မတ်မလီု၊ အဝ်ဂါတ် (၂၈)
သၟာကမၠောန်ဆဵုပြံၚ် ကၟိန်ဍုၚ်ဗၟာတံ မပါလုပ် အိုဿီုကဵုသၟာကမၠောန် နူအပ္ဍဲဍုၚ်သေံတံဂှ် ပပဵုပ္တိုန်အာ ၚုဟ်လိၚ်သ္ဇိုၚ်တံရောၚ် အလဵုအသဳသေံ လလောၚ်တြးလဝ် ပ္ဍဲဂိတုအဝ်ဂါတ် (၂၆)တေံ ဗွဲမလုပ်သၞောဝ်ရဂှ် ညးမရီုဗၚ်ရေၚ်တၠုၚ်ကဵုဒၟံၚ် အခေါၚ်အရာသၟာကမၠောန်ဆုဲပြံၚ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကၟိန်ဍုၚ်သေံ ဟိုတ်နူၚုဟ်ဖျာသၠုၚ်တိုန်ဒၟံၚ်ဂှ်ရ ကဵုၚုဟ်လိၚ်သၟာကမၠောန် မဂွံဒၟံၚ်လၟုဟ်တံဂှ် ဟွံရုမ်ဂပ်တုဲ သွက်ဂွံပပဵုပ္တိုန်ခုတ်ကဵု ၚုဟ်လိၚ်သၟာကမၠောန်တံဂှ် သမဂ္ဂသၟာကမၠောန် ကေုာံ ဂကောံမရေၚ်တၠုၚ်ဒၟံၚ် ပရေၚ်သၟာကမၠောန်တံ ရေၚ်တၠုၚ်ပံၚ်တောဲတုဲ ပ္ဍဲဂိတုမေ စၟတ်တ္ၚဲ (၁) တုဲကၠုၚ်တေံ ပလံၚ်လိက်အာတ်မိက်လဝ် ဇရေၚ်အလဵုအသဳဍုၚ်သေံရ။
လ္တူပလံၚ်လိက်အာတ်မိက်လဝ်သာ်ဏံဂှ် ကြဴနူအလဵုအသဳသေံ ကဵုကတိ ပပဵုပ္တိုန်ကဵု ၚုဟ်လိၚ်သၟာကမၠောန်တံရောၚ်တုဲဂှ် အခါလၟုဟ် ဒဒှ်ရပပဵုပ္တိုန်ခုတ်ကဵုလဝ်ဂှ် လလောၚ်တြးလဝ် ဗွဲမလုပ်သၞောဝ်ရ။
ဥက္ကဌ ဇာဇၞိက်အခေါၚ်အရာသၟာကမၠောန်ဆုဲပြံၚ် (MWRN) ဥူအံၚ်ကျဝ်ဂှ် သၟာကမၠောန်ဆုဲပြံၚ်ကောန်ဍုၚ်ဗၟာမွဲတၠ မပပဵုပ္တိုန်လဝ် ၚုဟ်လိၚ်သ္ဇိုၚ်ဂှ်ဝွံ ကၠာတေံ နူၜိုတ် (၄၀၀) ၝာတ်ဂှ် ဂွံကၠုၚ် စဵုကဵု (၅၀၀) ၝာတ်ပြၚ်မာန်ရောၚ် ဟီုရ။
“ရံၚ်ကဵု ဖောအ်ဗြေဝ်တောတက် ဒေသမွဲမွဲဂှ်တုဲ ပပဵုပ္တိုန်ကဵုရောၚ် ဟီုရ၊ ပါ် နလၟေၚ်ခရိုၚ်တံတုဲ ကဵုရောၚ်၊ မွဲတ္ၚဲမ္ဂး မၞိဟ်မွဲတၠဂှ် ဒှ်ကၠုၚ် စဵုကဵုသၠုဲမသုန်ကၠံရောၚ်၊ ကၠာတေံ မွဲတ္ၚဲ နူၜိုတ်ပန်ကၠံဂှ် ဒှ်ကၠုၚ် မသုန်ကၠံပြၚ်တုဲ ပကောံပကေဝ်ဂွံ ဟွံသေၚ်မ္ဂး အကြေပ်ဂြတ်လၟုဟ်ဂှ် ရပ်စပ်သောၚ်ကလး ဗွဲမအံၚ်ဇၞးမာန်ရောၚ် အဲမိက်ဂွံသ္ၚဳဂၠိပ်ရ” သာ်ဝွံ သ္ဂးရ။
အလဵုအသဳသေံဝွံ ၚုဟ်လိၚ်သ္ဇိုၚ်တံဂှ် တန်တဴကဵုလ္တူဖောအ်ဗြေဝ်တောတက် လၟေၚ်ခရိုၚ်တံတုဲ ပပဵုပ္တိုန်ကဵုလဝ်ရ၊ အတိုၚ်အလဵုအသဳသေံ ပပဵုပ္တိုန်ကဵုလဝ် ၚုဟ်လိၚ်သ္ဇိုၚ်တံဂှ်မ္ဂး သဝ်အိုတ်ဂှ် မွဲတ္ၚဲ (၃၂၈) ၝာတ်တုဲ သၠုၚ်အိုတ်ဂှ်တှ်ေ (၃၅၄) ၝာတ်ဂှ် ဂွံတီကေတ်ရ။
ဟိုတ်နူအလဵုအသဳသေံ ပပဵုပ္တိုန်ကဵုလဝ် ၚုဟ်လိၚ်တံဂှ်ရ သွက်သၟာကမၠောန်ဆုဲပြံၚ် ကောန်ကၟိန်ဍုၚ်ဗၟာတံ မပါလုပ် သၟာကမၠောန်သီုဖအိုတ်တံ သာတုဲပြေပြံၚ်ကၠုၚ်ရောၚ်ဂှ် ညးမရီုဗၚ်ရေၚ်တၠုၚ်ကဵုဒၟံၚ် အခေါၚ်အရာသၟာကမၠောန်ဆုဲပြံၚ်တံ သ္ဂးလဝ်ရ။
မွဲလ္ပာ်ဂှ်ပၠန် အလဵုအသဳသေံဝွံ ကုသၟာကမၠောန်ဆုဲပြံၚ် ဟွံလုပ်သၞောဝ် မလုပ်စိုပ်ကၠောန်ဒၟံၚ်ကမၠောန် အပ္ဍဲဍုၚ်သေံ ဟွံမွဲကဵုသက်သဳဂမၠိုၚ် နူကဵုဍုၚ်ဗၟာ၊ လာအိုဝ်၊ ကာမ္ဗောဒဳယျ၊ ဝေဒ်နာမ်တံဂှ် သွက်ဂွံပ္တိတ်ကဵု စၟတ်တဲအခေါၚ်ကၠောန်ကမၠောန် မကော်ဂး တၞးကာဒ်သာ်ပ္ကဴဂှ် စဳဇန်ဒၟံၚ်ရ။
ပရိုၚ်−သြၚ်လောန်တိုၚ်(မ်)