အေဿရေ ဟီု ဖအိုတ်ကၠေံ ဂကောံဟာမာသ် နူကဵုလ္တူတိဏံဏောၚ်

ဂျေရူသလေန်၊ အံက်တဝ်ဗာ (၁၂)

ဂကောံဟာမာသ် မဒှ်ဂကောံရပ်လွဟ်ပါလက်သတိုၚ် မၞုံပၟိက်ကုပၞာန်ဂှ် ပသောၚ်ဖအိုတ်ကၠေံ နူကဵုလ္တူတိဏံဏောၚ်ဂှ် ဝန်ဇၞော်ကာစဵုဒၞါအေဿရေ ယိုဝ်အာဖ်ဂါဠာတ် ဟီုဂးလဝ်ရ။

သၟာဗ္တိုက်ဟာမာသ် အေဿလာမ္မေတ်တံဂှ်ဝွံ တုဲကၠုၚ်ပ္ဍဲတ္ၚဲသ္ၚိသဝ်တေံ ကၠောန်သ္ပဍိုက်ဗ္တိုက်လဝ် နူကဵုဒေသဂါဇြာ လ္ပာ်အေဿရေဏံ ဗွဲမအံသဝ်ရ။

ဟိုတ်နူပရေၚ်ဗ္တိုက်ဏံတုဲ အပံၚ်မၞိဟ် ၁၂၀၀ ပြၚ် ချိုတ်အာလဝ်တုဲ ပ္ဍဲကဵုဝၚ်အေဿရေမ္ဂး လုပ်အာစရၚ် နဒဒှ်ပရေၚ်ဗ္တိုက် ပါလက်သတိုၚ်မၞုံပၟိက်ကုပၞာန်တံ ပရေံအိုတ်မွဲရ။

သ္ကိုပ်ဝန်ဇၞော်အေဿရေ ဗေန်ဂျမေန်နေတာန်ယာဟုဂှ် သွက်ဂွံဗ္တိုက် ဂကောံဟာမာသ်ဂှ် ပ္ဍဲဂိတုအံက်တဝ်ဗာ (၁၁) တေံ ဒက်ပ္တန်လဝ် ဂကောံအလဵုအသဳကာမံက်တိုန်မွဲရ။

ပ္ဍဲကဵုဂကောံအလဵုအသဳဏံဂှ် သ္ကိုပ်က္ဍိုက်ပ်ကာစဵုဒၞါတြေံ က္ဍိုပ်သ္ကိုပ်ဗော်ဒစဵုဒစး ဗာန်နဳဂါသ် ကေုာံ ဝန်ဇၞော်ကာစဵုဒၞါတံ ပါလုပ်လဝ်ရ။

ဝန်ဇၞော်ကာစဵုဒၞါ ဂါဠာတ်ဂှ် “အရာမကော်ဒၟံၚ် ဟာမာသ်၊ ISIS−ဂါသ်တံဂှ် ဒးပသောၚ်ကၠေံ နူကဵုလ္တူဂၠးတိဏံဏောၚ်၊ ဠဂှ်မှ ဂွံကၠေံဗ္ဒန်အာဏောၚ်” သာ်ဝွံ ဟီုဂးလဝ်ရ။

အခိၚ်လၟုဟ် အေဿရေဝွံ ကလေၚ်ခၠေဝ်ပလန်လဝ် ကုဒေသဂါဇြာ နကဵုပရေၚ်ဗ္တိုက်ဂြာတ်ဗုမ် ဇၞော်ကဵုဇြဟတ်တုဲ သွက်ဂွံဗ္တိုက်သရိုဟ် ဂကောံဟာမာသ်ဂှ် ပ္ဍဲဗလးတိဏံ ဖျေံလဝ်ဒပ် ဂၠိုၚ်ကဵုလ္ၚီရ။

နေတာန်ယာဟုဂှ် “ပိုယ်တံ ဗ္တိုက်ဒၟံၚ်ကဵု သၞ မကြမ်ကြဓဇန်နူကဵု ISIS တံဂှ်ဏောၚ်” သာ်ဝွံ ၜတ်ကၞာတ်ကဵု ဂကောံဍုၚ်အေဿလာမ္မေသ် မဂစိုတ်ဂယိုၚ်ဒၟံၚ်ဓဇန်န်တံဂှ်တုဲ ဟီုဂးလဝ်ရ။

အတိုၚ်တၚ်နၚ် ကုလသမဂ္ဂတံဂှ်မ္ဂး ပ္ဍဲကဵုပရေၚ်ဗ္တိုက် အေဿရေ ကေုာံ ဂကောံဟာမာသ်တံဂှ် လ္ပာ်အေဿရေ ဂှ် အပံၚ်လၟိဟ်မၞိဟ် ၁၂၀၀ ၊ လ္ပာ်ပါလက်သတိုၚ်ဂှ် ၁၀၀၀ ပြၚ် ချိုတ်အာလဝ်တုဲ အပံၚ်မၞိဟ်ဗ္ဒါဲ ၈၀၀၀ ကလိဂွံလဝ်ဝပ်ဂှ် ဂွံတီကေတ်ရ။

Ref: asiaone/ Reuters