သၞေဟ်ကၚ်တၞုၚ်ဂၠံၚ် မုက်ပြေၚ်(မုပ္ပလၚ်) ဒးထပ်ဒုၚ်ဗတိုက်လဝ်

ကျာ်ထဝ်၊ အဝ်ဂေတ် (၁၇)

တွဵုရးဍုၚ်မန်၊ ပွိုၚ်ဍုၚ်ကျာ်ထဝ်၊ သၞေဟ်ကၚ်စၟဳစၟတ်ကံၚ်ဇြဳပၞာန် မၞုံကွာန်မုက်ပြေၚ်ဂှ် အာစိုပ်ဗတိုက်လဝ် ပ္ဍဲဂိတုအဝ်ဂေတ် စၟတ်တ္ၚဲ(၁၆) အခိၚ်နူဂယး ၜိုတ်(၁၀)နာဍဳရဂှ် ဂွံတီကေတ် နူဂကောံဇြဟတ်ပၠန်ဂတးတအ်ရ။

ပါဲနူကောန်ဒပ်ကံၚ်ဇြဳပၞာန်တုဲ ဇြဟတ်ဒပ်ဗၠာဲသၟိၚ် (၄၀) ပြၚ် ဖျေံဗဒိုပ် မံၚ်တန်တဴဒၟံၚ် ပ္ဍဲသၞေဟ်ကၚ် စၟဳစၟတ်ဂှ် ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA၊ PDF တအ် သ္အာၚ်နူလွဟ်ဇၞော် ၄၀ မမ တုဲ ပန်ပှ်ောဗတိုက်လဝ် သီုကဵုလွဟ်ဍောတ်ရ။

ဟိုတ်နူပရေၚ်ပန်ဗတိုက်ဂှ် ပရေၚ်ပန်ပှ်ောၜါက္တဵုဒှ်လဝ် ဗ္ဒာဲပွိုၚ် (၂၀)မိနေတ်တုဲ ကွဳစက်အာတရဴဂၠိုၚ် ကဵုကၠံ ဆိုအ်ဗ ကၟာတ်ဒၞာဂွံဂၠံၚ် က္တဵုဒှ်လဝ်တုဲ အခိၚ်ဒေါဝ်တ္ၚဲ ၜိုတ်(၁၂)နာဍဳဂှ်မှ ဂွံကလေၚ်အာကၠုၚ် အတိုၚ်ပကတိရဂှ် ညးဒေသတအ် ဟီုလဴလဝ်ရ။

ပ္ဍဲပရေၚ်ပန်ပှ်ောၜါလ္ပာ်ဏံ လ္ပာ်ကောန်ဒပ်ကံၚ်ဇြဳပၞာန် ဟွံအောန်နူ (၃)တၠ ဇီုကပိုက်ဒးချိုတ်လဝ် နွံမာန်ရဂှ် ၜိုန်ရလ္ပာ်ဂကောံဇြဟတ်ပၠန်ဂတးတအ် ဟီုလဝ်ကီုလေဝ် နကဵုသြၚ်လောန်တိုၚ်(မ်) သ္ပဒ္တန်တၞဟ်ခြာဟွံမာန်ဏီရ။

ကြဴနူပရေၚ်ပန်ပှ်ောဒှ်လဝ်တုဲဂှ် လ္ပာ်ဒပ်ကံၚ်ဇြဳပၞာန် ပန်ဖျေံလွဟ်ဇၞော် ပ္ဍဲလ္ပာ်ကွာန် မၞုံပွိုၚ်ဍုၚ်ကျာ်ထဝ် တိဍာ်ထိၚ်ဒဝ် ဗော်သွးကောန်ဂကူကရေၚ် KNU အဆက်ဟွံပိုတ်သ္ကုတ်တုဲ အကာဲအရာဲဇီုကပိုက် ဒးသောဲသောဲဗြောဲဗြောဲဂှ် ဟွံဂွံတီလဝ်ဏီရ။

သၞေဟ်ကၚ်စၟဳစၟတ်ကံၚ်ဇြဳပၞာန် တၞုၚ်ဂၠံၚ်မုက်ပြေၚ် ပရေၚ်ကၟာတ်ဒၞာစၟဳစၟတ်ဒၟံၚ် ညးဍုၚ်ကွာန်အာတရဴ တအ်၊ ပရေၚ်အာတ်မိက်ဒၟံၚ်သြန် လောန်ၜက်နူသၞောတ်ဗၞတ် နွံဒၟံၚ်ဂှ် ပ္ဍဲမွဲကာလဒပ်ပၞာန်သီအဝဵုဏံ ဒပ်ပံၚ်ကောံ ဂကောံဇြဟတ်ပၠန်ဂတးတအ် ကၠုၚ်စိုပ်ဗတိုက်လဝ် ဟွံအောန်နူ ဗၞတ် (၇)ဝါ နွံရ။

ဂိတုအဝ်ဂေတ် စၟတ်တ္ၚဲ (၁၅) တုဲကၠုၚ်တေံလေဝ် ပ္ဍဲဂၠံၚ်ဇၞော် လဂုၚ်-မတ်မလီု ကွာန်တယျေတ်ကုမ်၊ ပွိုၚ်ဍုၚ်ကျာ်ထဝ်ဂှ် ရေၚ်ယာဉ်ကွဳစက်ကံၚ်ဇြဳပၞာန် ကွဳစက်ပါလုပ် (၅)ဖ္ဍိုက် နူလ္ပာ်ကျာ်ထဝ် လုပ်ကၠုၚ်လ္ပာ်ၜဳကလေၚ်ဂှ် ဒးဒုၚ်ဗတိုက်လဝ်တုဲ ဟွံအောန်နူ (၅)တၠ ဇီုကပိုက်ဒးချိုတ်လဝ်ရဂှ် လ္ပာ်ဒပ်ပံၚ်ကောံတအ်ဟီုသ္ဂးလဝ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် -Social Media