ပ္ဍဲသေံသၟဝ်ကျာ ဟိုတ်နူပရေၚ်ဗ္တိုက်ကံၚ်ဇြဳပၞာန်တုဲ ကောန်အရာပ် ဗ္ဒါဲ ၃၄၀ ချိုတ်အာ

လာယှိုဝ်၊ အံက်တဝ်ဗာ ၂၉

 အပ္ဍဲကဵုပရေၚ်ပၞာန် ၁၀၂၇ ဂကောံမဟာမိတ်ကောဒေံပိဂကောံတံဂှ် ပ္ဍဲတွဵုရးသေံ သ္ကုတ်သၟဝ်ကျာဂှ် ဟိုတ်နူပရေၚ်ဗ္တိုက်ကံၚ်ဇြဳပၞာန်တုဲ ကောန်အရာပ် ၃၃၉ တၠ ဒးချိုတ်အာလဝ်ရောၚ် ပ္ဍဲဂိတုအံက်တဝ်ဗာ ၂၇ တေံ ဇာဇၞိက်ချဳဒရာၚ်ပရေၚ်အခေါၚ်အရာမၞိဟ် HRAN လလောၚ်ပ္တိတ်လဝ် လိက်ဒုၚ်စဳရေၚ်ရ။

အပ္ဍဲပရေၚ်ပၞာန် ၁၀၂၇ ပေၚ်မွဲသၞာံဂှ် လ္ပာ်ကံၚ်ဇြဳပၞာန် ကလိလောန်လဝ် ပွဖံက်ပ္ကဝ်အခေါၚ်အရာမၞိဟ် လ္တူညးဍုၚ်ကွာန်ကောန်အရာပ်တံဂှ် HRAN စှ်ေလ္ၚတ်ကံက်ကပှ်လဝ်တၚ်နၚ် ပ္ဍဲကဵုဍုၚ် ဂကောံကောဒေံပိဂကောံတံ သီဂွံလဝ် ၁၇ ဍုၚ်ဂှ်ရ။

အတိုၚ်လိက်ဒုၚ်စဳရေၚ်ဂှ်မ္ဂး ပ္ဍဲကဵုကံၚ်ဇြဳပၞာန် ကလိလောန်လဝ်ဂမၠိုၚ် ပရေၚ်ပန်ပှော်လွဟ်ဇၞော်ကြာန်န်ဂှ် ဒှ်ဂၠိုၚ်အိုတ်တုဲ ပရေၚ်ဗ္တိုက်ထောံမခတိုဟ်နကဵုပၞာန်ကျာ၊ ပန်ပှော် ဂစိုတ်ဂယိုၚ် ကောန်အရာပ်ဟွံမွဲကဵုဒုဟ်ဒဏ်တံလေဝ် ပါလုပ်ရ။

သ္အာၚ်နူဂှ်ပၠန် သုၚ်စောဲမာၚ်တိုပ်တိကီု၊ ကပေါတ်လွဟ်လက်နက်ပၞာန် သှ်ေဒၟံၚ်တံ ဗ္တိုက်ထ္ကးကီု၊ ပလီုကောန်သမ္ဘာ၊ ပန်ကဵုဒရုၚ်၊ ဍဵုဍိုက်ပျဲပျာံ၊ ပကီုပွ ဟွံမွဲကဵုဓဝ်ဗ္စာရဏာမၞိဟ်ကီု၊ အရာပကီုပရာပ်စပ်ကဵုလိၚ် တၞဟ်ဟ်တံလေဝ် ကလိလောန်လဝ်ရ။

အတိုၚ်တၚ်နၚ် နူကဵုဇာဇၞိက်ချဳဒရာၚ်စပ်ကဵုအခေါၚ်အရာမၞိဟ် HRAN ကံက်ကပှ်ဂွံလဝ်ဂှ်မ္ဂး ဟိုတ်နူကံၚ်ဇြဳပၞာန် ပန်ပှော်ကဵုလွဟ်ဇၞော် ကြာန်န်တုဲ မၞိဟ်ဒးပြဟ်လလုဲအာတံကဵု ဇီုကပိုက်ကလိဂွံလဝ်ဝပ်တံ ၄၀၁ တၠ နွံလဝ်ရ။

မွဲလ္ပာ်ဂှ်ပၠန် ပ္ဍဲကဵုဍုၚ် ဂကောံပၠန်ဂတးတံ သီဂွံလဝ် ပ္ဍဲရးသေံသ္ကုတ်သၟဝ်ကျာ ဗွဲမဂၠိုၚ်ဂှ် ကံၚ်ဇြဳပၞာန်တံ ဟွံပါ်ပါဲ စမြိုၚ်ပၞာန် စမြိုၚ်အရာပ်တံဂှ်မွဲသာ် ထောံမခတိုဟ်ဗ္တိုက်ဒၟံၚ် ကဵုပၞာန်ကျာတံဂှ် ကလိလောန်ဒၟံၚ် တီတီရောၚ် သ္ဂးရ။

ဟိုတ်နူပရေၚ်ဗ္တိုက်ပၞာန်ကျာတုဲ မၞိဟ်ဒးချိုတ်အာ ၁၀၇ တၠကဵု မၞိဟ်ဇီုကပိုက်ကလိဂွံဝပ် ၂၀၀ ပြၚ် နွံလဝ်တုဲ ဖျာ၊ ဘာဗ္တောန်လိက်၊ စမြိုၚ်ပရေၚ်ဘာသာ ဆေၚ်စပ်ကဵုညးဂမၠိုၚ်တံဂှ်လေဝ် ဒးလီုလာ်အာလဝ်ရောၚ် လိက်ဒုၚ်စဳရေၚ်ဂှ် ထ္မံက်ထ္ၜးလဝ်ရ။

စပ်ကဵုမာၚ်တိုပ်တိတုဲ ပ္ဍဲကဵုပွဳပွူဗ္ဒိုပ်ဒပ်တံ၊ ဂၠံၚ်ညးဍုၚ်ကွာန်ဂမၠိုၚ်ရပ်စပ်တံ၊ ပ္ဍဲကဵုကမၠောန်တံကဵု ဗ္ဒါဲဗ္ဒါဲကွာန်တံဂှ် ကံၚ်ဇြဳပၞာန် ပစူလဝ်မာၚ်တံသၟးဟွံက ဂၠံၚ်ဒပ်မဟာမိတ်တံ ထ္ပက်ပၞာန်မာန်တံဂှ်လေဝ် ဒၞါလဝ် နကဵုမာၚ်တံရ။

ဟိုတ်နူအကာဲအရာသာ်ဏံတံတုဲ အပ္ဍဲပွိုၚ်မွဲသၞာံ သီုညးဗြဴ၊ သီုကောန်ၚာ်ဂှ် ကောန်အရာပ် ၁၀၀၀ ပြၚ် ဇီုကပိုက်ကလိဂွံလဝ်ဝပ် ချိုတ်အာလဝ်တံသၟးဟွံက သ္ၚိမၞိဟ်ဒၟံၚ်ကီု စမြိုၚ်ဆေၚ်စပ်ကဵုညးဂမၠိုၚ်တံဂှ် အပံၚ်ဖအိုတ် ၁၉၀၀ ပြၚ် ဒးဇီုကပိုက်လီုလာ်အာလဝ်ရောၚ် လိက်ဒုၚ်စဳရေၚ်ဂှ် ထ္မံက်ထ္ၜးလဝ်ရ။

နကဵုအလဵုအသဳဍုၚ်သ္အာၚ်ဂမၠိုၚ် ညံၚ်ဟွံဂွံဆက်စၠောံကဵု ပူဂဵု၊ ဂကောံ မဆက်စပ်ကဵုကံၚ်ဇြဳပၞာန်တံဂှ်ကီု၊ ပရေၚ်ပိုန်ဒြပ် မသ္ကဵုဒှ်အထံက်အပၚ်တံဂှ်လေဝ် သွက်ဂွံတာဒၞါကၟာတ်လဒဵုဂှ်ကီု၊ ညံၚ်ဟွံဂွံသွံပၠောပ်ပ္တိုန်ကဵု ကၠေၚ်က္ၜၚ်ကျာတံဂှ် HRAN အာတ်မိက်လဝ်ရ။

ပ္ဍဲကဵုဇာဇၞိက်ပရေၚ်ချဳဒရာၚ်စပ်ကဵုအခေါၚ်အရာမၞိဟ် HRAN ဂှ်တှ်ေ ဂကောံညးဗြဴတအာၚ် TWO ကဵု ဂကောံသၟတ် ကေုာံ ကွးဘာတအာၚ် ဖျေံသ္ဇိုၚ်ရးသေံသ္ကုတ်သၟဝ်ကျာတံ မပါလုပ် ဂကောံမှာဇန်အပ္ဍဲဒေသတံ ၅ ဂကောံ ပါလုပ်ဒက်ပ္တန်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−CJ