ဘာပန်၊ အံက်တဝ်ဗာ ၂၉
ဒပ်ကံၚ်ဇြဳပၞာန် ထောံကၠုၚ်မခတိုဟ်ဗ္တိုက်ကၠုၚ် ပ္ဍဲကဵုကွာန် နွံပ္ဍဲတိဍာ်ခရိုၚ်ဘာပန် ဒပ်မဟာ ၅ ဗော်သွးကောန်ဂကူကရေၚ် KNU တံဂှ် အဆက်က်တုဲ ဘာဗ္တောန်လိက် ကေုာံ စမြိုၚ်မၞိဟ်ဒၟံၚ်တံ ဒးဇီုကပိုက်လီုလာ်အာလဝ် နွံဒၟံၚ်ဂှ် ဂွံတီကေတ် အတိုၚ်တၚ်လလောၚ်တြး ဒပ်မဟာ ၅ ရ။
တုဲကၠုၚ် ပ္ဍဲဂိတုအံက်တဝ်ဗာ ၂၅ အခိၚ်နူဂယး ၜိုတ် ၁၀ နာဍဳဂှ် က္ၜၚ်ကျာဗ္တိုက်ဒပ်ကံၚ်ဇြဳပၞာန်ဝွံ ကၠုၚ်ထောံဏာလဝ်မခတိုဟ် ၂ မ ပ္ဍဲကဵုကွာန် (ဆောဘွဲဒဲ) ၊ ဂကောံပါဟိုက်၊ ပွိုၚ်ဍုၚ်ဘူတိုဝ်၊ ခရိုၚ်ဘာပန်ဂှ်တုဲ သီုကဵုပန်ကၠုၚ်လဝ် ကဵုသၞာတ်စက်ဂှ်ရ စမြိုၚ်ဘာ ၁ မကဵု သ္ၚိဒၟံၚ် ၃ မ ဇီုကပိုက်လီုလာ်အာလဝ်ရောၚ် ပါလုပ် ပ္ဍဲတၚ်လလောၚ်တြးဂှ်ရ။
ပ္ဍဲကဵုတ္ၚဲဂှ် အခိၚ်ဇိုၚ်သဝ်တ္ၚဲ ၜိုတ် ၆ နာဍဳဂှ်လေဝ် ပ္ဍဲကွာန်(ဆောဘွဲဒဲ) ကဵု ဒေသဗ္ဒါဲဗ္ဒါဲတံဂှ် က္ၜၚ်ကျာဗ္တိုက်ကံၚ်ဇြဳပၞာန် ကၠုၚ်စိုပ်ထောံဏာလဝ်မခတိုဟ် ၜိုတ် ၃၀ မ တုဲ အခိၚ်ဗ္တံ အကြာ ၉ နာဍဳကဵု ၁၀ နာဍဳဂှ်လေဝ် မွဲဒမြိပ်ပွဳပွူ ဒၞါဲဗ္ဒိုပ်ဒပ်(ခေါပုတ်) နွံဂှ် ထောံဏာလဝ်မခတိုဟ် ၂ မ နကဵုက္ၜၚ်ကျာဗ္တိုက်ဂှ်ကီု၊ နကဵုက္ၜၚ်ကျာ Y-12 ဂှ်လေဝ် ကၠုၚ်စိုပ်ထောံဏာလဝ်မခတိုဟ် ၜိုတ် ၃၀ မဂှ် သ္ဂးရ။
ဟိုတ်နူဒပ်ကံၚ်ဇြဳပၞာန် ထောံမခတိုဟ်ပန်ပှော်လဝ်တုဲ ညးဍုၚ်ကွာန်ကောန်အရာပ် ဇီုကပိုက်ဒးဟွံမွဲတုဲ တိရစ္ဆာန်သ္ၚိ ချိုတ်အာလဝ်နွံဂှ် ညးမၞုံအခေါၚ်ဟီုဂး ဒပ်မဟာ ၅ KNU သ္ကိုပ်ဗိုလ်ဇၞော် သဝ်ကလာဒိုဝ်ကဵု ဇာဇၞိက်အထံက်အရီုပရေၚ်ၜိုဟ်လလမ်ကရေၚ် KPSN တံ လလောၚ်ပ္တိတ်ဟီုလဝ်ရ။
“လၟုဟ်လေဝ် ဗ္ဒိုပ်ဍေံတံ (စကစ) နွံပ္ဍဲဘာပန် လ္ၚဵုတံဂှ် ဒးဗလးလဝ်တဲတုဲ ကၠောန်ဒၟံၚ်ပြးရ” သာ်ဝွံ ညးမၞုံအခေါၚ်ဟီုဂး ဒပ်မဟာ ၅ KNU သ္ကိုပ်ဗိုလ်ဇၞော်သဝ်ကလာဒိုဝ် ဟီုလဝ် စပ်ကဵုပရေၚ်ဒပ်ကံၚ်ဇြဳပၞာန် ထောံလဝ်မခတိုဟ်ဂှ်ရ။
ပ္ဍဲကဵုတိဍာ်ခရိုၚ်ဘာပန် KNU ဂှ် ဟိုတ်နူပရေၚ်ဗ္တိုက်ပၞာန်ကျာကဵု ပရေၚ်ပန်ပှော်လွဟ်ဇၞော်တံတုဲ ဂိတုဏံ အပ္ဍဲပွိုၚ် ၁၅ တ္ၚဲဂှ် ညးဍုၚ်ကွာန် ၁၃ တၠ ဒးချိုတ်အာလဝ်တုဲ ၃ တၠ ကလိဂွံလဝ်ဝပ်တုဲ သ္ၚိဌာန်ညးဍုၚ်ကွာန် ဂူဗ္ၚ သြောံသ္ၚုၜဲတံ ဗွဲမဂၠိုၚ်ဂၠေၚ်လေဝ် ဇီုကပိုက်အာလဝ်ဂှ် ဂွံတီကေတ် အတိုၚ်တၚ်လလောၚ်တြး ဒပ်မဟာ ၅ ရ။
အခိၚ်လၟုဟ် နူကဵုဗလးတိဏံ ဒပ်ပံၚ်ကောံပၠန်ဂတး ဒပ်မဟာ ၅ ဒပ်ပၞာန်ဗၠးၜးကောန်ဂကူကရေၚ် KNLA တံ ကၟာတ်လဒဵုဗ္တိုက်လဝ် ဗ္ဒိုပ်ဒပ်(ခေါပုတ်) ကဵု ဗျူဟာပၞာန်ဘာပန် ဒပ်ကံၚ်ဇြဳပၞာန်တုဲ ဂၠံၚ်တရဴပလံၚ်ဗစိုပ်ဇွောံမ လုပ်တိတ် ဗ္ဒိုပ်ဒပ်တၞဟ်ဟ်တံဂှ်လေဝ် ဒပ်ပံၚ်ကောံပၠန်ဂတးတံ ထပိုတ်ထောံလဝ် နွံဒၟံၚ်ရ။
ဒပ်ကံၚ်ဇြဳပၞာန်ဝွံ ညံၚ်ဗျူဟာပၞာန်ဘာပန်ကဵု ဗ္ဒိုပ်ဒပ်(ခေါပုတ်) ဟွံဂွံစှ်ေအာဂှ် လၟေၚ်ဒဒှ်တ္ၚဲ ကၠောန်သ္ပဒၟံၚ် ပရေၚ်ဗ္တိုက်ပၞာန်ကျာ အပ္ဍဲကွာန်တံတုဲ သွက်ဂွံပလံၚ်ဗစိုပ်ကပေါတ်ဇွောံမ ဗ္ဒိပ်ဒပ်ဗျူဟာဏံတံဂှ် ဒးသ္ပပဓာန်ဒၟံၚ် နူကဵုတရဴကျာသၟးရ။
အပ္ဍဲဂိတုအံက်တဝ်ဗာ ဘာ်ဂိတုဂှ် အကြာဒပ်ပံၚ်ကောံ မဟာမိတ် ဒပ်မဟာ ၅ KNLA ကဵု ဒပ်ကံၚ်ဇြဳပၞာန်တံဂှ် ပေါဲဗ္တိုက်က္တဵုဒှ်လဝ် ၄၇ ဝါတုဲ လ္ပာ်ဒပ်ကံၚ်ဇြဳပၞာန် ၁၁ တၠ ချိုတ်အာလဝ်တုဲ ၉ တၠ ဇီုကပိုက်ကလိဂွံလဝ်ဝပ်သၟးဟွံက အပ္ဍဲပေါဲဗ္တိုက်ဂှ် ပလီုဂွံလဝ် စမြိုၚ်ပၞာန်မွဲမကဵု ယာန်က္ၜဳစက်ပၞာန်မွဲဖ္ဍိုက်ဂှ် ဂွံတီကေတ် အတိုၚ်ဌာန်ဂအုပ် ဒပ်မဟာ ၅ လလောၚ်ပ္တိတ်လဝ်ပရိုၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ