ရုၚ်စက် မျာန်မာဗဳယာ ဒပ်ပၞာန်ပိုၚ်ဒးဒုၚ်ပန်ကဵုကမ်လှောဝ်

လဂုၚ် – အံက်တဝ်ဗာ(၁၄)

ရးဒေသလဂုၚ်၊ ရုၚ်စက်ဗဳယာဒပ်ပၞာန်ပိုၚ် မၞုံဂၠံၚ် စၟတ် (၃) ပွိုၚ်ဍုၚ်မၚ်ဂြာဲဍုၚ်ဂှ် ဒးဒုၚ်ပန်ဗတိုက်လဝ်ကဵု ကမ်လှောဝ်တက်ယှတ်ၜါမရဂှ် Urban Special Operation(U.S.O) လလောၚ်တြးလဝ် ပရိုၚ်ရ။

ပ္ဍဲဂိတုအံက်တဝ်ဗာ စၟတ်တ္ၚဲ (၁၂) အခိၚ်ဗ္တံဂှ် Urban Special Operation(U.S.O) ပန်ဗတိုက်လဝ်ကဵု (၁၀၇)မမ ၜါမဗတိုက်လဝ်ရဂှ် ဟီုလဝ်ရ။

ရုၚ်စက်ဗဳယာ Urban Special Operation(U.S.O) ဗတိုက်လဝ်ဂှ် ဖျေံလဝ်သ္ဇိုၚ် ပ္ဍဲပွိုၚ်ဍုၚ်မၚ်ဂြာဲဍုၚ် ဒၞာဲတံဒပ် ဒပ်ကံၚ်ဇြဳပၞာန်တအ် ဗွဲမဂၠိုၚ်နွံဒၟံၚ်ရဂှ် ဂွံတီကေတ်ရ။

ဟိုတ်နူကမ်လှောဝ်တက်ယှတ်ၜါမဒတုံစှ်ေလဝ် ပ္ဍဲဂအာၚ်ရုၚ်စက်ဂှ်ရ ပရေၚ်ဇီုကပိုက်ဒးလဝ် နွံမာန်တုဲ ယာဉ်ပ္ဍိုက်မၞိဟ်ယဲ (၂)ဖ္ဍိုက်လေဝ် လုပ်အာလဝ်ပ္ဍဲရုၚ်စက်နွံဒၟံၚ်ရဂှ် ဓမံက်ထ္ၜးလဝ်ရ။

ပရေၚ်ချဳဒရာၚ်ပၞာန်ဏံဂှ် နကဵုပရေၚ်သတ်ပညောန်(ဖရဲသီး) လ္ပာ်ညးဍုၚ်ကွာန်တအ် ကဵုပရိုၚ်ရီုဗၚ်ကဵုလဝ်တုဲ ဗတိုက်လဝ် ဗွဲမအံၚ်ဇၞးမာန်ရဂှ် ဂွံတီကေတ်ရ။

မျာန်မာဗဳယာဂှ် ဒှ်အထံက်တိုၚ်ပရေၚ်ပိုန်ဒြပ် ဒပ်ပၞာန်အဓိကမွဲတုဲ ဟိုတ်နူဘပဠ သွံတြးဒၟံၚ်ကဵုညးဍုၚ်ကွာန်တအ် ဟွံဗဗွဲဓဝ်တုဲ ဗတိုက်ပန်လဝ်ရဂှ် ဂွံတီကေတ်ရ။

ပါဲနူပရေၚ်ပိုၚ်ပြဳပရေၚ်ပိုန်ဒြပ်ကံၚ်ဇြဳပၞာန် ပ္တိတ်ဒၟံၚ်ကသပ် သွက်ဂွံကၠောန်ပွဟွံဗဗွဲဓဝ် လ္တူညးဍုၚ်ကွာန်တအ်ဂှ်တုဲ ဆက်ဓမံက်အာရုပ်ရဴ ပရေၚ်ချဳဒရာၚ်ပၞာန် ကုညးဆက်စပ်တအ် နဒဒှ်ဌာန်ပ္တဝ်ပရေၚ်ပၞာန်ရောၚ်ဂှ် Urban Special Operation(U.S.O) ကဵုလဝ်သမ္တီရ။

ပရိုၚ် – သြၚ်လောန်တိုၚ်(မ်)

ဗီု – CJ