ပေါဲပၞာန်တုဲဒှ်မ္ဂး သွက်ဂွံစွံအာ ဂကောံဒပ်ဖျေံစိုတ်ဂွံမွဲ ပ္ဍဲဂါဇြာဂှ် သ္ကိုပ်ဝန်ဇၞော်အေဿရေ ဆန္ဒနွံ

ဂျေရုသလေန်၊ နဝ်ဝေမ်ဗာ ၁၁

သ္ကိုပ်ဝန်ဇၞော်အေဿရေ ဗေန်ဂျမေန်နေတာန်ယျာဟုဂှ် မိက်ဂွံသီဂိုၚ်အုပ်ဓုပ် ဒေသဂါဇြာဂှ်ဟွံသေၚ်ကီုလေဝ် သွက်ဂွံတာဒၞါ ပရေၚ်ဘပဠညးမၞုံပၟိက်ကုပၞာန်တံဂှ်တုဲ အပ္ဍဲတိဍာ်ပါလက်သတိုၚ်ဂှ် နွံပၟိက် ကုဇြဟတ်ဒပ် မပတှ်ေဖျေံစိုတ်ဂွံမွဲဏောၚ်ဂှ် ဟီုဂးလဝ်ရ။

သွက်ပရေၚ်ဂီုကၠီု ဒေသဂါဇြာဂှ် အေဿရေ ကေတ်အာတာလျိုၚ် ဟွံမွဲကဵုဗၞတ်တွဵုအခိၚ်ဏောၚ် ဂလာန်နေတာန်ယျာဟုဂှ် အမေရိကာန် မဟာမိတ်အဓိက အေဿရေဂှ် ဟွံတုပ်လဝ်စိုတ်ရ။

ကြဴနူလၞိန်ဗပိန်ကၠေံ ညးအုပ်ဓုပ်ဟာမာသ်တံတုဲ အေဿရေ သီအုပ်ဓုပ်အာ ဒေသဂါဇြာဏောၚ်ဟီုဂှ် ဒစဵုဒစးအာဏောၚ် ဝါယှေန်တာန် ဟီုဂးလဝ်ရ။

“သွက်ဂွံသီကေတ် ဂါဇြာဂှ် ပိုယ်တံ ဟွံပ္တိတ်ဇြဟတ်ပုဟ်၊ သွက်ဂွံအုပ်ဓုပ်ဂါဇြာဂှ်လေဝ် ဟွံဂ္စါန်ပုဟ်” သာ်ဝွံ ပ္ဍဲဂိတုနဝ်ဝေမ်ဗာ ၉ တေံ အခိၚ်မဟီုဂးလဝ်ကဵု Fox News အမေရိကာန်ဂှ် နေတာန်ယျာဟု ဟီုဂးလဝ်ရ။

ပ္ဍဲဂါဇြာ အလဵုအသဳကောန်အရာပ်မွဲ ညံၚ်ဂွံမံက်ဂတဝ်ကၠုၚ်ဂှ် နွံပၟိက်ကီုလေဝ် အေဿရေဝွံ ညံၚ်ဂွိုအ်ထပ်တုဲ ဒးဒုၚ်ဗ္တိုက် ညံၚ်ရဴအံက်တဝ်ဗာ ၇ တေံဂှ် သ္ကဵုချိုတ်ပၠိုတ်တဴရောၚ် နေတာန်ယျာဟု ဟီုဂးလဝ်ရ။

“ဟိုတ်ဂှ်ရ နွံပၟိက်မ္ဂး ဂကောံဒပ်ပတှ်ေဖျေံစိုတ်ဂွံ လုပ်ဂါဇြာတုဲ မဂစိုတ်ကၠေံ မၞိဟ်ဂစိုတ်မၞိဟ်မွဲဂှ် ဒးနွံဏောၚ်။ မူဟိုတ်ရောဟီုမ္ဂး ဣဏံဝွံ ညံၚ်ဂွံတာဒၞါ နူကဵုဂကောံဟာမာသ် မံက်ဂတဝ်ကၠုၚ်ဂှ်ရဏောၚ်” သာ်ဝွံ နေတာန်ယျာဟု ဟီုဂးလဝ်ရ။

ဟိုတ်နူအေဿရေဗ္တိုက်ဂြာတ်မခတိုဟ် ဒေသဂါဇြာဂှ်တုဲ ပါလက်သတိုၚ် ၁၀၈၀၀ ပြၚ် ဒဒှ်ရဒးချိုတ်အာလဝ်ဂှ် ဂွံတီကေတ်ရ။ မ္ၚးနူကဵုကပေါတ်ပရေၚ်ထံက်ပၚ်သ္ဇိုၚ်တံ အိုတ်အာဂှ် မၞိဟ်ဇီုကပိုက်ကလိဂွံဝပ်တံလေဝ် ဂၠိုၚ်လောန်ဂှ်ရ ဘဲကပ်စပ်ကဵုပရေၚ်ဗ္စာရဏာမၞိဟ်မွဲ က္တဵုဗဒှ်ကၠုၚ်လဝ်ရောၚ် မဒှ်ရ။

ဂကောံသၟိၚ်တၠအဝဵု ပါလက်သတိုၚ် (PA) မအုပ်ဓုပ်ဒၟံၚ်သြၚ်ပလိုတ် အေဿရေတံ မသီဂွံလဝ်ဂှ်ဟေၚ် ပေါဲဗ္တိုက်တုဲဒှ်မ္ဂး ကလေၚ်အုပ်ဓုပ်ဂါဇြာထေက်ဂှ် သၟိၚ်တၠအဝဵုအမေရိကာန်တံ သ္ဂးရ။

ဟာမာသ်တံဂှ် ပ္ဍဲသၞာံ ၂၀၀၇ တုဲကၠုၚ်တေံ သီဂွံလဝ် ဂါဇြာ နူကဵုဂကောံဒပ် PA သမ္မတ မာမွတ်အဗာသ် မဒှ်ရ။

သ္ကိုပ်ဝန်ဇၞော်ပါလက်သတိုၚ် မိုဝ်ဟာမက်ယှာတေရာဂှ် ဂကောံ PA ဝွံ ဗက်လက္ကရဴကွဳစၚ်ခြပ်ပသဲအေဿရေတုဲ ကလေၚ်စဴအာ ဂါဇြာတေံဟွံသေၚ်ဂှ် အပ္ဍဲသတ္တာဟဏံ ဟီုဂးလဝ်ကဵု ဌာန်ပရိုၚ် PBS ရ။

Ref: Reuters