ပ္ဍဲပေါဲဗတိုက်ရခေၚ် တ္ၚဲပထမ AA သီဂွံ ဗဒိုပ်မၚ်ပယျဵုကံၚ်ဇြဳပၞာန်၊ သီုရပ်ဂွံလဝ် သၞာဲဒဴကံၚ်ဇြဳပၞာန်လ္ၚဵု

သေတ်တွေ – နဝ်ဝေမ်ဗာ (၁၄)

ပ္ဍဲပေါဲပၞာန်ရခေၚ် တ္ၚဲပထမ ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၁၃) ဂှ် ဂကောံကောန်ဂကူရခေၚ်/ဒပ်ပၞာန်ရခေၚ် (ULA/AA) သီဂွံလဝ် ဗဒိုပ်ကံၚ်ဇြဳပၞာန်လ္ၚဵု ပါလုပ်သီုဗဒိုပ်ပၞာန်မၚ်ပယျဵု ယျတေံတံၚ် သီုကဵုမံၚ်တဝ်တုဲ သီုရပ်ဂွံလဝ် သၞာဲဒဴကံၚ်ဇြဳပၞာန်လ္ၚဵုတအ်ရဂှ် ဂွံတီကေတ်ရ။

“ပ္ဍဲဂိတုနဝ်ဝေမ်ဗာ စၟတ်တ္ၚဲ ၁၃ တ္ၚဲဏံဂှ် သီဂွံလဝ် ဒပ်မၚ်ပယျဵုမံၚ်တဝ်ရဂှ် အတိုၚ်အကာဲအရာဗလးမုက်တိတှ်ေ ဟီုသ္ပဒ္တန်ဂွံရ။ ပ္ဍဲလ္ပာ်မျောက်ဥူလေဝ် ပရေၚ်ပန်ပှော်လွဟ်ဇၞော်ဂတးဂတန် နွံဒၟံၚ်။ လ္ပာ်ဂှ် သၞာဲဒဴမဆေၚ်စပ်လ္ၚဵုဂှ်လေဝ် ရပ်ဂွံလဝ်ဂှ်လေဝ် ဂွံလဝ်ပရိုၚ်တၚ်ဂၞၚ် သ္ပဒ္တန်မာန်ရ” ဂှ် ညးဒေသ စုက်လုက်ကဵု ဂကောံကောန်ဂကူရခေၚ်/ဒပ်ပၞာန်ရခေၚ် (ULA/AA) မွဲတၠဂှ် ဟီုကဵုဌာန်ပရိုၚ် သြၚ်လောန်တိုၚ်မ်ရ။

စပ်ကဵုကိစ္စဏံတုဲ ညးမၞုံအခေါၚ်ဟီုဂး ဥူခိုၚ်သုခဂှ်မ္ဂး ခြာဟွံလအ်ဏံ လလောၚ်တြးပ္တိတ်အာ အကာဲအရာ သောဲသောဲသောဲဗြောဲဗြောဲရောၚ်ဂှ် ဟီုလဝ်ကဵုမဳဒဳယာ ပ္ဍဲဒေသရခေၚ်ဂှ်ရ။

ပ္ဍဲဂိတုနဝ်ဝေမ်ဗာ စၟတ်တ္ၚဲ (၁၃) အခိၚ်နူဂယး ၜိုတ် (၅) နာဍဳဂှ် ဗဒိုပ်ချုၚ်ခါလဳကဵု ဗဒိုပ်ဒုမ်ပိုက်ၜါဗဒိုပ် မၞုံလ္တူဂၠံၚ် အၚူမဝ်-မံၚ်တဝ် သ္ကုတ်သၠုၚ်ကျာ ပွိုၚ်ဍုၚ်ယျတေံတံၚ် မဒှ်ဗဒိုပ်ပၞာန်မၚ်ပယျဵုဂှ် ဒပ်ပၞာန်ရခေၚ် AA ထ္ပက်ပၞာန် ဗတိုက်သီကေတ်လဝ်ရ။

သ္အာၚ်နူဂှ်ပၠန် ရေၚ်ယာဉ်ကွဳစက်ကံၚ်ဇြဳပၞာန် လ္တူဂၠံၚ်ဇၞော်ကၟိန်ဍုၚ် မၞုံဗ္ဒာဲကွာန်ဖာပျိုဝ်(သၟဝ်) ပွိုၚ်ဍုၚ်မေန်ပျာမ္ၚးဂှ် ကောန်ဒပ်ပၞာန် (AA) တအ် ဗက်ဗတိုက်ပန်လဝ်ဂှ် ပရေၚ်ပန်ပှော်ၜါလ္ပာ် ဒှ်လဝ်တုဲ ကွဳစက်ပၞာန်ၜါဖ္ဍိုက် ဒးတူလဝ်တုဲ ကောန်ဒပ်လ္ၚဵုဂှ်လေဝ် ဒးဒုၚ်ရပ်လဝ် နွံရဂှ် ညးဒေသတအ် ဟီုလဝ်ရ။

ပ္ဍဲလ္တူဍုၚ်မျောက်ဥူလေဝ် ပရေၚ်ပန်ပှော်လွဟ်ဇၞော်ဂတးဂတန် ဒှ်လဝ်တုဲ ပရိုၚ်ဇီုကပိုက်ချိုတ်ဂျိုၚ်ဂှ်မ္ဂး စဵုကဵုဂိတုနဝ်ဝေမ်ဗာ စၟတ်တ္ၚဲ (၁၃)ဏံ သ္ပဒ္တန်ဟွံမာန်ဏီရဂှ် ဂွံတီကေတ်ရ။

ဟိုတ်နူအကာဲအရာပေါဲဗတိုတ်တအ်တုဲ ပ္ဍဲကဵုပွိုၚ်ဍုၚ် မပ္တံကဵုကျောက်တဝ်၊ မျောက်ဥူ၊ ပုဏ္ဏာကျောန်၊ တောၚ်ကုပ်၊ ယျတေံတံၚ်တအ်ဂှ် ကၟာတ်လဝ် မပ္တံကဵုဘာဗ္တောန်လိက်၊ ဖျာတအ်ရဂှ် ဂွံတီလဝ်ရ။

ဒပ်ကံၚ်ဇြဳပၞာန်လေဝ် ဟိုတ်နူကၟာတ်လဝ်ဂၠံၚ်ကုန်၊ ဂၠံၚ်ဍာ် မၞုံတွဵုရးရခေၚ်တအ် ဗွဲမဂၠိုၚ်ဂှ်ရ ညးအာတရဴလ္ၚဵုတအ်ဂှ် ဒးဒုၚ်ကၟာတ်ဂွံလဝ်ညးသ္ကအ်တုဲ အကြာဍုၚ်မွဲဍုၚ်ကဵုမွဲဍုၚ် ပ္ဍဲဒေသဂှ်လေဝ် အကာဲအရာဟွံဂွံအဆက်ညးသ္ကအ် ဒှ်ဒၟံၚ်ရ။

ပါဲနူဒၞာဲဒှ်ပေါဲဗတိုက်တအ်တုဲ ပ္ဍဲကဵုဒၞာဲလ္ၚဵုဂှ်မ္ဂး လာၚ်ဖုၚ်ကဵု လာၚ်အေန်တာနိတ် နွံဒၟံၚ်ဏီရဂှ် ဂွံတီကေတ် အတိုၚ်ညးဒေသတအ် ဟီုလဝ်ရ။

ဟိုတ်နူပေါဲဗတိုက်တုဲ ကွာန်ချုၚ်ခါလဳကဵု ကွာန်ဒုမ်ပိုက် မၞုံပွိုၚ်ဍုၚ်ယျတေံတံၚ်တအ်ဂှ် ဒးဂြိပ်ဒဴဴဒၟံၚ် အကြာဒဵု မၞုံဗ္ဒာဲဂှ်ကဵု ပ္ဍဲကွာန် ဇိုၚ်ၚ် ကရပ်ဂှ် ဒၞာဲဗၠးဘဲ သီုအလုံကွာန်တုဲ အပံၚ်လၟိဟ်မၞိဟ် ၜိုတ်ၜါလ္ၚီပြၚ် ဒးပါဲဓလေတ်ဒၟံၚ်ပၞာန်ရဂှ်လေဝ် ဂွံတီကေတ်ရ။

ပၞောဝ်ကဵုညးပါဲပၞာန်တအ်ဂှ် ဗွဲမဂၠိုၚ် ဒှ်မၞိဟ်ဗြဴကဵု ကောန်ၚာ်သၟတ်တအ်တုဲ နွံဒၟံၚ်ပၟိက် သွက်ညးဒေသပါဘဲပၞာန် သ္ပတံနူစၞစ၊ ဂဥုဲဇဗ ကေုာံကၟဳဗ္ဒၚ် စဵုကဵုယာတ်လ္တက်တအ်ရဂှ် ညးဒေသတအ်ဟီုလဝ်ရ။

အခိၚ်လၟုဟ်ဏံ ဟိုတ်နူကံၚ်ဇြဳပၞာန် ကၟာတ်လဝ်အခေါၚ်အာကၠုၚ်တုဲ နကဵုဂကောံအာစိုပ်ရီုဗၚ် ထံက်ပၚ် သွက်ညးပါဲဘဲပၞာန် ပ္ဍဲရခေၚ်တအ်ဂှ်လေဝ် ဒးဆဵုဂဗဒၟံၚ်ကဵု အကာဲအရာဝါတ်ဂါတ်ခက်ခုဲရ။

ပရိုၚ် – သြၚ်လောန်တိုၚ်မ်

ဗီု – AA