မတ်မလီု၊ အံက်တဝ်ဗာ(၁၅)
တွဵုရးဍုၚ်မန်၊ ပွိုၚ်ဍုၚ်မတ်မလီု၊ အချုက်ထံၚ်တၟိ မတ်မလီု ကံၚ်ဇြဳပၞာန်သိုၚ်ခၞံဒၟံၚ် ဗ္ဒာဲကွာန်မေန်ယွာဂှ် ဟိုတ်နူဒးဒုၚ်ဗတိုက် ထောံဖျေံဗုမ်ကဵုဒရုမ်တုဲ ပရေၚ်ဇီုကပိုက် ဒးလီုလာ်က္တဵုဒှ်လဝ်ရဂှ် ဂွံတီကေတ် နူကဵုညးလုက်စုက်ကဵု ကံၚ်ဇြဳပၞာန်တအ်ရ။
ပ္ဍဲကဵုဒၞာဲသိုၚ်ခၞံဒၟံၚ်အချုက်ထံၚ်တၟိ မတ်မလီုဂှ် တ္ၚဲဏံဂိတုအံက်တဝ်ဗာ စၟတ်တ္ၚဲ (၁၄) အခိၚ်ဒေါဝ်တ္ၚဲ ၜိုတ် (၁၁) နာဍဳဂှ် ဂကောံပၠန်ဂတးရပ်လွဟ်တအ် ထောံဖျေံဗုမ်ကဵုဒရုမ် (၃) မတုဲ ဗတိုက်လဝ်ရ။
ဟိုတ်နူဒးဒုၚ်ဗတိုက်လဝ်ကဵုဒရုမ်တုဲ ကၟဳကၚ် အချုက်ထံၚ်ဗဟဵု၊ သၠဖ္ဍာန်၊ တြၚ်ဒ္ၚောဝ် သီုကဵုစမြိုၚ်လ္ၚဵုဂှ် ၜိုန်ရဇီုကပိုက် ဒးလီုလာ်လဝ် နွံကီုလေဝ် ညးယိုက်ဝန်ထံၚ်တအ်ကဵု သၟာကမၠောန်တအ်ဂှ် ဇီုကပိုက်ဒးလဝ် ဟၟဲရဂှ် ဂွံတီကေတ်ရ။
ကြဴနူအချုက်ထံၚ်တၟိ ဒးဒုၚ်ဗတိုက်ထောံဖျေံဗုမ် ကဵုဒရုမ်တုဲဂှ် ဒပ်ကံၚ်ဇြဳပၞာန် ကၟာတ်ဒၞာစၟဳစၟတ်လဝ် ဗ္ဒာဲပွဳပွိုၚ် အချုက်ထံၚ်တၟိကဵု မွဲဒမြိပ်ဂၠံၚ်ကွဳစက် မတ်မလီု-ကျာ်မြဟ်ရဂှ် ညးဒေသတအ်ဟီုလဝ်ရ။
အချုက်ထံၚ်တၟိ မတ်မလီုသိုၚ်ခၞံဒၟံၚ်ဂှ် ပ္ဍဲကဵုဂိတုဂျောန် စၟတ်တ္ၚဲ (၂၃) တုဲကၠုၚ်တေံ မွဲကရောံကဵု သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန်ခါန်ကၞက် ဥူအောၚ်ကျဳတုၚ်ဂှ် ညးတာလျိုၚ်ဌာနဝန်ဇၞော် ပရေၚ်အပ္ဍဲဍုၚ်၊ ဌာနက္ဍိုက်က္ဍိုပ်ထံၚ်စာတ်တအ် ကေၚ်ကၠုၚ်စိုပ် စၟဳစၟတ်လဝ်ရ။
ပ္ဍဲအချုက်ထံၚ်တၟိမတ်မလီုဂှ် စမြိုၚ်ကၚ်ဗဟဵု (၃) ထပ်၊ ဗဒမ်ကောန်ထံၚ်တိက် (၂) ထပ်၊ ဗဒမ်စပုၚ်၊ စဵုဒက်ကၟိုၚ်၊ သ္ၚိဒၟံၚ်ညးယိုက်ဝန်တအ်ပါလုပ်တုဲ ပရေၚ်သိုၚ်ခၞံ (၉၅) တၟံကၠံပြၚ်အာစိုပ်ဒတုဲတုဲရဂှ် ဂွံတီကေတ် နူညးလုက်စုက်ကဵု ကံၚ်ဇြဳပၞာန်တအ်ရ။
ပ္ဍဲတွဵုရးဍုၚ်မန်ဂှ် ပါလုပ်သီုထံၚ်စာတ်ဗဟဵု၊ အချုက်ထံၚ်တအ်ဂှ် ဗဒိုပ်ထံၚ်စာတ် (၁၁) ဗဒိုပ်နွံတုဲ ပ္ဍဲကဵုဂှ် ကောန်ထံၚ်တြုံဗြဴ ဒးဒုၚ်ဖျေံလဝ်ဒုဟ်ဒဏ် နကဵုဂဗုတ်ပရေၚ်ပရေၚ်ဍုၚ်ကွာန်တအ်ဂှ်မ္ဂး ဖျေံစွံလဝ် ပ္ဍဲထံၚ်သဓီု ထံၚ်ဗဟဵုကျာ်မြဟ်တအ်ရ။
ပရိုၚ် – သြၚ်လောန်တိုၚ်(မ်)
ဗီု -MRTV
sanlontai