂး တၠကမၠောန်ခရိုဝ်နဳတအ် ရီုဗၚ်ထံက်ပၚ်ကဵုလဝ် ဂကောံစဵုဒၞာညးဍုၚ်ကွာန်ကေုာံ ဂကောံစဵုဒၞာဒေသ မဒှ်ဂကောံပၠန်ဂတးရပ်လွဟ်တအ် မမိက်ကဵုမွဲမွဲ ဟၟဲရဂှ် ဟီုလဝ်ရ။
ဟိုတ်ဂှ်ရ နကဵုတၠကမၠောန်ခရိုဝ်နဳတအ်ဂှ် လ္ပဆက်ပံၚ်တောဲကဵု ကံၚ်ဇြဳပၞာန်တုဲ ညံၚ်ဂွံရီုဗၚ်ထံက်ပၚ် ကုညးဍုၚ်ကွာန်တအ်ကီု သ္ပတံနူအခိၚ်ကဵုလဝ်သတိတုဲ ယဝ်ရဆက်ပံၚ်တောဲရေၚ်တၠုၚ်ဒၟံၚ်ကဵု ကံၚ်ဇြဳပၞာန်မ္ဂး ကေတ်အာအရေဝ် ပိုတ်တ်သ္ကုတ်တ်ရောၚ်ဂှ် ကဵုလဝ်သတိရ။
တၠကမၠောန်ခရိုဝ်နဳမၞုံဍုၚ်ဗိက် ဗ္ဒာဲ ၂၀ တၠ ပါလုပ်သီုဥူလှတာန်၊ ဥူသိုဝ်ဝေန်၊ ဉူကျောက်သုၚ်တအ်ဂှ် ထံက်ပၚ်ကဵုဒၟံၚ်ကံၚ်ဇြဳပၞာန် သြန်သၟးဟေၚ်ဟွံသေၚ်တုဲ ရီုဗၚ်ထံက်ပၚ်ကဵုဒၟံၚ် သီုဇွောံမစၞစ ကေုာံ ကမၠောန်အာကၠုၚ်တရဴရဂှ် ဂကောံပကဖ ဟီုလဝ်ရ။
ညးတာလျိုၚ်ပကဖပွိုၚ်ဍုၚ်ဗိက်မွဲတၠဂှ်မ္ဂး တၠကမၠောန်ခရိုဝ်နဳတအ်ဂှ် ဒုၚ်ဖအိုတ်သြန်ကိုတ်ဂၠိုၚ်ကဵုလ္ၚီ ဒဒှ်ရထံက်ပၚ်ဒၟံၚ် ကံၚ်ဇြဳပၞာန်ဂှ် ဂွံဒၟံၚ်တုဲ သွက်ဂွံဒေါံကဵု ကမၠောန်ပြဝအ်တအ်ဏံ လွာဲလၟုဟ် ကဵုလဝ်သတိ နဒဒှ်အလန်လကြဴအိုတ် ရဂှ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
တၠကမၠောန်ခရိုဝ်နဳ မၞုံပွိုၚ်ဍုၚ်ဗိက်တအ်ဂှ် ပ္ဍဲမွဲကာလပၞာန်သီအဝဵု ပံၚ်တောဲကဵုကံၚ်ဇြဳပၞာန်တုဲ ကေတ်လဝ်အခေါၚ်ကၠောန် ပ္ဍဲတိဍာ်ညးဍုၚ်ကွာန်ပိုၚ်ကဵု ပ္ဍဲတ္ကအ်တအ်တုဲ သၠဲပ္တိတ်ဒၟံၚ်ကမၠောန် နွံရဂှ် ဂွံတီကေတ် နူညးဒေသတအပ္ဍဲကဵုဍုၚ်ဗိက် မဒှ်ဍုၚ်ပရေၚ်ပိုန်ဒြပ်အဓိက ရးဒေသတၞၚ်သြဳဂှ်မ္ဂး ကၠောန်ဒၟံၚ်ကမၠောန်ဍာ်၊ ဆေၚ်ကၠေၚ်စက်၊ ထဝ်၊ ကပေါတ်တိတ်နူဂြိုပ်ဆု၊ ကမၠောန်သွံရာန်တိကၠအ်၊ ကမၠောန်အာတရဴတအ်ရဂှ် ဂွံတီကေတ်ရ။
ကမၠောန်တအ်ဏံဗွဲမဂၠိုၚ်တအ်ဂှ် တၠကမၠောန်ခရိုဝ်နဳ ပံၚ်တောဲရေၚ်တၠုၚ်ဒၟံၚ်ကဵုကံၚ်ဇြဳပၞာန်တုဲ ပိုၚ်ပြဳလဝ်ညးသ္ကအ် ဂၠိုၚ်အိုတ်ရ။
ပရိုၚ် – သြၚ်လောန်တိုၚ်မ်
ဗီု -Social Media
sanlontai