ကျာ်မြဟ်၊ နဝ်ဝေမ်ဗာ (၁၂)
ပ္ဍဲဗ္ဒာဲပွဳပွူကွာန်ၜါသွာၚ် ပွိုၚ်ဍုၚ်ကျာ်မြဟ် တွဵုရးဍုၚ်မန်ဂှ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတအ် ပေါဲဗတိုက်သ္ကာတ်မြဟ် ဆက်ဒှ်ဒၟံၚ် ပွိၚ် (၂) တ္ၚဲဆက်က်ရဂှ် ဂွံတီကေတ် အတိုၚ်တၚ်ညးဒေသတအ် ဟီုလဝ်ရ။
သ္ပတံနူဂိတုနဝ်ဝေမ်ဗာ စၟတ်တ္ၚဲ (၁၀) တုဲ နူကဵုဂကောံဇြဟတ်ပၠန်ဂတးပံၚ်ကောံတအ် လုပ်စိုပ်ဗတိုက်လဝ် ဗဒိုပ်ဗၠာဲသၟိၚ် ကေုာံ သၞေဟ်ကၚ်ဒဒန် သၟဝ်တဲကံၚ်ဇြဳပၞာန် မၞုံကွာန်ၜါသွာၚ်ဂှ် ပေါဲဗတိုက်သ္ကာတ်မြဟ်လဝ် ကြပ်ဒှ် အလုံပွိုၚ်မွဲတ္ၚဲရ။
ပေါဲဗတိုက်ဏံဂှ် ပ္ဍဲကဵုတ္ၚဲဏံ ဂိတုနဝ်ဝေမ်ဗာ စၟတ်တ္ၚဲ (၁၁) ဂှ်လေဝ် ထပ်ဒှ်လဝ်တုဲ ဟိုတ်နူပရေၚ်ပန်ပှော်လွဟ်ဇၞော်ၜါလ္ပာ်တုဲ ကောန်ဒေသညးဍုၚ်ကွာန် ဂၠိုၚ်ကဵုလ္ၚီ ဒးဒုၚ်ကၟာတ်ဂွံလဝ် ပ္ဍဲကဵုပေါဲဗတိုက်ဂှ်ရ။
ညးဒေသမွဲတၠဂှ်မ္ဂး ဟိုတ်နူပေါဲဗတိုက်ၜါလ္ပာ်တုဲ ညးလဵုလေဝ် ဟွံဂံၚ်တိတ်နူမ္ၚးသ္ၚိတုဲ သ္ၚိဒၟံၚ်လ္ၚဵုဂှ် ညာတ်သၟုက်ယက်မ္ဂး ဟိုတ်နူဂွိၚ်ဖေက်လ္ပာ်ဒပ်ကံၚ်ဇြဳပၞာန် ပန်ဖျေံလွဟ်ဇၞော်တုဲ ပုၚ်လေဝ် ဟွံဂံၚ်ဍုန်စညးသ္ကအ်ရဂှ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ဟိုတ်နူပေါဲဗတိုက်ဆက်သ္ကာတ်မြဟ်ဒၟံၚ်တုဲ ကောန်ဒေသ ညးဍုၚ်ကွာန်တအ်ဂှ် ၜိုန်ရမိက်ဂွံဂြိပ်ဒဴဴ ပါဲဓလေတ် ပ္ဍဲဒၞာဲဗၠးဘဲကီုလေဝ် ဟိုတ်နူပရေၚ်ဒပ်ၜါလ္ပာ်ကၟာတ်ဆိုအ်လဝ်တုဲ သွက်ဂွံပါဲပၞာန်ဂှ် ဒးဆဵုဂဗဒၟံၚ်အခက်အခုဲရ။
ပ္ဍဲကဵုပေါဲဗတိုက်ဒှ်ဒၟံၚ်လၟုဟ် တ္ၚဲတုဲတေံဂှ် နူကဵုလ္ပာ်ဒပ်ကံၚ်ဇြဳပၞာန် ကၠုၚ်ပန်လဝ်ကဵုက္ၜၚ်ကျာပၞာန် (၂) ဖ္ဍိုက်တုဲ နူကဵုဒပ်အမၠံက်ကံၚ်ဇြဳပၞာန် ဖျေံသ္ဇိုၚ်မုဟ်ဍုၚ်လေဝ် ပန်ရီုလဝ်ကဵုလွဟ်ဇၞော် အဆက်ဟွံပိုတ်သ္ကုတ်ရ။
ပ္ဍဲကဵုပေါဲဗတိုက်ၜါသွာၚ်ဂှ် ဟိုတ်နူဒးလဝ်လွဟ်ဇၞော် သ္ၚိဒၟံၚ်မွဲမ ဒးတူပၟတ်လီုလာ်အာလဝ်တုဲ မၞိဟ်တြုံကောန်ဒေသမွဲတၠဂှ်လေဝ် ဒးလဝ်ဘဲဝပ် ကဝေက်မာၚ်ရဂှ် ဂွံတီကေတ်ရ။
စပ်ကဵုအကာဲအရာပေါဲဗတိုက်ၜါသွာၚ်တုဲ ပါဲနူဂကောံဇြဟတ်ပၠန်ဂတးတအ်ဂှ် လ္ပာ်ဒပ်ကံၚ်ဇြဳပၞာန်လေဝ် လလောၚ်တြးပ္တိတ်လဝ် တၚ်လလောၚ်တြး မမိက်ကဵုမွဲမွဲ ဟၟဲဏီရ။
ပ္ဍဲကဵုၜါသွာၚ် ဟိုတ်နူပေါဲဗတိုက်ဆက်သ္ကာတ်မြဟ်ဒၟံၚ်တုဲ ကၟာတ်စဵုဒၞာလဝ် အခေါၚ်သုၚ်စောဲအာကၠုၚ် ဂၠံၚ်ကျာ်မြဟ်- လှာဒကှ်ရဂှ် ဂွံတီကေတ် နူညးဒေသတအ်ရ။
ပရိုၚ် – သြၚ်လောန်တိုၚ်မ်
ဗီု – Social Media
sanlontai