သဳကၠဳဒၟံၚ် သွက်ဂွံသၠုၚ်ပ္တိုန် ပရေၚ်ပံၚ်တောဲပရေၚ်ပၞာန် ကြုက်ကဵုသေံၜါဍုၚ်

ၜၚ်ကံက်၊ နဝ်ဝေမ်ဗာ (၁၂)

ဒပ်ပၞာန်ဝၚ်နန်သေံဂှ် မွဲကရောံကဵုမိတ်ပွံၚ်ပၞာန်ကြုက်တအ်မွဲစွံ သွက်ဂွံပံၚ်တောဲကၠောန်ဗဒှ် အစဳဇန်လ္ၚတ်ပရေၚ်ပၞာန် Exchange မာန်ကီု သွက်သၠုၚ်ပ္တိုန်ပရေၚ်ပံၚ်တောဲ အရၚ်ဒတုဲဖိုလ်ပ္ဍဲဒေသအာဇြဳဂှ် သဳကၠဳဒၟံၚ်ညးသ္ကအ်ရ။

ပ္ဍဲပေါဲသဳကၠဳဏံဂှ် သ္ကိုပ်ပၞာန်ဇၞော် ဒပ်ပၞာန်ဝၚ်နန်သေံ ဗိုခကျဳ ဂျရွောန်ဆိုၚ်ဟေန်တောၚ်ဂှ် ဒုၚ်လဝ်တၠုၚ် ဂအုပ်ဗိုလ် သ္ကိုပ်ဒပ် ဒပ်ပၞာန်ဗၠးၜးညးဍုၚ်ကွာန်ကြုက် လဳချောၚ်မေန် နဒဒှ်ကၟုဲ ဒပ်ပၞာန်ဝၚ်နန်သေံရ။

သ္ကိုပ်သ္ကပၞာန်ၜါလ္ပာ်တအ်ဂှ် သဳကၠဳလဝ် အခေါၚ်ရာ သၠဲပ္တိတ် အစဳဇန် Exchange ပရေၚ်လ္ၚတ်ဗ္တောန်ထ္ၜး ဆေၚ်ကဵုပရေၚ်ပၞာန် သရောပ်ကဵုအကာဲအရာဆေၚ်စပ် အလုံသီုဖအိုတ်မာန်တအ်ရဂှ် ဂွံတီကေတ်ရ။

အစဳဇန်သၠာဲဂတးပရေၚ်ပၞာန်ဂတးဂတန် ကြုက်-သေံတအ်ဂှ် ပါဲနူဘာတက္ကသိုလ်(academy) ပရေၚ်ပၞာန်ဝၚ်နန်ကျွောန် ကလောက်၊ ပရေၚ်ကောပ်ကာဲ ကေုာံ ညးယိုက်ဝန်ကဝ်လိက်တအ်တုဲ ဗ္တောန်ဖျောန်ဒၟံၚ် ပ္ဍဲကဵုကဝ်လိက် ပရေၚ်စဵုဒၞာကောန်ဂကူတအ်ရ။

ပ္ဍဲသတ္တာဟသ္ကုတ်ကၠာဏံဂှ် သ္ကိုပ်ပၞာန်ဇၞော်လဳ အာစိုပ်လဝ် ဇရေၚ်သ္ကိုပ်ဗိုလ်ဇၞော် ဇြောန်ဝါမ်နွောန်ဖဲခဒဳ က္ဍိုက်က္ဍိုပ်ပရေၚ်စဵုဒၞာဒပ်ပၞာန် ဨကရာဇ်သေံတုဲ သဳကၠဳလဝ် အစဳဇန်သုတေသနပရေၚ်ပံၚ်တောဲပၞာန် ကေုာံ အစဳဖန်ပ္ကတ်ပ္ကေၚ်ရဂှ် ဂွံတီကေတ်ရ။

နူကဵုဂိတုနဝ်ဝေမ်ဗာ စၟတ်တ္ၚဲ (၆) စဵုကဵုစၟတ်တ္ၚဲ (၉) ဂှ်ပ္ဍဲကဵုခရိုၚ်ဒေသန္တရနွောန်ထပူရဳ ကၟိန်ဍုၚ်သေံဂှ် ကၠောန်ဗဒှ်လဝ် ပေါဲပရေၚ်စဵုဒၞာ ကေုာံ ပရေၚ်ဂီုကၠီုတုဲ ပ္ဍဲကဵုပေါဲဂှ် ကၟိန်ဍုၚ်ကြုက်လုပ်ထ္ၜးပျးလဝ် နဲကဲကွတ်ပညာစဵုဒၞာဂတာပ်ခေတ် ရေၚ်တၠုၚ်ပလန်တဲ ပရေၚ်ဘပဠဇြိုက်ဗာရ။

Ref – The Nation Thailand