မတ်မလီု၊ အံက်တဝ်ဗာ ၂၉
ဟိုတ်ဟွံမွဲမွဲသာ် ကံၚ်ဇြဳပၞာန် ကၟာတ်ကၠုၚ်ဒၟံၚ် အခေါၚ်ယိုက်ဏာနၚ်ထၜိုတ် မဒှ်ဗၞိက်တိတ်နူပရေၚ်တဵုလွဳ အဓိက ပ္ဍဲတွဵုရးဍုၚ်မန်ဂှ်တုဲ ပ္ဍဲကဵုသၞေဟ်ကၚ်စၟဳတ်တံဂှ်လေဝ် သွက်အခေါၚ်ဖ္ဍိုက်ဏာနၚ်တံဂှ် ဒးကဵုဒၟံၚ်သြန်ဂှ် တၠကမၠောန်ထၜိုတ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သၞေဟ်ကၚ်စၟဳတ်ကံၚ်ဇြဳပၞာန် ပံက်လဝ် နကဵုဟိုတ်ပရေၚ်ဂီုကၠီုတံဂှ် ပ္ဍဲအရာပလံၚ်ဗစိုပ် ထၜိုတ်တံဂှ် အာတ်မိက်ဒၟံၚ် လိက်တၞးသက်သဳတံ နွံတုဲ ယဝ်ရသက်သဳဟွံမွဲမ္ဂး သၞောတ်ဗ္ၜတ်ဒၟံၚ် အခေါၚ်ယိုက်ဏာနၚ်တံ နွံဒၟံၚ်ရ။
ထၜိုတ်ဂှ်တှ်ေ ဒှ်ဗၞိက်တိတ်နူဝါဗ္ၚတံဂှ်တုဲ အတိုၚ်သၞောဝ် စဵုဒၞါအခေါၚ်အရာ သၟာဝါဗ္ၚတံကဵု သၠုၚ်ပ္တိုန်ဒတုဲဖဵု၊ အတိုၚ်နဲဥပဒေတံဂှ်မ္ဂး အခေါၚ်ဖ္ဍိုက်ဏာနၚ် ကေုာံ အခေါၚ်သွံတြး ဗွဲမဗၠးၜးတံ နွံဂှ် ဟီုလဝ်ကီုလေဝ် ပ္ဍဲလက်ထက်ကံၚ်ဇြဳပၞာန်ဏံ ကၠောန်သ္ပဒၟံၚ် ပရေၚ်ကၟာတ်လဒဵု အရာဟွံမွဲပၟိက်တံဂှ်ရ။
တၠကမၠောန်ထၜိုတ်မွဲတၠဂှ်တှ်ေ ပ္ဍဲဒၞါဲယိုက်ဏာနၚ်ထၜိုတ်တံဂှ် သၞေဟ်ကၚ်သၟဝ်တဲကံၚ်ဇြဳပၞာန်တံဂှ်တှ်ေ အာတ်မိက်ဒၟံၚ် အခေါၚ်ယိုက်ဏာနၚ်တံဂှ်တုဲ ယဝ်ကဵုဟွံမာန်တှ်ေ အာတ်မိက်ဒၟံၚ်သြန်တံ ကၠောန်ဒၟံၚ်ဂှ်ရ ဒှ်ဒၟံၚ်အခက်အခုဲရောၚ် ဟီုရ။
“ အဓိကဂှ်တှ်ေ အာတ်အခေါၚ်။ ကဵုဟွံမာန်တှ်ေ အာတ်လှုဲ။ လၟုဟ်တှ်ေ ပ္ဍဲတွဵုရးဍုၚ်မန်ဂှ် မုအခေါၚ်မှလေဝ် ကဵုလဝ်ပိုယ်တံ ဟွံမွဲပုဟ်။ ကေတ်လေဝ် ဟွံဒးကေတ်ပုဟ်။ ထၜိုတ်ဂှ်တှ်ေ ဒှ်ဗၞိက်တိတ်နူပရေၚ်တဵုလွဳတုဲ အခေါၚ်သွံရာန်ဗွဲမဗၠးၜး နွံဂှ်ရ တွဵုရးဍုၚ်မန်ဂှ် မုဟွံကဵုလဝ်ပုဟ်။ ဆ္ဂး ပ္ဍဲကဵုသၞေဟ်ကၚ်တံဂှ်တှ်ေ ထၜိုတ်ကီုဂှ် ဒှ်သဘဴအာတ်ဒၟံၚ် လိက်ကဵုအခေါၚ်တံ မုတံ နွံဂှ်ရ ဒၞါဲယိုက်ဏာနၚ်တံဂှ်တှ်ေ အခက်အခုဲနွံဒၟံၚ်ရ” သာ်ဝွံ သ္ဂးရ။
သ္အာၚ်နူဂှ်ပၠန် ပ္ဍဲအရာဖ္ဍိုက်ဏာနၚ် ထၜိုတ်တံဂှ် ဒးထ္ၜးလိက်ကဵုလဝ်အခေါၚ်တံဏောၚ် ဟီုဒၟံၚ်ကီုလေဝ် ဒးကေတ်အခေါၚ် နူကဵုဌာနလဵုရောဟီုဂှ် ဟီုလဝ် ချိုတ်တ်ပၠိုတ်တ်ဟွံမွဲတုဲ ဌာနမဆေၚ်စပ်တံဂှ်လေဝ် ဒးကေတ်အခေါၚ်ဖ္ဍိုက်ဏာနၚ်ထၜိုတ်တံဂးတုဲ ပ္တိတ်လဝ်လိက်လလောၚ်တြး မလုပ်သၞောဝ် ဟွံမွဲပုဟ်ဂှ် ညးဆက်ဟီုရ။
တၠကမၠောန်ထၜိုတ်မွဲတၠဂှ်တှ်ေ ထၜိုတ်တိတ်နူအပ္ဍဲတွဵုရးဍုၚ်မန်တံဂှ် ဟွံကဵုဖ္ဍိုက်ဏာနၚ် လ္ပာ်တွဵုရးကရေၚ် ရပ်ဒက်ဒၟံၚ် နွံတုဲ လ္ပာ်တွဵုရးကရေၚ်တေံ ပလံၚ်ပ္တိုန်မ္ဂးလေဝ် ဒးကၠောန်သ္ပဒၟံၚ် အခေါၚ်တတ်ကၠောံတံ နွံဂှ် ဟီုရ။
“ပလံၚ် ပယျဵုကျာ်ပိဏောၚ်တှ်ေ ပ္ဍဲကဵုကျာ်ပိဂှ် ရပ်ဒက်ဒၟံၚ်တံ နွံ။ ပလံၚ်ဗြဝတဳဏောၚ်တှ်ေ ပရေၚ်ရပ်ဒက်ဒၟံၚ်ဂှ်နွံ။ ဒှ်ဒၟံၚ်သာ်ဏံရ။ ကပေါတ်နူဘာအၚ်ဂှ် လုပ်ဒဵုကဵုမုဟ်ဍုၚ်ဂွံ။ ကပေါတ်နူကဵုမုဟ်ဍုၚ်ဂှ် တိတ်လ္ပာ်ဘာအၚ်ဟွံဂွံပုဟ်။ တုဲပၠန် လၟုဟ်ဂှ်တှ်ေ အာပလံၚ်ကပေါတ်မ္ဂး နူကဵုတွဵုရးဍုၚ်မန်ဂှ် အာလ္ပာ်ဘာအၚ် နူဂှ်မွဲကဆံၚ် ကလေၚ်ပ္တိုန်လ္ပာ်မတ်မလီုဏောၚ်တှ်ေ ဒးကၠောန်အခေါၚ်တတ်ကၠောံတံရ။ ဟွံသေၚ်မ္ဂး စၟတ်တဲ အခေါၚ်သွံရာန် စၟတ်တဲအခေါၚ်ကြိုၚ်စွံတံဂှ် ထ္ၜးကဵုတုဲ ဂွံအခေါၚ်တတ်ကၠောံရ” သာ်ဝွံ သ္ဂးရ။
ထၜိုတ်ဂှ်တှ်ေ ဒှ်ဗၞိက်တိတ်နူဒေသကီုလေဝ် ဟိုတ်နူဟွံဂွံအခေါၚ်ယိုက်ဏာနၚ် ဗွဲမဗၠးၜးဂှ်ရ အခိၚ်လအ်လ သီုကဵုဒးကဵုဒၟံၚ်သြန်တံ နွံဂှ်ရ ပရေၚ်ဒးဂိတံ နွံတုဲ ခရိတ်အိုတ်တံ သာဂၠိုၚ်ကၠုၚ်ဂှ် တၠကမၠောန်ထၜိုတ်တံ ဟီုရ။
ထၜိုတ်တံဂှ်ဝွံ ပ္ဍဲရာသဳဏံမံက် မွဲပံၚ်ဂှ် ဂွံဒၟံၚ်ၚုဟ် ၃၀၀၀ ဒ္ကေဝ်ပြၚ်ကီုလေဝ် လ္ပာ်ကံၚ်ဇြဳပၞာန် ဟိုတ်နူပတေၚ်ဂြတ်ကၠုၚ် ပ္ဍဲအရာဖ္ဍိုက်ဏာနၚ် ထၜိုတ်တံ နွံဒၟံၚ်ဂှ်ရ ပ္ဍဲအရာသွံတြးထၜိုတ်တံဂှ်လေဝ် ဒှ်ဒၟံၚ်အခက်အခုဲတံဂှ် ဂွံတီကေတ်ရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ နကဵုဟိုတ် ပလံၚ်ပ္တိုန်ဒၟံၚ် ထၜိုတ်အပ္ဍဲဒေသ ဟွံဗဗွဲကဵုသၞောဝ်ဂှ် စနူဂိတုဖေဖဝ်ဝါရဳ သတ္တာဟလက္ကရဴအိုတ်တုဲကၠုၚ်တေံဂှ်တုဲ ရပ်ဒက်ကၠုၚ်ဒၟံၚ်တံတုဲ ကုတၠကမၠောန်ထၜိုတ်တံဂှ်လေဝ် ညံၚ်ဟွံဂွံပလံၚ်ဗစိုပ် ဟွံဗဗွဲကဵုသၞောဝ်တံဂှ် ကဵုထ္ပက်ဒၟံၚ်စၟတ်တဲဒုၚ်လျိုၚ်တံ နွံဒၟံၚ်ရ။
တွဵုရးဍုၚ်မန်ဝွံ နကဵုဗ္ၜတ်အလုံဍုၚ်မွဲမ္ဂး ဒှ်တွဵုရး တဵုဒၟံၚ်ထၜိုတ်ဂၠိုၚ်အိုတ်မွဲတုဲ လၟေၚ်သၞာံ လျိုၚ်တာန်ထၜိုတ်တိတ်ဒၟံၚ် မွဲကိုဋ်ပြၚ် နွံတုဲ ထၜိုတ်တိတ်ကၠုၚ်တံဂှ် ပလံၚ်ပ္တိုန်သွံတြးဒၟံၚ် ဍုၚ်ကြုက် ပါလုပ်သီုကဵု ဍုၚ်သ္အာၚ်လ္ၚဵုလ္ၚဵုတံရ။
ပရိုၚ်−သြၚ်လောန်တိုၚ်(မ်)
ဗီု−CJ