ပ္ဍဲပေါဲဗတိုက် ခရိုၚ်တံၚ်ဥူ KNU သ္ၚိဒၟံၚ် ၂၅ မ ဒးဒုၚ်စံၚ်ပလီုလဝ်

တံၚ်ဥူ၊ နဝ်ဝေမ်ဗာ (၁၄)

ပ္ဍဲကဵုပေါဲဗတိုက်ၜါလ္ပာ် ဒှ်လဝ်အကြာကွာန်ယှာန်ပျုမ်ချောၚ်ကဵု ကွာန်ကယာပျုမ်ချောၚ် ခရိုၚ်တံၚ်ဥူ ဒပ်မဟာ ၂ ဗော်သွးကောန်ဂကူကရေၚ် KNU ဂှ် ဒပ်ကံၚ်ဇြဳပၞာန် စံၚ်ပလီုဏာလဝ် သ္ၚိဒၟံၚ် ၂၅ မရဂှ် ဂွံတီကေတ် နူတံရိုဟ်တၚ်ဂၞၚ်ပရိုၚ် ဒေသတအ်ရ။

အကြာဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၂) ဂှ်ကဵု ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တအ် ပေါဲဗတိုက် ၜါလ္ပာ် ဒှ်လဝ်အကြာကွာန်ယှာန်ပျုမ်ချောၚ်ကဵု ကွာန်ကယာပျုမ်ချောၚ် လအ်ပွိုၚ် (၃) နာဍဳရ။

ပ္ဍဲတ္ၚဲဂှ် နူကဵုအခိၚ်တ္ၚဲစေၚ် (၂) နာဍဳ စဵုကဵု အခိၚ် (၅) နာဍဳဇိုၚ်သဝ်တ္ၚဲ ပေါဲဗတိုက်ၜါလ္ပာ် ဒှ်လဝ်တုဲ လ္ပာ်ဒပ်ကံၚ်ဇြဳပၞာန် ဒးချိုတ်လဝ် နွံဗွဲမဂၠိုၚ်ရဂှ် ဂွံတီကေတ်ရ။

ကၠုၚ်ပ္ဍိုက်ကေတ်ဏာလဝ် ကောန်ဒပ်ကံၚ်ဇြဳပၞာန် ဒးချိုတ်လဝ် ပ္ဍဲပေါဲဗတိုက်တအ် ကဵုကွဳစက် ၂ ဖ္ဍိုက်ရဂှ် ၜိုန်ညးဒေသတအ် ဟီုဂးဒၟံၚ်ကီုလေဝ် လၟိဟ်ချိုတ်တ်ပၠိုတ်တ်ဂှ်မ္ဂး ဟွံဂွံတီကေတ်လဝ်ဏီရ။

ကြဴနူပေါဲဗတိုက် ဒှ်လဝ်တုဲဂှ် ဒပ်ကံၚ်ဇြဳပၞာန် စံၚ်ပလီုဏာလဝ် သ္ၚိဒၟံၚ် မၞုံကွာန် ကယာပျုမ်ချောၚ် (၂၅) မတုဲ တိရစ္ဆာန်လွဳလဝ် ပ္ဍဲသ္ၚိတအ်ဂှ်လေဝ် ဂစိုတ်လဝ်တုဲ ပါဲနူဂှ် သီုပန်ပှော်လဝ်လွဟ်ဇၞော် ကြာန်န်ဒၟာန်ဒၟာန်ရဂှ် တံရိုဟ်တၚ်ဂၞၚ်ပရိုၚ်တိဍာ်တအ် ဟီုလဝ်ရ။

ဟိုတ်နူပေါဲဗတိုက်ၜါလ္ပာ်တုဲ ညးဒေသ နူကွာန် မပ္တံကဵုကယာပျုမ်ချောၚ်၊ ယှာန်ပျုမ်ချောၚ်၊ ယျေတွောန်ကုမ်တအ် ၜိုတ် ၃၀၀ ဒးဂြိပ်ဒဴဴပါဲဓလေတ်ဒၟံၚ် ဒၞာဲဗၠးဘဲရဂှ် ဂွံတီကေတ်ရ။

ပရိုၚ် – သြၚ်လောန်တိုၚ်မ်

ဗီုရုပ် -Thaw Thi Kho