ကျာ်မြဟ်၊ နဝ်ဝေမ်ဗာ ၁၁
ပ္ဍဲကဵုပေါဲဗ္တိုက်ၜါလ္ပာ် မက္တဵုဒှ်ဒၟံၚ် အပ္ဍဲကွာန်ၜါသွာၚ် ပွိုၚ်ဍုၚ်ကျာ်မြဟ်၊ တွဵုရးဍုၚ်မန်ဂှ် ကောန်အရာပ်ဂၠိုၚ်ကဵုလ္ၚီ ကၟာတ်ဒးမံၚ်တုဲ ဇီုကပိုက်ဂွံဝပ်တံလေဝ် နွံဒၟံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုနဝ်ဝေမ်ဗာ အခိၚ်နူဂယးပြဟ်ဟ်ဂှ်တုဲ ဂကောံဇြဟတ်ပၠန်ဂတးတံ လုပ်စိုပ်ဗ္တိုက်လဝ် ဗ္ဒိုပ်သၞေဟ်ကၚ်ဒဒန် ကေုာံ ဗ္ဒိုပ်ဗၠာဲသၟိၚ် သၟဝ်တဲကံၚ်ဇြဳပၞာန် ကွာန်ၜါသွာၚ်တံဂှ်တုဲ ပေါဲဗ္တိုက်ၜါလ္ပာ် က္တဵုဒှ်လဝ် ဗွဲမသ္ကာတ်မြဟ်ရ။
အပ္ဍဲပေါဲဗ္တိုက်ဏံဂှ် အခိၚ်နူဂယး ၜိုတ် ၉ နာဍဳကဝိုက်ဂှ် နူကဵုဌာန်ဂအုပ်ပၞာန်ရးဒိုဟ်အဂၞဲကံၚ်ဇြဳပၞာန်ဂှ် ကၠုၚ်စိုပ်ပန်ပှော်ဏာလဝ် နကဵုက္ၜၚ်ကျာဗ္တိုက် ၂ ဖ္ဍိုက်တုဲ ဒပ်အမၠံက်ကံၚ်ဇြဳပၞာန် ဖျေံသ္ဇိုၚ်မုဟ်ဍုၚ်ဂှ်လေဝ် ဘိုၚ်ပန်ပှော်ကဵုဒၟံၚ် လွဟ်ဇၞော် ဟွံပိုတ်သ္ကုတ်ရ။
ဟိုတ်နူပေါဲဗ္တိုက်ဂှ်တုဲ ညးဒေသကွာန်ၜါသွာၚ် လၟိဟ်မၞိဟ် ၄၀၀၀ ပြၚ်ဂှ်ဝွံ ကၟာတ်ဒးဒၟံၚ်အပ္ဍဲပေါဲဗ္တိုက်ဂှ်တုဲ ဒးအောပ်မာမံၚ်ဒၟံၚ်ရောၚ် ညးဒေသတံ ဟီုဂးလဝ်ရ။
ပေါဲဗ္တိုက်ကွာန်ၜါသွာၚ်ဂှ်ဝွံ ဆက်က္တဵုဒှ်ဒၟံၚ် စဵုကဵုဇိုၚ်သဝ်တ္ၚဲ ၅ နာဍဳကဝိုက် တ္ၚဲဏံဂှ်တုဲ ကံၚ်ဇြဳပၞာန်ဂှ်လေဝ် ဗလးကဵုဒၟံၚ်ပၞာန်ရီုတံ နူကဵုပွိုၚ်ဍုၚ်မုဟ်ဍုၚ် အဆက်က်ဂှ် ဂွံတီကေတ် ဇရေၚ်ဂကောံဇြဟတ်ပၠန်ဂတးဗလးတိတံရ။
အတိုၚ်တၚ်နၚ် သြၚ်လောန်တိုၚ်(မ်) ကလိဂွံကၠာတဲဏံဂှ်မ္ဂး ဟိုတ်နူပေါဲဗ္တိုက်ၜါလ္ပာ်တုဲ မၞိဟ်တြုံဒေသမွဲတၠ ဒးကဝေက်မာၚ် ကလိဂွံလဝ်ဝပ်တုဲ သ္ၚိဒၟံၚ် ဟွံအောန်နူကဵု ၅ မ ဇီုကပိုက်လီုလာ်လဝ်တုဲ ကၠိက်လွဳလဝ်တံလေဝ် ချိုတ်အာလဝ်တံ နွံဒၟံၚ်ရ။
ဟိုတ်နူပေါဲဗ္တိုက်ၜါသွာၚ်တုဲ နကဵုညးဍုၚ်ကွာန်အာတရဴဂမၠိုၚ် ညံၚ်ဟွံဂွံသုၚ်စောဲ ဂၠံၚ်ကွဳစက်ကျာ်မြဟ်−လှာဒကှ်ဂှ် ညးဒေသတံ ကဵုလဝ်သမ္တီရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai