ကျာ်မြဟ်၊ နဝ်ဝေမ်ဗာ (၁၄)
ဒပ်ပံၚ်ကောံ ဂကောံဇြဟတ်ပၠန်ဂတးတအ် ဗတိုက်သီကေတ်လဝ် ဗဒိုပ်ဗၠာဲသၟိၚ်တိဍာ်ၜါသွာၚ်ကဵု သၞေဟ်ကၚ်ဒဒန် မၞုံကွာန်ၜါသွာၚ် တွဵုရးဍုၚ်မန်၊ ပွိုၚ်ဍုၚ်ကျာ်မြဟ် မာန်လဝ်ရဂှ် ညးတာလျိုၚ်ဒပ်ဗၠာဲသၟိၚ်ကံၚ်ဇြဳပၞာန် ဟွံမိက်ဓမံက်ထ္ၜးယၟုမွဲတၠဂှ် ဟီုသ္ပလဝ်ဒ္တန်လဝ်ကဵု သြန်လောန်တိုၚ်မ်ရ။
ဗဒိုပ်ၜါဗဒိုပ်ဏံဂှ် ဒပ်ပံၚ်ကောံ ဂကောံဇြဟတ်ပၠန်ဂတး ပါလုပ် သီုဒပ်ပၞာန်ဗၠးၜးကောန်ဂကူကရေၚ် KNLA တအ် စဗတိုက်လဝ် ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၀) ဂှ်တုဲ တ္ၚဲဏံ ဂိတုနဝ်ဝေမ်ဗာ စၟတ်တ္ၚဲ (၁၃) အခိၚ်ဒေါဝ်တ္ၚဲဂှ် သီကေတ်လဝ် ပေၚ်ၚ်မာန်ရ။
“ဗဒိုပ်ဗၠာဲသၟိၚ်ကီု၊ သီုကဵုဗဒိုပ်သၞေဟ်ကၚ် စှ်ေအာယျ၊ သွက်ဂွံထပ်ဗလးပၞာန်ရီုဂှ် ပလေဝ်ပလေတ်ဒၟံၚ်၊ ပရေၚ်ဇီုကပိုက်ချိုတ်ဂျိုၚ် သောဲသောဲဗြောဲဗြောဲဂှ် ဟွံတီဏီရ” ဂှ် သၞာဲဒဴဗၠာဲသၟိၚ်ဟွံမိက်ဓမံက်ထ္ၜးယၟုမွဲတၠဂှ် ဟီုလဝ်ရ။
ကြဴဴနူဒးဒုၚ်သီကေတ်လဝ်ဗဒိုပ်တုဲဂှ် နူကဵုကံၚ်ဇြဳပၞာန် ကၠုၚ်ပန်ပှော်လဝ် ပ္ဍဲကဵုအကြာပွဳဗွိုၚ်ကွာန် မပ္တံကဵုၜါသွာၚ်၊ ပှ်လှ်၊ အတ္ထရံ ကဵုက္ၜၚ်ကျာ ဗ္ဒာဲ (၈) ဝါတုဲ ဗျူဟာမုဟ်ဍုၚ်လေဝ် ပန်ဖျေံဒၟံၚ်လွဟ်ဇၞော် အဆက်ဟွံပိုတ်သ္ကုတ်ရဂှ် ဂွံတီကေတ် နူညးဒေသတအ်ရ။
အတိုၚ်ဖိုၚ်ရုပ်ဂမျိုၚ် ပြးတိုန်ကၠုၚ် ပ္ဍဲဇာနှိက်ပရေၚ်မၞိဟ် အခိၚ်ဇိုၚ်သဝ်တ္ၚဲ ပ္ဍဲတ္ၚဲဏံဂှ်မ္ဂး ဂွံဆဵုကေတ် ပရေၚ်ချဳဒရာၚ် ဒုၚ်ဒၟံၚ်ပေါဲအံၚ်ဇၞး ပ္ဍဲလ္တူဒဒန်အတ္ထရံ (ၜါသွာၚ်) သီုကောန်ဒပ်ကံၚ်ဇြဳပၞာန် ရပ်ဂွံလဝ် ဗ္ဒာဲၜိုတ် (၁၅) တၠရ။
အတိုၚ်တံရိုဟ်တၚ်ဂၞၚ်ပရိုၚ် ပ္ဍဲဗလးမုက်တိမ္ဂး ကံၚ်ဇြဳပၞာန် ဒးဒုၚ်သီလဝ်ဗဒိုပ်ဂှ် ညံၚ်ဒပ်ဂကောံပၠန်ဂတးတအ် ဟွံဂွံၜက်ၜေတ်အာ လ္ပာ်မုဟ်ဍုၚ်တေံဂှ် တြးလဝ်ဒပ် ပ္ဍဲလ္ပာ်ခ္ဍးတုဲ ပလေဝ်လဝ်ပၞာန်ဒုၚ်ရဂှ် ဟီုလဝ်ရ။
ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၂) တ္ၚဲဒှ်လဝ်ပေါဲဗတိုက် တ္ၚဲတုဲတေံ အခိၚ်နူဂယး ၜိုတ် (၁၁) နာဍဳပြၚ်ဂှ် ပ္ဍဲလ္ပာ်ကွာန်ၜါသွာၚ်၊ ပရၚ်ဖာသီကဵု ကွာန်ပှ်လှ် တအ်ဂှ် နူဒပ်ကံၚ်ဇြဳပၞာန် ဟိုတ်နူပန်ဖျေံလဝ်လွဟ်ဇၞော်တုဲ ကောန်ၚာ်ကွာန်ပှ်လှ်ၜါတၠ ဒးချိုတ်လဝ်တုဲ သ္ၚိဒၟံၚ်တအ်လေဝ် ဇီုကပိုက် ဒးလီုလာ်လဝ် နွံရ။
ဟိုတ်နူပေါဲဗတိုက်ၜါလ္ပာ်ဒှ်ဒၟံၚ်တုဲ ကောန်ဒေသ ညးဍုၚ်ကွာန်တအ်ဂှ် ဟွံဂံၚ်တိတ်မ္ၚးတုဲ ဒးအောပ်မာဒၟံၚ် ပ္ဍဲကွာန်တအ်ဟေၚ်တုဲ ကောန်ဒေသ ညးဍုၚ်ကွာန် ဒးဒုၚ်ကၟာတ်ဂွံလဝ် ပ္ဍဲကဵုပေါဲဗတိုက် နွံဒၟံၚ်ဗွဲမဂၠိုၚ်ရဂှ် ကောန်ကွာန်ၜါသွာၚ်လ္ၚဵုဂှ် ဟီုလဝ်ရ။
စပ်ကဵုအကာဲအရာပေါဲဗတိုက်ၜါသွာၚ်တုဲ ပါဲနူဒပ်ကံၚ်ဇြဳပၞာန်တုဲ လ္ပာ်ဂကောံဇြဟတ်ပၠန်ဂတးတအ်လေဝ် လလောၚ်တြးပ္တိတ်လဝ် မမိက်ကဵုမွဲမွဲ ဟၟဲဏီရ။
ဟိုတ်နူပေါဲဗတိုက်ၜါသွာၚ်တုဲ ညံၚ်ဟွံဂွံအာကၠုၚ် ပ္ဍဲဂၠံၚ်သ္ကုတ် မပ္တံကဵုဂၠံၚ်ဆုကၠ-တၟံဗြဴ-ၜါသွာၚ်၊ ဂၠံၚ်ၜါသွာၚ်-လှာဒကှ်၊ ဂၠံၚ်တၟံဗြဴ-အခၠဵုတခေါန်ဒေၚ်၊ ဂၠံၚ်ၜါသွာၚ်-ကျုံကွေဝ်-ထဳကလေအ်၊ ဂၠံၚ်ကွဳစက် ဒဵုခရီု-ဖာသီ-ကျုမ်ကွေဝ် တအ်ဂှ် ညးဒေသတအ် ကဵုလဝ်သမ္တီရ။
ပရိုၚ် – သြၚ်လောန်တိုၚ်မ်
ဗီု – PDF
sanlontai