သၞာဲဒဴပၞာန် နူဒပ်အမၠံက်ကျောက်ထုမွဲတၠ လုပ်ကၠုၚ်ဖျေံလဝ်လွဟ် သီုကဵုလွဟ်လက်နက်

ကျောက်ထု – နဝ်ဝေမ်ဗာ(၁၄)

သၞာဲဒဴဒပ်ပၞာန် နူဒပ်အမၠံက်ကျောက်ထု၊ ရးဒေသမဂွေမွဲတၠဂှ် လုပ်ကၠုၚ်ဖျေံလဝ်လွဟ် ပ္ဍဲ Yaw Revolution Army သီုကဵုလွဟ်လက်နက်ဂှ်ရ ဖျေံလဝ်လာဘ်သြန် ကိုတ် (၅၀) ရဂှ် ညးတာလျိုၚ် YRA မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။

ပ္ဍဲကဵုဂိတုနဝ်ဝေမ်ဗာ စၟတ်တ္ၚဲ (၅) တုဲကၠုၚ်တေံဂှ် ဒုအရန်ဗိုလ်ကျဝ်သိုဝ်လှိုၚ် နူကဵုဒပ်အမၠံက်ကျောက်ထုဂှ် သီုလွဟ်လက်နက်မကမ် ကၠုၚ်ဖျေံလဝ်လွဟ် ပ္ဍဲ YRA ထဳလေန် ခရိုၚ်ကဂဝ် တံဒပ် (၁၅၊ ၁၆၊ ၁၇) ရ။

“ဗီုဍေံဟီုတှ်ေ ပ္ဍဲကဵုဒပ်ပၞာန်လေဝ် ဍေံတအ် ဒှ်ဒၟံၚ်ဒဒိုက်စိုတ်ကွေံကွေံမွဲတဲ။ တုဲပၠန် ဟွံမိက်မံၚ်မွဲသာ် ဒးမံၚ်ဒၟံၚ်ရ။ ဒၟာနူဂွံပတှ်ေစ ဝါတ်ဒၟံၚ်တုဲ ဍေံဟွံသ္ပ CDM ရ၊ လၟုဟ်ဒၟာနူဂွံအဆက်တုဲ သ္ပလဝ်ရ” ဂှ် တခေန်ဇြဝ် နူကဵု YRA တံဒပ် (၁၅၊ ၁၆၊ ၁၇) ခရိုၚ်ကဂဝ် ဟီုကဵုဌာန်ပရိုၚ်သြၚ်လောန်တိုၚ်မ်ရ။

ဒုအရန်ဗိုလ် ကျဝ်သိုဝ်လှာၚ်ဂှ် ပ္ဍဲကဵုညးလုပ်ကၠုၚ်ဖျေံလဝ်လွဟ် ပ္ဍဲ YRA ထဳလေန်ဂှ်မ္ဂး ဒှ်ညးကဆံၚ်သၠုၚ်အိုတ်တုဲ နူကဵုဒပ်ကျောက်ထု ညးမိက်ဂွံသ္ပ CDM နွံဗွဲမဂၠိုၚ်ရဂှ် ညးဟီုလဝ်ဏီရ။

မွဲကရောံကဵုဒုအရန်ဗိုလ် ကၠုၚ်သ္ပ CDM ဂှ် MA-3 မွဲဒကိုအ်၊ ဖျေဲမကမ် ၃ မ၊ မကမ် ၂၁၉ ဒကောၚ်၊ ပလောံဒၞာကမ် မွဲဂတှ်ေ ကေတ်နၚ်လဝ်ရဂှ် ဂွံတီကေတ်တုဲ ပလံၚ်ဗစိုပ်ဏာလဝ်ညး ပ္ဍဲတိဍာ်ဗၠးၜးမွဲဒၞာဲရဂှ် ဂွံတီကေတ်ရ။

ကြဴနူဒပ်ပၞာန်သီအဝဵုတုဲ ဗၠာဲသၟိၚ် ကေုာံကောန်ပၞာန် သ္ပကၠုၚ် CDM ပ္ဍဲ YRA ထဳလေန် နွံအကြာ (၂၅) တၠရဂှ် ဂွံတီကေတ်တုဲ ပလံၚ်ဗစိုပ်ဏာလဝ် ညးတအ် ပ္ဍဲတိဍာ်ဗၠးၜးတအ်ကီု သီုကဵုဒၞာဲညးတအ်မိက်ဂွံအာရဂှ် ဂွံတီကေတ်ရ။

ပရိုၚ် – သြၚ်လောန်တိုၚ်မ်

​ဗီု – YRA