ပ္ဍဲတွဵုရးကယာ( ကရေၚ်ဍာဲ) စချဳဒရာၚ်ဒၟံၚ်ပေါဲဗတိုက်သီဗဒိုပ်

လွိုၚ်ကဝ်၊ နဝ်ဝေမ်ဗာ (၁၂)

မွဲကရောံကဵုပရေၚ်ချဳဒရာၚ်ပၞာန် ၁၀၂၇ ဂှ် ဒပ်စဵုဒၞာကောန်ဂကူကရေၚ်ဍာဲ KNDF ကေုာံ ဂကောံဒပ်ပံၚ်ကောံ ပါလုပ်သီု ဒပ်မဟာမိတ်တအ်ဂှ် သ္ပတံနူ ဂိတုနဝ်ဝေမ်ဗာ စၟတ်တ္ၚဲ (၁၁) တုဲ စချဳဒရာၚ်ဒၟံၚ်ပေါဲဗတိုက်သီဗဒိုပ်ရ။

ဂကောံပံၚ်ကောံ ဇြဟတ်ပၠန်ဂတးတအ်ဂှ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၁) ပ္ဍဲအခိၚ် ၜိုတ် (၆) နာဍဳကဝက်ဂှ် စထ္ပက်ပၞာန် ဗတိုက်လဝ် ဗဒိုပ်ကံၚ်ဇြဳပၞာန် မၞုံမွဲပွဳပွူလွိုၚ်ကဝ်တအ်ရ။

အခိၚ်လၟုဟ်ပြဟ်ဟ်ဏံ သီဂွံလဝ် ဗဒိုပ်ကံၚ်ဇြဳပၞာန် မၞုံလ္ပာ် လွိုၚ်ကဝ်၊ ဒဳမအ်ဇြော၊ ဏာမ်မေဝ်ခုံကဵု နာန်သာန်ခါမ်တအ် (၇) ဗဒိုပ်တုဲ ဗဒိုပ်တၞဟ်တအ်ဂှ်လေဝ် သွက်ဂွံထပ်သီကေတ်မာန် ဆက်လုပ်ဒၟံၚ်ပေါဲဗတိုက်ရဂှ် ဂကောံမဟာမိတ်ကောဒေံ (၃) ဂကောံ လလောၚ်တြးလဝ် ပ္ဍဲအခိၚ်ဒေါဝ်တ္ၚဲ တ္ၚဲဏံရ။

ဒပ်စဵုဒၞာကောန်ဂကူကရေၚ်ဍာဲ KNDF လေဝ် ဟိုတ်နူအကာဲအရာပၞာန် က္တဵုဒှ်ဒၟံၚ် ပ္ဍဲဍုၚ်လွိုၚ်ကဝ် တွဵုရးကရေၚ်ဍာဲတုဲ ညံၚ်ဟွံဂွံသုၚ်စောဲ ဂၠံၚ်သ္ကုတ် လွိုၚ်ကဝ် – ဒဳမအ်ဇြော၊ လွိုၚ်ကဝ် -မိုဝ်ဗျာ ကဵုလွိုၚ်ကဝ် – ဇြဳဇြိုၚ်တအ်ဂှ် လၟေၚ်ဒုၚ်ဂုဏ် အာတ်မိက် လဝ်ရ။

အခိၚ်လၟုဟ်ဏံ ပ္ဍဲကဵုဒေသကိုဝ်က ကေုာံ ဒေသတအာၚ် မဒှ်ဒၞာဲ ဒ္တန်သန္ဓိပရေၚ်ချဳဒရာၚ်ပၞာန် ၁၀၂၇ ဂှ် ဒပ်ကံၚ်ဇြဳပၞာန်ကဵု ဒပ်မဟာမိတ်ကောဒေံတအ် ပေါဲဗတိုက်ဆက်က္တဵုဒှ်ဒၟံၚ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြး ဂကောံကောဒေံ (၃) ဂကောံတအ်ရ။

ဗဒိုပ်ကုန်ကံၚ်ဇြဳပၞာန် နူဂကောံကောဒေံ (၃) ဂကောံ သီကေတ်လဝ်တအ်ဂှ် ၜိုန်ရလ္ပာ်သၞ ဂ္စာန်ပ္တိတ်ဒၟံၚ်ဇြဟတ် သွက်ဂွံက္လေၚ်ကေတ်မာန်ပၠန်ကီုလေဝ် ပ္ဍဲဗလးမုက်တိဂှ် ဟိုတ်နူဟွံစိုပ်တရဴဴတုဲ ဒးဗတိုက်ဒၟံၚ်ကဵု ဍာန်ကျာ ဗွဲအဓိကရဂှ် ဟီုလဝ်ရ။

ပ္ဍဲလ္ပာ်ကွောန်လုမ်၊ လောက်ကိုၚ် ကဵုနောၚ်ၛောတအ်ဂှ် ပရေၚ်ဒပ်ကံၚ်ဇြဳပၞာန် ဗတိုက်ဒၟံၚ်ဍာန်ကျာတအ်ဂှ် ပ္ဍဲမွဲမွဲတ္ၚဲ အောန်အိုတ် (၂၀) ဝါလ္ပာ်လ္တူ နွံဒၟံၚ်တုဲ ပ္ဍဲကဵုတ္ၚဲလ္ၚဵုတအ်မ္ဂး ပ္ဍဲဍုၚ်ကွောန်လုံမွဲဒၞာဲဓဝ်ဂှ် ပွိုၚ်မွဲတ္ၚဲ ပန်ပှော်လဝ်ကဵုက္ၜၚ်ကျာ လၟိဟ်စဵုကဵု ဗ္ဒာဲ (၉၀) ဝါ နွံရ။

ညးမၞုံအခေါၚ်ဟီုဂးကံၚ်ဇြဳပၞာန် ဂအုပ်ဗိုလ်ဇြဝ်မေန်ထောန်ဂှ်မ္ဂး သွက်ဂွံက္လေၚ်ကေတ် ဒၞာဲဒးဗလးလဝ်တဲတအ်ဂှ် ကၠောန်ရေၚ်တၠုၚ်အာ ပရေၚ်ပလန်တဲ အရာနွံပၟိက်တအ်ရောၚ်ဂှ် ကြဵုဇာလဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၀) ရ။

ပရိုၚ် – သြၚ်လောန်တိုၚ်မ်

ဗီု – KNDF