ပ္ဍဲပေါဲဗတိုက်ကိုဝ်က သ္ကိုပ်စကခ ဂအုပ်ဗိုလ် ကံၚ်ဇြဳပၞာန် စကခ ၁၂ အောန်ဇြဝ်လေန် ဒးချိုတ်လဝ်

ကိုဝ်က – ဒဳဇြေမ်ဗာ (၈)

ပ္ဍဲကဵုပေါဲဗတိုက်သီဗဒိုပ် ကံၚ်ဇြဳပၞာန်ဖျေံလဝ်ဗဒိုပ် ပ္ဍဲကဵုဒၞာဲ မပ္တံကဵုမဝ်ထိုက်၊ ဇျှုမ်ကာန်၊ ကုမ်ကာန် ဒေသကိုဝ်ကသ္ကုတ်သၟဝ်ကျာ၊ တွဵုရးသေံ ဗ္ဒာဲပွိုၚ် (၃၀) သၞာံဂှ် ဟိုတ်နူ MNDAA ပန်ပှော်လဝ်တုဲ သ္ကိုပ်စကခ ကံၚ်ဇြဳပၞာန် စကခ ၁၂ ဒးချိုတ်လဝ်ရဂှ် ဓမံက်ထ္ၜးလဝ် ပ္ဍဲ The Kokang ရ။ 

ကြဴနူသီကေတ်ဗဒိုပ်တုဲဂှ် ဟိုတ်နူ MNDAA ဗိုၚ်ပန်ပှော်လဝ် ပ္ဍဲဒၞာဲကောန်ဒပ်ကံၚ်ဇြဳပၞာန်တအ် ဂြိပ်တိတ်အောပ်မာဒၟံၚ်တအ်ဂှ်တုဲ သ္ကိုပ်စကခ ကံၚ်ဇြဳပၞာန် စကခ ၁၂ ဒးချိုတ်လဝ်ရ။

ပ္ဍဲဂိတုဒဳဇြေမ်ဗာ စၟတ်တ္ၚဲ (၆) သွက်ဂွံဆက်ပသောၚ်သ္အး ကောန်ဒပ်ကံၚ်ဇြဳပၞာန် သှ်ေသၟေဟ်ဒၟံၚ်ဂှ် ဂွံညာတ်ကေတ်လဝ် ဇွကံၚ်ဇြဳပၞာန်မွဲတၠတုဲ ဂွံညာတ်ကေတ်လဝ် တဆိပ်ကဆံၚ်သ္ကိုပ်ဗိုလ် ပ္ဍဲကဵုဇွဂှ်တုဲ ညးဒးချိုတ်လဝ်ဏံ ဒှ်သ္ကိုပ်စကခ ၁၂ အောၚ်ဇြဝ်လေန်ရဂှ် သ္ပလဝ်ဒ္တန်ရ။ 

ပၞောဝ်ကဵုကောန်ဒပ်ကံၚ်ဇြဳပၞာန် ဖျေံလဝ်လွဟ် နူကဵုဗဒိုပ်ကုမ်ကျာန်တအ်ဂှ် ခလရ ၁၂၅ ဌာန်ဂအုပ်ပၞာန်ဒိုဟ်ဨသာန် ဖျေံလဝ်ဗဒိုပ်ဒ္တန်၊ စကခ ၁၂ ကဵု စကခ ၁၆ ဂြိပ်တိတ်ကၠုၚ် နူဒၞာဲမဝ်ထိုက်ကဵုဇျှုမ်ကာန် ပ္ဍဲဗဒိုပ်ကုမ်ကျာန်တအ် ပါလုပ်ဒၟံၚ်ရဂှ် ဂွံတီကေတ်ရ။ 

ကြဴနူဒပ်ကံၚ်ဇြဳပၞာန်တအ် ဂြိပ်တိတ်အာတုဲဂှ် အတိုၚ်လွဟ်လက်နက် သီဂွံလဝ်တအ်ဂှ်မ္ဂး ပ္ဍဲကဵုမွဲဒမြိပ် ဂကောံယှောက်ကိုၚ်ဂှ် ကောန်ဒပ်ကံၚ်ဇြဳပၞာန် ဒးဒုၚ်ပန်လဝ်တအ်ဂှ် ဒှ်တံဒပ် ၃၅၅ သၟဝ်တဲ စကခ ၁၂ ကဵု တံဒပ် ၆၉ တံဒပ် ၃၂၃ သၟဝ်တဲ စကခ ၁၆ ရဂှ် ဂွံတီကေတ်ရ။ 

သ္အာၚ်နူဂှ်ပၠန် ပ္ဍဲပေါဲဗတိုက်မုမ်ကိုဝ်ဂှ် နူကဵု MNDAA ယိုက်ဒၟံၚ်ပၞာန် သွက်ဂွံကလေၚ်သီကေတ် ကုန်ဗျူဟာမုမ်ကိုဝ်ဂှ် ပန်ပှော်လဝ် သ္ကိုပ်ၝောံဒပ်မာန်လဝ်ရဂှ် ဟီုသ္ဂးလဝ်ဏီရ။ 

ပရိုၚ် – သြၚ်လောန်တိုၚ်မ်

ဗီု – The Kokang