ပ္ဍဲလံၚ်လုၚ် ကောန်အရာပ်မွဲတၠ ကေုာံ PDF မွဲတၠ ဒးဒုၚ်ရပ်ဒက်ဂစိုတ်

လံၚ်လုၚ်၊ နဝ်ဝေမ်ဗာ ၁၁

ရးဒေသဇၞော်တၞၚ်သဳ၊ ပွိုၚ်ဍုၚ်လံၚ်လုၚ်၊ ဗ္ဒါဲကွာန်ကယျေန်ကျဳ ကြဴနူပေါဲဗ္တိုက်က္တဵုဒှ်တုဲဂှ် ကောန်အရာပ်မွဲတၠကဵု PDF ကောန်သ္ဂံၚ်မွဲတၠ ဒးဒုၚ်ရပ်ဒက်ဂစိုတ်လဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

တုဲကၠုၚ်ပ္ဍဲဂိတုနဝ်ဝေမ်ဗာ ၉ အခိၚ်နူဂယးတေံ အကြာဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန်ဂှ်ကဵု ဒပ်ပံၚ်ကောံ စဵုဒၞါညးဍုၚ်ကွာန်တံဂှ် ပေါဲဗ္တိုက်ၜါလ္ပာ် က္တဵုဒှ်လဝ်ရ။

ကြဴနူပေါဲဗ္တိုက်ဂှ်တုဲ ကောန်အရာပ်ဒေသ နူကဵုဒပ်ကံၚ်ဇြဳပၞာန်တံ မရပ်ဒက်ဏာမွဲတၠဂှ်ကဵု ကောန်သ္ဂံၚ် PDF မွဲတၠတံဂှ် ပန်ဂစိုတ်ဏာလဝ် နကဵုသေနာတ် ပ္ဍဲဗ္ဒါဲကွာန်ကယျေန်ကျဳဂှ်ရ။

ဇွရုပ်မၞိဟ် ဒပ်ကံၚ်ဇြဳပၞာန်တံ မပန်ဂစိုတ်ဏာတံဂှ် ပ္ဍဲဂိတုနဝ်ဝေမ်ဗာ ၁၀ အခိၚ်နူဂယးဂှ် ဂွံကလေၚ်ဆဵုကေတ် သီုကဵုမချိုတ်ဒၟံၚ်ရ။

ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်လံၚ်လုၚ် LLPDF ဂှ် PDF မချိုတ်အာဂှ်ဝွံ ကောန်ဒပ်ညးတံဟွံသေၚ်မွဲသာ် ညးဒေသရ ဒှ်မာန်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ကရောၚ်ပၞာန်ကံၚ်ဇြဳပၞာန်ဝွံ ပ္ဍဲဂိတုနဝ်ဝေမ်ဗာ ၉ ဂှ်လေဝ် ရပ်ဒက်ဏာလဝ် ညးဒေသဒၟံၚ်ကွာန်ပျေန်ကျဳ ဒဝ်နုတာန် အာယုက် ၅၀ သၞာံဂှ်ကဵု မာၚ်အံၚ်တာထက် အာယုက် ၂၀ သၞာံတံ နဒဒှ်ဇွောံစဵုဒၞါပၞာန်ဂှ် ဂွံတီကေတ် ဇရေၚ်ညးဒေသတံရ။

အပ္ဍဲပေါဲဗ္တိုက်ကွာန်ကယျေန်ကျဳဂှ် လ္ပာ်ကံၚ်ဇြဳပၞာန် ဒးဒုၚ်ကြတ်ဗ္တိုက်ဂှ် ဗ္ဒါဲ ၁၀ တၠ ဇီုကပိုက်ကလိဂွံဝပ်မာန်ရောၚ် ဂကောံဒပ်ဇြဟတ်ပၠန်ဂတးတံ ဟီုဂးလဝ်ရ။

ဒပ်ကံၚ်ဇြဳပၞာန် မထ္ပက်ဒၟံၚ်ကရောၚ်ပၞာန် အပ္ဍဲပွိုၚ်ဍုၚ်လံၚ်လုၚ်ဂှ်ဝွံ သ္ၚိဒၟံၚ်ညးဒေသ နူကဵုကွာန်ကယျေန်ကျဳကဵု ကွာန်ကာမ္ပနဳ ဟွံအောန်နူကဵု ၅ မ စံၚ်ပလီုပလာ်လဝ်ရ။

ဟိုတ်နူဒပ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန်ဂှ်ရ ညးဍုၚ်ကွာန်ဒေသ နူကဵုကွာန်(သဘောဆိပ်) ၊ ကယျေန်ကျဳ၊ ကာမ္ပနဳ၊ ပျေန်ကျဳတံဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရောၚ်ဂှ် ဂွံတီကေတ် အတိုၚ်ဂလာန်ညးဒေသတံရ။

ပရိုၚ်−သြၚ်လောန်တိုၚ်(မ်)

ဗီု−ချာန်နေဝ်ကံၚ်ဇြဳပၞာန်တြးဝါဒ