ပ္ဍဲရးဒေသတၞၚ်သြဳ ညးဒှ်ဒဒိုက်ပါဲပၞာန် စဵုကဵု ၅၅,၀၀၀ ထပ်ဂၠိုၚ်တိုန်ကၠုၚ်

တၞၚ်သြဳ၊ နဝ်ဝေမ်ဗာ (၁၂)

ပ္ဍဲရးဒေသတၞၚ်သြဳဂှ် ပ္ဍဲမွဲကာလဒပ်ပၞာန်သီအဝဵုဏံ မွဲကရောံကဵု ပဋိပက္ခရပ်လွဟ်ဂှ် ဟိုတ်နူပေါဲဗတိုက်ၜါလ္ပာ်တအ်တုဲ ညးဒှ်ဒဒိုက်ပါဲဘဲပၞာန် စဵုကဵု ၅၅,၀၀၀ ပြၚ် ထပ်ဂၠိုၚ်တိုန်ကၠုၚ်ရဂှ် ဂကောံသုတေသန FE5 Tanintharyi လလောၚ်တြးပ္တိတ်လဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၁) ရ။

အတိုၚ်လိက်ဒုၚ်စဳရေၚ် FE5 Tanintharyi ဂှ်မ္ဂး ပ္ဍဲရးဒေသတၞၚ်သြဳ ညးဍုၚ်ကွာန်ပါဲဘဲပၞာန် ၄၅,၀၀၀ ပြၚ် နွံဒၟံၚ်တုဲ ပ္ဍဲကဵုဂိတုအံက်တဝ်ဗာဂှ် ညးပါဲဘဲပၞာန် မွဲလက်ပြၚ် ထပ်ဂၠိုၚ်တိုန်ကၠုၚ်လဝ်ဂှ်ရ ညးဒှ်ဒဒိုက်ပါဲပၞာန် စဵုကဵု ၅၅,၀၀၀ ပြၚ် နွံကၠုၚ်ရဂှ် ဓမံက်ထ္ၜးလဝ်ရ။

ညးဍုၚ်ကွာန်ပါဲဘဲပၞာန်တအ်ဂှ် ဟိုတ်နူပရေၚ်က္လိဂွံ အရီုဗၚ်ဗ္စာရဏာပရေၚ်မၞိဟ် အောန်စှ်ေကၠုၚ်ဒၟံၚ်တုဲ ဟိုတ်နူကံၚ်ဇြဳပၞာန် တာဒၞာဒၟံၚ်တုဲ ပရေၚ်ဂွံက္လိဂွံအရီုဗၚ် သာတုဲ ခက်ခုဲဝါတ်ဂါတ်ကၠုၚ်ရဂှ် ဓမံက်ထ္ၜးလဝ် ပ္ဍဲလိက်ဒုၚ်စဳရေၚ်ရ။

ပ္ဍဲကဵုဂြိုပ်ဗၟံက်ထဝါဲ၊ ပွိုၚ်ဍုၚ်တၞၚ်သြဳ ကေုာံ ပွိုၚ်ဍုၚ်ပလဝ်တအ်ဂှ်လေဝ် ဟိုတ်နူလ္ပာ်ကံၚ်ဇြဳပၞာန် ပိုၚ်ခြာလဝ် အခေါၚ်ပ္ဍိုက်ဏာနၚ် သ္ၚု၊ ဇွောံမ၊ ကေုာံဂဥုဲဇဗတအ်ဂှ်ရ သာတုဲ နွံဒၟံၚ်ပၟိက် အရီုဗၚ်ဇွောံမစၞစ သွက်ညးပါဲဘဲပၞာန်တအ်ရဂှ် ဟီုလဝ်ရ။

ပ္ဍဲကဵုဂိတုအံက်တဝ်ဗာဂှ် ပ္ဍဲရးဒေသတၞၚ်သြဳ သ္ၚိဒၟံၚ် (၄၄) မ ဒးဒုၚ်စံၚ်ပလီုလဝ်တုဲ ပရေၚ်ဒးဒုၚ်စံၚ်ပလီုလဝ်ဗီုဏံ ပ္ဍဲကဵုပွိုၚ် (၃) ဂိတုတုဲကၠုၚ်ဏံ ဒှ်လၟိဟ်ဂၠိုၚ်အိုတ်ရဂှ် ဂွံတီကေတ်ရ။

ပရေၚ်ဒးဒုၚ်ရပ်ဒက်တအ်ဂှ်မ္ဂး ဟိုတ်နူကံၚ်ဇြဳပၞာန် ထ္ၜးဟိုတ်နာနာသာ် ရပ်ကေတ်ဒၟံၚ်တုဲ ကောန်အရာပ် ဟွံအောန်နူ (၂၃၀) တၠ ဒးဒုၚ်ရပ်လဝ်တုဲ ၜိုန်ရကလေၚ်ဗၠးတိတ်ကၠုၚ်လဝ် (၁၇၆) ကီုလေဝ် ဒးဒုၚ်ပြိုက်ဂစိုတ်လဝ် (၉) တၠရ။

အတိုၚ်ပရေၚ်ပေါဲဗတိုက်က္တဵုဒှ်လဝ်မ္ဂး ပ္ဍဲကဵုဂိတုအံက်တဝ်ဗာဂှ် အကြာဒပ်ကံၚ်ဇြဳပၞာန်ကဵု ဒပ်စဵုဒၞာညးဍုၚ်ကွာန်တအ် လၟိဟ်ပေါဲဗတိုက် (၃၄) ဝါ ဒှ်လဝ်တုဲ ပရေၚ်ဖံက်ခတိုဟ်လဝ်မာၚ် က္တဵုဒှ်လဝ် (၇) ဝါရဂှ် ဂွံတီကေတ်အတိုၚ်တၚ်လလောၚ်တြးရ။

အလုံမွဲကၟိန်ဍုၚ်ဂှ်မ္ဂး ပ္ဍဲမွဲကာလသီအဝဵုဏံ ပံၚ်လၟိဟ်ပေါဲဗတိုက် စဵုကဵု ၁၁,၀၀၀ ဝါပြၚ် က္တဵုဒှ်လဝ်ရဂှ် ဂကောံသုတေသန ISP – Myanmar လလောၚ်တြးပ္တိတ်လဝ် လိက်ဒုၚ်စဳရေၚ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၀) ရ။

ပရိုၚ် – သြၚ်လောန်တိုၚ်မ်

ဗီု – CJ/ ဒဝ်န တၞၚ်သြဳ