ပ္ဍဲပေါဲဗတိုက်ဍုၚ်ကဝ်လေန် လ္ပာ်ကံၚ်ဇြဳပၞာန် ဒးချိုတ်လဝ် ၅၀ ပြၚ်

ကဝ်လေန် – နဝ်ဝေမ်ဗာ(၁၁)

ရးဒေသသေတ်ဂါၚ်၊ ပ္ဍဲကဵုပေါဲဗတိုက်သီဍုၚ်ကဝ်လေန်ဂှ် လ္ပာ်ဒပ်ကံၚ်ဇြဳပၞာန် ဒးချိုတ်လဝ် ၅၀ ပြၚ်တုဲ ဂၠုဲပၞာန် ၂၀ ပြၚ် ဖျေံလွဟ် ဒုၚ်ကမျလဝ်ရဂှ် ရုၚ်က္ဍိုက်က္ဍိုပ်ပၞာန် ဒေသပၞာန် စၟတ်- ၁ လလောၚ်တြးလဝ် ပရိုၚ်ရ။

နူကဵုဂိတုနဝ်ဝေမ်ဗာ စၟတ်တ္ၚဲ (၃) တုဲကၠုၚ်တေံ စချဳဒရာၚ်လဝ် ပေါဲဗတိုက်သီဍုၚ်တုဲ ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၆) ဂှ်မ္ဂး ထိၚ်ဒဝ်ဂွံလဝ် သီုအလုံဍုၚ်မွဲမာန်ရ။

ပ္ဍဲကဵုဗဒိုပ်ဗၠာဲသၟိၚ်ကဝ်လေန်၊ ရုၚ်အုပ်ဓုပ်နာနာ၊ ဘာတန်သၠုၚ်၊ ရုၚ်စရၚ်တိ ကေုာံတိုက်သြန်မျာန်မဇြဳပွာယျေ ဒၞာဲကောန်ဒပ်ကံၚ်ဇြဳပၞာန် မၞုံပ္ဍဲဍုၚ်ကဝ်လေန်တအ် ဖျေံလဝ်ဗဒိုပ်တအ်ဂှ် လ္ပာ်ဒပ်ပံၚ်ကောံ ဂကောံဇြဟတ်ပၠန်ဂတးတအ် သီကေတ်မာန်လဝ်တုဲဂှ် ယန္တရာပရေၚ်အုပ်ဓုပ်ကံၚ်ဇြဳပၞာန် ဒးဒေါံဒေၚ်အာပေၚ်ၚ်တုဲ သီကေတ်မာန်လဝ်ရ။

ပ္ဍဲကဵုပေါဲဗတိုက် လအ်လဝ် ပွိုၚ် (၃) တ္ၚဲဂှ် နူလ္ပာ်ကံၚ်ဇြဳပၞာန် ဗတိုက်လဝ် ဍုၚ်ကဝ်လေန် နကဵုက္ၜၚ်ကျာ ၄၉ ဝါတုဲ လ္ပာ်ဒပ်ပံၚ်ကောံ ပၠန်ဂတး သ္ဂံၚ် (၃) တၠ သၠးပူဇဴဴဏာလမျီု သွက်ကၟိန်ဍုၚ်ရဂှ် ဂွံတီကေတ်ရ။

ပ္ဍဲကဵုပေါဲဗတိုက်ဂှ် လ္ပာ်ကံၚ်ဇြဳပၞာန် ဒးချိုတ်လဝ် (၅၀) ပြၚ်တုဲ မၞိဟ်ဒုၚ်ကမျ ကၠုၚ်ဖျေံလွဟ် နွံ (၂၁) တၠကီု သီဂွံလဝ် လွဟ်ဇၞော်၊ လွဟ်ဍောတ် ၉၆ ဒကိုအ်၊ Jammer ၄ ဒကိုအ်၊ မကမ်ဂၠိုၚ်ဂၠေၚ် သီုကဵုကပေါတ်အရပ်စပ်ပၞာန်တအ်ရဂှ် ရုၚ်ဒေသပၞာန် စၟတ်- ၁ ဓမံက်ထ္ၜးလဝ်ရ။

ပေါဲဗတိုက်သီဍုၚ်ကဝ်လေန်ဂှ် ရုၚ်ကောပ်ကာဲခရိုၚ်ကဝ်လေန် မၞုံသၟဝ်ပရေၚ်ကောပ်ကာဲဒေသပၞာန် စၟတ်- ၁၊ တံဒပ် ခရိုၚ်ကဝ်လေန် စၟတ် ၁၊ ၂၊ ပ.က.ဖ ရးသေတ်ဂါၚ်၊ ပ.က.ဖ ပွိုၚ်ဍုၚ် ခရိုၚ်ကဝ်လေန် ကေုာံ Federal Wings တအ် ချဳဒရာၚ်လဝ် ပေါဲဗတိုက်သီဍုၚ်ရ။

သ္အာၚ်နူဂှ်ပၠန် သွက်ဂွံကုတ်ဗပိုတ် ကရောၚ်ပၞာန်ကံၚ်ဇြဳပၞာန်ဂှ် တံဒပ်ခရိုၚ်ကဝ်လေန် စၟတ် ၃၊ ၄၊ ကေုာံ ပ.က.ဖ ပွိုၚ်ဍုၚ်ဝေါန်တိုဝ်တအ် ကေတ်တာလျိုၚ် ရေၚ်တၠုၚ်လဝ်ရဂှ် ဂွံတီကေတ်ရ။

ပရိုၚ် – သြၚ်လောန်တိုၚ်မ်

ဗီု – ရုၚ်က္ဍိုက်က္ဍိုပ်ပၞာန် ဒေသပၞာန် စၟတ်-၁