ဗဂေါ၊ အံက်တဝ်ဗာ(၁၄)
ဟိုတ်နူပရေၚ်ဍာ်ဇၞော်ဍာ်ကလိုပ် က္တဵုဒှ်လဝ် ပ္ဍဲပွိုၚ်ဍုၚ်ဗဂေါ၊ ရးဒေသဇၞော်ဗဂေါဂှ်တုဲ တိဨကတဵုသြောံကသီု ဂၠိုၚ်ကဵုဠက် ပရေၚ်ဇီုကပိုက်လီုလာ်တံ နွံလဝ်ရဂှ် ဂွံတီကေတ် ဇရေၚ်ညးတာလျိုၚ် ဂအုပ်ဂကောံသြောံသ္ၚုဍုၚ်ဗၟာ ရးဒေသဇၞော်ဗဂေါ ဂှ်ရ။
သ္ပပ္တံနူဂိတုအံက်တဝ်ဗာ တုဲကၠုၚ်တေံတုဲ ဟိုတ်နူဗြဲရိုပ်ဂူတုဲ အပ္ဍဲပွိုၚ်ဍုၚ်ဗဂေါဂှ် ဒးဂဗလဝ် ကုပရေၚ်ဍာ်ဇၞော်ဂၠိုၚ်အိုတ်တံတုဲ တိဨကတဵုသြောံကသီု ဂၠိုၚ်ကဵုဠက် ဗၠိုက်အာလဝ်ရ။
အတိုၚ်စရၚ်ကံက်ကေတ်လဝ်ပြဟ်ဟ်ဏံဂှ်မ္ဂး အပ္ဍဲပွိုၚ်ဍုၚ်ဗဂေါဂှ် ဨကတဵုသြောံကသီု ဗ္ဒါဲ ၂၀၀၀၀ လီုလာ်လဝ်တုဲ ဒေသဟွံဂွံကံက်စရၚ်ဏီတံလေဝ် နွံမံၚ်ဏီရဂှ် ညးတာလျိုၚ် ဂကောံသြောံသ္ၚုရးဗဂေါမွဲတၠဂှ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
သွက်သၟာဗ္ၚပါလုပ် ပ္ဍဲဨကတဵုသြောံကသီု လီုလာ်အာ ဒၟါနူဍာ်ဇၞော်ဍာ်ဗၠိုက်တံဂှ် အလဵုသဳရးဗဂေါကေုာံ ဂအုပ်ဂကောံသြောံသ္ၚုတံ ပံၚ်တောဲတုဲ သွက်ဂွံထံက်ပၚ်ကဵု သြောံမ၊ သြန်လှုဲ၊ ဝါဲ ကေုာံ ကပေါတ်ဆက်စပ်တၞဟ်ဟ်တံမာန်ဂှ် စဳဇန်မံၚ်ရဂှ် သ္ဂးရ။
သြောံကသီု ဗၠိုက်အာဍာ်တံဂှ် ပ္ဍဲဂိတုကၠုၚ်စိုပ်ဏံမ္ဂး ရတ်သီရဏောၚ်မဒှ်တုဲ ဟိုတ်နူဗၠိုက်ဍာ်လီုလာ်အာ ဗီုလၟုဟ်ဂှ်ရ ဒးကျဗြံအိုတ်ဏောၚ်ဂှ် သၟာဗ္ၚမွဲတၠဂှ် ဟီုရ။
အတိုၚ်လဟီု အစဳဇန်ပရေၚ်ဖောအ်ဗြေဝ် ကုလသမဂ္ဂ UNDPဂှ်မ္ဂး ဟိုတ်နူ ပရေၚ်ဍာ်ဇၞော်ဗဂေါတုဲ ဨကတဵုသြောံကသီု ဗ္ဒါဲ(၅၀၀၀၀) သ္ဇက်ဂွံဇီုကပိုက်လီုလာ်နွံမံၚ်ရဂှ် လလောၚ်ပ္တိတ်လဝ်ရ။
ရးဒေသဇၞော်ဗဂေါဂှ် လၟေၚ်သၞာံ တိဨကတဵုသြောံကသီု (၂)ပြကောဋိကိုတ်ပြၚ်နွံမံၚ်တုဲ ဒှ်ရးဒေသဇၞော် လျိုၚ်တာန်သြောံတိတ်မံၚ် ဂၠိုၚ်ကဵုကိုဋ်မွဲလေဝ် မဒှ်ရ။
ပရိုၚ်-သြၚ်လောန်တိုၚ်မ်
ဗီု-MFSD
sanlontai