ပေါဲကၠောံသၞာံ NCA ကံၚ်ဇြဳပၞာန် မကၠောန်ဗဒှ်ဂှ် ဂကောံဒေါအ်ပန်ပှော် (၇) ဂကောံ တိုန်စိုပ်ဏောၚ်

နေဗျဳဒဝ်၊ အံက်တဝ်ဗာ (၁၃)

အသေအဟာန်တ္ၚဲ လိက်ကသုက်ဒေါအ်ပန်ပှော်အလုံဍုၚ် (NCA) ပေၚ် (၈) သၞာံ နူကဵုကံၚ်ဇြဳပၞာန် မသ္ကိုပ်သ္ကကၠောန်ဗဒှ်အာဂှ် ဂကောံရပ်လွဟ်ကောန်ဍုၚ်အရၚ် ထ္ပက်လဝ်စၟတ်တဲဒေါအ်ပန်ပှော် (၇) ဂကောံတံ တိုန်စိုပ်အာဏောၚ်ဂှ် ဂွံတီကေတ် နူကဵုဂကောံဒေါအ်ပန်ပှော် PPST ရ။

ဂကောံဒေါအ်ပန်ပှော် (၇) ဂကောံဂှ် ကံၚ်ဇြဳကလေၚ်ဒက်ပ္တန်ရးသေံ၊ ဗော်ဍုၚ်မန်တၟိ၊ ဒပ်ပၞာန်ဒတုဲဖဵုဒဳမဝ်ကရေဇြဳကရေၚ်၊ ကံၚ်ဇြဳပရေၚ်ၜိုဟ်လလမ်ကရေၚ်၊ ဗော်ဗၠးၜးဍုၚ်ရခေၚ်၊ ဌာန်ဂအုပ်ဂကောံဗၠးၜးကောန်ဂကူပအိုဝ် ကေုာံ ဗော်သွးဒဳမဝ်ကရေတ်တေတ်လာဟူတံ မဒှ်ရ။

ဂကောံရပ်လွဟ်ကောန်ဍုၚ်အရၚ် (၇) ဂကောံဂှ်ဝွံ ကြဴနူဒပ်ပၞာန်သီအဝဵုတုဲ နကဵုဂကောံကဵုဒှ်၊ မွဲဂကောံတုဲ မွဲဂကောံကဵုဒှ် ဟွံအောန်နူကဵု (၆) ဝါဂှ် အာစိုပ်သဳကၠဳလဝ် ပရေၚ်ၜိုဟ်လလမ် ကုကံၚ်ဇြဳပၞာန်ရ။

ပ္ဍဲဂိတုအံက်တဝ်ဗာ (၁၅) ကၠုၚ်စိုပ်ဏံ အသေအဟာန်ကၠောံသၞာံ လိက်ကသုက်ဒေါအ်ပန်ပှော် NCA ဂှ် သွက်ဂွံကၠောန်ဗဒှ် နကဵုကြက်ရှ်သာနွံနွံဂှ် ကံၚ်ဇြဳပၞာန် ကော်ဘိက်လဝ် ဂကောံရပ်လွဟ်ကောန်ဍုၚ်အရၚ်ဂမၠိုၚ် ပါလုပ်သီုဍုၚ်သ္အာၚ်တံရ။

နာန်ယေန်န်သဵု ညးမၞုံအခေါၚ်ဟီုဂး ဂကောံက္ဍိုက်ပ်လၟေၚ်ကမၠောန်ပရေၚ်ၜိုဟ်လလမ် (PPST) ဂှ် အသေအဟာန်ဂှ်တုဲမ္ဂး တၚ်ဂွံဇြဟတ် တၚ်ဍိုန်လျ စပ်ကဵု NCA တံဂှ်ကီု၊ အဓာန်ဂတ ဆက်ကၠောန်သ္ပအာသာ်လဵုရောဂှ်ကီု စပ်ကဵုပရေၚ်တံဏံတုဲ ပေါဲသဳကၠဳနွံဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ပိုယ်တံ အသေအဟာန်ဂှ်တုဲမ္ဂး အခိၚ်တ္ၚဲစေၚ်မ္ဂး ပေါဲသဳကၠဳနွံမွဲဏောၚ်။ ပေါဲသဳကၠဳပါလုပ်သီုညးဖအိုတ်တံဂှ် ကၠောန်ဗဒှ်အာ အခိၚ်တ္ၚဲစေၚ်ဏောၚ်။ ညအ်ဂှ်တှ်ေ နူကဵုမၞိဟ်တိုန်စိုပ်အသေအဟာန်ဂမၠိုၚ် မၞိဟ်ပါလုပ်လဝ် ပ္ဍဲကဵုလၟေၚ်ဒဒှ် NCA အဆက်က်တံ ပါဏောၚ်၊ တၠပညာတံ ပါဏောၚ်။ တုဲပၠန် Stakeholder ဂမၠိုၚ်ပါဏောၚ်။ စပ်ကဵု NCA တုဲ အကာဲအရာထ္မံက်ကၠုၚ်လဝ်ရုပ်ရဴဂမၠိုၚ် တၚ်ဍိုန်လျ၊ တၚ်ဂွံဇြဟတ်တံကီု၊ အာဂတနူဏံ ပိုယ်တံ ရေၚ်တၠုၚ်အာသာ်လဵုရော ပေါဲသဳကၠဳ ပံၚ်ကောံတုဲဘိုၚ်ပူဗိုၚ်ဂၠါဲသွဟ်မွဲ နွံဏောၚ်” သာ်ဝွံ ညးသ္ဂးရ။

သ္အာၚ်နူဂှ်ပၠန် ဂကောံဒေါအ်ပန်ပှော် (၇) ဂကောံ မတိုန်စိုပ်ကၠုၚ် အသေအဟာန်ကၠောံသၞာံ NCA ဂှ်ကဵု ကံၚ်ဇြဳပၞာန်တံ သဳကၠဳပရေၚ်ၜိုဟ်လလမ်တၞဟ်ခြာဂှ် ပြဟ်ဟ်ဏံ ဟွံမွဲဏီပုဟ်ဂှ် နာန်ယေန်န်သဵု ဆက်ဟီုရ။

ကံၚ်ဇြဳပၞာန်ဝွံ သွက်အသေအဟာန်ကၠောံသၞာံ NCA မကၠောန်ဗဒှ်အာ ခြာဟွံလအ်ဏံဂှ် သွက်ဂွံထ္ၜးပျး ကုဍုၚ်သ္အာၚ်မာန်ဂှ် ကၠောန်ဒၟံၚ် ပရေၚ်ပလေဝ်ပလေတ်တံဂှ်တုဲ ဂကောံလှ်ေယေန်သၞာၚ်ကောန်ဍုၚ်အရၚ် မလှ်ေတိၚ်အာ ပ္ဍဲအသေအဟာန်တံဂှ်လေဝ် စိုပ်ဒၟံၚ် နေဗျဳဒဝ်အိုတ်ယျ မဒှ်ရ။

ပ္ဍဲကဵုတိဍာ် ဂကောံဗၠးၜးကချေၚ် KIO ကံၚ်ဇြဳပၞာန် မကော်ဘိက်လဝ် သွက်ဂွံတိုန်စိုပ် အသေအဟာန် NCA ဂှ် အပ္ဍဲတ္ၚဲအကြာတုဲကၠုၚ်ဏံ ဟိုတ်နူပရေၚ်ဗ္တိုက်ဂြာတ်ဗုမ် ဒပ်ပၞာန်တံတုဲ ပါလုပ်သီုကဵုကောန်ၚာ်သၟတ်ဂှ် ကောန်အရာပ် ၂၉ တၠ မၞုံပ္ဍဲဗ္ဒိုပ်ပါဲဒဴဘဲပၞာန်မုၚ်လာၚ်ခက်ဂှ် ဒးချိုတ်အာလဝ်ရ။

လိက်ကသုက်ဒေါအ်ပန်ပှော် NCA ဝွံ ပ္ဍဲလက်ထက်သမ္မတဥူတုၚ်ဇြုၚ် သၞာံ ၂၀၁၅ ဂိတုအံက်တဝ်ဗာ ၁၅ ဂှ် ဂကောံရပ်လွဟ်ကောန်ဍုၚ်အရၚ် ၈ ဂကောံဂှ် မွဲလ္ပာ်၊ ကၠတ်ထဝ် ဒပ်ပၞာန် အလဵုအသဳဂှ်မွဲလ္ပာ် ပါလုပ်ထ္ပက်လဝ်စၟတ်တဲအိုတ်ရ။

ကြဴနူဂှ်တုဲ ပ္ဍဲလက်ထက်အလဵုအသဳ NLD ဒဝ်အံၚ်သာန်သုကျဳ သ္ကိုပ်သ္က ပ္ဍဲသၞာံ ၂၀၁၈ ဂိတုဖေဖဝ်ဝါရဳ ၁၃ ဂှ် ဗော်ဍုၚ်မန်တၟိကဵု ဗော်သွးဒဳမဝ်ကရေတ်တေတ်လာဟူတံ ပါလုပ်ထ္ပက်လဝ်စၟတ်တဲ ပ္ဍဲလိက်ကသုက် NCA ရ။

ဟိုတ်နူပရေၚ်ပၞာန်သီအဝဵု သၞာံ ၂၀၂၁ တုဲ ဂကောံထ္ပက်လဝ်စၟတ်တဲ ပ္ဍဲလိက်ကသုက်ဒေါအ်ပန်ပှော်ဂမၠိုၚ် ဗော်သွးကောန်ဂကူကရေၚ် KNU ၊ ဒပ်ပၠတရဴကောန်ဂကူချေၚ် CNF ကေုာံ ဒပ်ပၞာန်ကွးဘာ ABSDF တံဂှ် ဟွံကၠောန်သ္ပဆဵုဂဗလဝ်ကဵု ကံၚ်ဇြဳပၞာန်မွဲသာ် ကရဴစး ကု NCA တုဲ ပါလုပ်ဒၟံၚ် ပ္ဍဲပၠန်ဂတးက္ညၚ်ရ။

နကဵုကံၚ်ဇြဳပၞာန် အပ္ဍဲသီအဝဵုပွိုၚ်ၜါသၞာံဘာ်ပြၚ်ဏံဂှ် ဒးပံက်လဝ်မုက်ပၞာန် အလုံဍုၚ်မွဲတုဲ ဒးဆေၚ်ဒၟံၚ်မုက် ပေါဲဗ္တိုက်ဗလးတိ ကုဂကောံရပ်လွဟ်ကောန်ဍုၚ်အရၚ်လ္ၚဵု ပါလုပ်သီုကဵုဂကောံဒပ်စဵုဒၞါညးဍုၚ်ကွာန် PDF မမံက်ကၠုၚ်တံဂှ်ရ။

ပရိုၚ်−သြၚ်လောန်တိုၚ်(မ်)

ဗီု−MOI