မတ်မလီု၊ အံက်တဝ်ဗာ(၁၃)
ကိစ္စခုတ်ၚုဟ်စၞောန်သြောံသ္ဇိုၚ် (၇) ကိုဋ်ဘာ်ဒ္ကေဝ် သွက်သြောံကသီုကေုာံ သြောံကညၚ်ကၠုၚ်စိုပ်ဏံဂှ် ဗီုလဵုမှသ္ဇက်ဂွံဒုၚ်တဲဟွံမွဲတုဲ ပြဝကံၚ်ဇြဳပၞာန်ဂှ် ကၠောန်သ္ပမံၚ်ညံၚ်သ္ဂောံကျဗြံရဂှ် သၟာဗ္ၚတံ ပါ်ပါဲလဝ် သ္ကာတ်တ်မြဟ်ဟ်ရ။
ဂကောံက္ဍိုက်က္ဍိုပ် ပရေၚ်သၠုၚ်ပ္တိုန်ပရေၚ်ပိုန်ဒြပ်ကေုာံ ပရေၚ်စဵုဒၞါ အခေါၚ်အရာ သၟာဗ္ၚတံဂှ် သြောံကသီု ၂၀၂၃ ကေုာံ သြောံကညၚ် ၂၀၂၄ တံဂှ် သြောံ (၁၀၀)န မ္ဂး နဒဒှ်ၚုဟ်စၞောန်သြောံသ္ဇိုၚ်ဂှ် ဖျေံစၟတ်လဝ် (၇)ကိုဋ်ဘာ်ရဂှ် တုဲကၠုၚ်ပ္ဍဲဂိတုအံက်တဝ်ဗာ စၟတ်တ္ၚဲ (၁၀)ဂှ် လလောၚ်ပ္တိတ်လဝ်ရ။
ဒးစၟတ်ၚုဟ်စၞောန်သြောံဏံဂှ် ဗွဲမကိတ်ညဳကဵုတၚ်စၞောန်ပျး မပါလုပ် ပ္ဍဲဥပဒေပရေၚ်သၠုၚ်ပ္တိုန် ပရေၚ်ပိုန်ဒြပ်ကေုာံ အခေါၚ်အရာသၟာဗ္ၚတံဂှ် ညံၚ်သ္ဂောံဒှ်ဗွဝ်ဖျာကေုာံ ၚုဟ်နှေုန်ကိတ်ညဳကဵု သၟာဗ္ၚတံတုဲ ဒးလလောၚ်ပ္တိတ်လဝ်ရဂှ် သ္ဂးလဝ်ရ။
သ္အာၚ်နူဂှ်ပၠန် ၚုဟ်ဗွဝ်ဖျာဂှ် ယဝ်ရနွံဒၟံၚ် လ္တူၚုဟ်စၞောန်တံဂှ်မ္ဂး ဒးရာန်ကေတ်အတိုၚ်ၚုဟ်ဗွဝ်ဖျာရောၚ်တုဲ နွံမံၚ်သၟဝ်ၚုဟ်စၞောန်သြောံတံဂှ်မ္ဂး ဒးရာန်ကေတ်အတိုၚ်ၚုဟ်စၞောန်ဂှ်ရောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
သၟာဗ္ၚမွဲတၠဂှ်တှ်ေ ပွသၞောတ်ဗ္ၜတ်ၚုဟ်စၞောန်သြောံတံဂှ် ကၠောန်သ္ပမံၚ် ညံၚ်သၟာဗ္ၚတံ သ္ဂောံကျဗြံရတုဲ ပ္ဍဲအကာဲအရာ စရိတ်တဵုလွဳက္ဍၚ်မံၚ်ဂှ် ဒှ်မံၚ်ပရေၚ်ဍဵုၚုဟ်ကွေံကွေံရဂှ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ကဵုၚုဟ်ဏံဏောၚ်ဟီုတှ်ေ ပရေၚ်ပိုန်ဒြပ်သၟာဗ္ၚတံ ဆုတ်ယုတ်ကွေံကွေံရ။ ပိုဲတံဂှ် ၜိုတ်ၜါဨကမှ ဂွံပေၚ်သြောံ(၁၀၀)ရ။ မွဲဨကမ္ဂး တိတ်ၜိုတ်(၅၀)နရ။ မွဲဨကမ္ဂး အိုတ်ၜိုတ်ပွဳူ(၄)ကိုဋ်တှ်ေ သြောံတိတ်မွဲဨက (၅၀)နရတှ်ေ ဂွံ(၃၇၅၀၀၀)ရ။ ကျရလေဝ်။ ဣဏံ သွက်စရိတ်ကလောန်တံမုတံ အရာဒးကပှ်ကၠောန်နူဏံတံဂှ် ဒးစေက်တုဲ ကျရ။ ယဝ်ရစၟတ်လဝ် (၇)ကိုဋ်ဘာ်ရတှ်ေ သၟာဗ္ၚပိုဲတံဂှ် ဗီုလဵုမှ ဟွံပြေပြံၚ်ပုဟ်။ စရိတ်ပ္တံ၊ စရိတ်ရတ်၊ ၚုဟ်မတံကဵု လၟုဟ်ဂှ်လေဝ် သြောံတံဂှ် ဟွံဗၠးဗြဲဏီတုဲ ရတ်ဟွံဂွံဏီတုဲတှ်ေ ပရေၚ်လီုလာ်ဂၠိုၚ်ညိဏောၚ်။ အေဂှ်ဂှ်မှ ဍဵုၚုဟ်တုဲတှ်ေ ဒှ်ကၠုၚ်အတိုၚ်ၚုဟ်ဍေံတံစၟတ်လဝ်ဂှ်ဏောၚ်ဟီုတှ်ေ ဟွံပြေပြံၚ်ကွေံကွေံဟဂှ်ရ” သာ်ဝွံ သ္ဂးရ။
ပ္ဍဲအရာတဵုသြောံတံဂှ် စရိတ်ကပေါတ်တမ်ရိုဟ် လက်ထက်ကံၚ်ဇြဳပၞာန်တံ ဇၞော်သၠုၚ်မံၚ်ဂၠိုၚ်ကဵုဆကီု၊ မ္ၚးနူစရိတ်အိုတ်နာနာတံ ဇၞော်သၠုၚ်မံၚ်ဂှ် ဟိုတ်နူရာသဳဥတုကေုာံ ဘဲအန္တရာယ်သဘာဝတံတုဲလေဝ် ပ္ဍဲအကာဲအရာ ဒမြိပ်သြောံတိတ်တံ ယအ်စှ်ေမံၚ်ဂှ် စၟတ်ၚုဟ်သဝ်ဝ်ဗီုလၟုဟ်ဏံဂှ် ဒှ်ဟွံထေက်လးလးရဂှ် ညးဆက်ဟီုရ။
သၟာဗ္ၚမွဲတၠပၠန်ဂှ်လေဝ် အခိၚ်စရိတ်တဵုလွဳတံ ဇၞော်သၠုၚ်မံၚ်ဂှ် လ္တူစၟတ်ထောံ ၚုဟ်စၞောန်သြောံသ္ဇိုၚ် (၇)ကိုဋ်ဘာ်ဂှ် ပတှ်ေဟွံမာန်တုဲ ဒှ်အကာဲအရာ သၟာဗ္ၚတံကျဗြံဗွဲမဇၞော်ကဵုဇြဟတ်ရဂှ် ဟီုကဵုသြၚ်လောန်တိုၚ်မ်ရ။
“ၚုဟ်သြောံ (၇)ကိုဋ်ဘာ်ဟီုဂှ် သွက်ပိုဲဂှ် ပတှ်ေဟွံမာန်ရ။ ကဵုဒးကၠောန်မံၚ်အဏံဂှ် ဒှ်မံၚ်မုဟွံဆေၚ်ရ။ ပိုဲတံစၟဳစလဝ်ဂှ် မွဲဗီု၊ ဒဵုကဵုကဆံၚ်ဏံဂှ် ဒှ်ဟွံမာန်ပုဟ်လေဝ်။ လၟုဟ်ဂှ် ဍေံတံဟီုနၚ်လွာဲဂှ်တှ်ေ ပိုဲလေဝ်မုသ္ပမာန်ရော။ အရာရာအိုဿီု ဒးစေက်အိုတ်ရ။ ဗီုလဵုမှလေဝ် ချိၚ်ဆဟွံဒးရ။ စရိတ်ပ္တံ၊ စရိတ်ဝါဲ၊ သီုဖအိုတ် အရာရာအိုဿီုရလေဝ် ၚုဟ်က္ဍၚ်မံၚ်ဂလိုၚ်ဏံတှ်ေ။ ကဵုၚုဟ်သြောံဏံရတှ်ေ ဗီုလဵုဂွံကၠောန်စဏီရော။ (၇)ကိုဋ်ဘာ်ဂှ် မုလေဝ်ပစဟွံဂွံပုဟ်။ မွဲဨကမ္ဂး ပန်၊မသုန်၊တြဴကိုဋ်ဂှ် အိုတ်မံၚ်လၟေၚ်ဍာံရ။ တၟော်စမ်ရံ ကဵုၚုဟ်သြောံတိတ်ကၠုၚ်တံဂှ်ရ၊ ဒှ်အာသြောံတၞောန်တှ်ေ သာတုဲပရေံရ။ ဍေံစၟတ်ကဵုၚုဟ်ဏံတှ်ေ ကျရ” သာ်ဝွံ သ္ဂးရ။
သ္အာၚ်နူဂှ်းပၠန် ပ္ဍဲအရာစၟတ်ၚုဟ်စၞောန်သြောံတံဂှ် စှ်ေလ္ၚတ် စရိတ်တဵုလွဳက္တဵုဒှ်မံၚ် ပ္ဍဲဗလးတိတံတုဲ ဟွံတၟော်မွဲသာ် တၟော်အတိုၚ်ကံၚ်ဇြဳပၞာန်နွံပၟိက် နကဵုဗီုပြၚ်ၚုဟ်ကပေါတ်ဗၞိက်စှ်ေမံၚ်တံဂှ် ကၠောန်မံၚ် ညံၚ်သၟာဗ္ၚတံ သ္ဂောံကျတုဲကျပၠန်ရဂှ် သၟာဗ္ၚတံ ပါ်ပါဲလဝ်အိုတ်ရ။
ဂအုပ်ဂကောံသြောံသ္ၚုဍုၚ်ဗၟာဂှ် နဒဒှ်ၚုဟ်စၞောန်သြောံသ္ဇိုၚ်ဂှ် သ္ၚုလုပ်ဂကောံသ္ၚုကြံၚ် အေအ်မထ(ဧည့်မထ) ကေုာံ ၚဇြုၚ်(ငစိန်)တံ (၁၀၀)နမ္ဂး နူကဵု (၁၃)ကိုဋ်ဒ္ကေဝ် စဵုကဵု (၁၅)ကိုဋ်ဒ္ကေဝ်၊ သ္ၚု(ပေါ်ဆန်)ဂှ်တှ်ေ နူကဵု(၁၆)ကိုဋ်ဒ္ကေဝ် စဵုကဵု (၂၀)ကိုဋ်ဒ္ကေဝ်ဂှ် စၟတ်လဝ်ၚုဟ်ရဂှ် တုဲကၠုၚ်ပ္ဍဲဂိတုသေပ်တေမ်ဗာ စၟတ်တ္ၚဲ(၁၉)ဂှ် လလောၚ်ပ္တိတ်လဝ်ရ။
ဆေၚ်စပ်ကဵု ပရေၚ်စၟတ်ၚုဟ်စၞောန်သြောံသ္ဇိုၚ် ဂကောံအာက္ဍိုပ်ပရေၚ်သၠုၚ်ပ္တိုန် ပရေၚ်ပိုန်ဒြပ်ကေုာံ ပရေၚ်စဵုဒၞါအခေါၚ်အရာ သၟာဗ္ၚတံဂှ်တုဲ ၜိုန်ရသြၚ်လောန်တိုၚ်မ် ဆက်စၠောံသၟာန်သၟုက်လဝ် ကုဥက္ကဋ္ဌ ဂအုပ်ဂကောံသြောံသ္ၚုဍုၚ်ဗၟာ ဥူယျေဝ်မေန်အံၚ်ကီုလေဝ် ဒုၚ်တဲသှ်ကဵုလဝ်တံ ဟွံမွဲရ။
ပ္ဍဲဍုၚ်ဗၟာဂှ် ပ္ဍဲကာလသီအဝဵုဏံ ကံၚ်ဇြဳပၞာန်တံ သွက်ဂွံထိၚ်ဒဝ်သြောံသ္ၚုတံဂှ် အပ္ဍဲဍုၚ် မွဲဒၞါဲဓဝ်ဂှ် ယဝ်ရဂိုၚ်စွံလဝ် လျိုၚ်တာန်သ္ၚု(၅၀)ကေုာံ သြောံလ္တူ(၅၀၀၀)နမ္ဂး ကၠောန်သ္ပမံၚ်ပွကဵုပ္တိုန်စရၚ်တံတုဲ သွက်ဂွံစၞောန်ပျးဥပဒေ သြောံသ္ၚုဂှ် ပွသဳကၠဳပ္ဍဲဍုၚ်ဇၞော်လ္ၚဵုတံဂှ် ကၠောန်သ္ပမံၚ်ရ။
ပရိုၚ်-သြၚ်လောန်တိုၚ်မ်
ဗီု-CJ
sanlontai