ပ္ဍဲဌာဆေၚ်စပ်ကံၚ်ဇြဳပၞာန်တံဂှ် ပရေၚ်ဒးထ္ပက်လာဘ် ဇၞော်မောဝ်ကၠုၚ်

နေဗျဳဒဝ်၊ အံက်တဝ်ဗာ(၁၇)

ပ္ဍဲရုၚ်ဌာနဆေၚ်စပ် ကဆံၚ်ပွိုၚ်ဍုၚ် သၟဝ်တဲကံၚ်ဇြဳပၞာန်တံဂှ် ပရေၚ်ဒးထ္ပက်မံၚ်လာဘ်တံဂှ် ဂွံဆဵုကေတ်မံၚ်ဂၠိုၚ်အိုတ်တုဲ ပရေၚ်သ္ဒးကဵုပရၚ်တဲတံဂှ် ဒှ်ဒုတိယဂၠိုၚ်အိုတ်ရဂှ် ဂွံတီကေတ် အတိုၚ်လိက်ဒုၚ်စဳရေၚ် ISP-Myanmar လလောၚ်ပ္တိတ်လဝ် ပ္ဍဲဂိတုအံက်တဝ်ဗာ စၟတ်တ္ၚဲ (၁၅)ဂှ်ရ။

ပ္ဍဲပွိုၚ်ဍုၚ် (၁၁၀)ပွိုၚ်ဍုၚ် ISP-Myanmar မဒှ်ဂကောံသုတေသန ကံက်ကေတ်လဝ်စရၚ်ဂှ် အောန်အိုတ် နူပွိုၚ်ဍုၚ်(၇၀) ပွိုၚ်ဍုၚ် ဂၠိုၚ်အိုတ်စဵုကဵု (၁၀၇)ပွိုၚ်ဍုၚ်ဂှ် ပ္ဍဲကဆံၚ်ရုၚ်ကဆံၚ်ပွိုၚ်ဍုၚ်တံဂှ် ပရေၚ်ထ္ပက်လာဘ်တံ က္တဵုဒှ်မံၚ် နဒဒှ်တၚ်တၟေၚ်ဂှ် ဒးထ္ပက်မံၚ်လာဘ်ဗ္ဇဴကဵု ကပေါတ်ထဝ်တံမဒှ်တုဲ ပ္ဍဲရုၚ်သၞောဝ်ဓဝ်ကဆံၚ်ပွိုၚ်ဍုၚ် ဒးကဵုကပေါတ်ထဝ်တံဂှ် ပ္ဍဲဂိတုမေဂှ် (၉)၊ ပ္ဍဲဂိတုဂျောန်ဂှ် (၈) ကေုာံ ပ္ဍဲဂိတုဂျူလာၚ်ဂှ် နွံလဝ် (၉)ဝါတုဲ ဂၠိုၚ်အိုတ်ရဂှ် သ္ဂးရ။

ဒုတိယဂှ်တှ်ေ ရုၚ်ပရေၚ်အုပ်ဓုပ်တံမဒှ်တုဲ ပ္ဍဲဂိတုမေဂှ် ပွိုၚ်ဍုၚ် (၆)ပွိုၚ်ဍုၚ်၊ ပ္ဍဲဂိတုဂျောန်ဂှ် (၂) ကေုာံ ပ္ဍဲဂိတုဂျူလာၚ်ဂှ် (၄)ပွိုၚ်ဍုၚ် နွံလဝ်တုဲ တတိယဂှ် ဒှ်ရုၚ်အကံက်ခေါန်ရဂှ် လိက်ဒုၚ်စဳရေၚ် ISP-Myanmar ဂှ် ထ္မံက်ထ္ၜးလဝ်ရ။

အရာတံဏံဂှ် အတိုၚ်စရၚ် ISP-Myanmar ဂှ်မ္ဂး ပွဗက်စအဂတိအဇာဍောတ် သၞာဲဒဴတံရဂှ် စၟတ်ကေတ်မာန်ကီုလေဝ် ဟိုတ်နူကပေါတ်ထဝ်တံ ပါလုပ်မံၚ်ဂှ်ရ ဍောတ်မံၚ်ရဂှ် ဟီုဟွံဂွံတုဲ ပ္ဍဲကဆံၚ်လ္တူဂှ် ပရေၚ်ဗက်စအဂတိဇၞော်ဇၞော် လ္ဂောံကဵုမူဝါဒ နွံမံၚ်ရဂှ် စၟတ်ကေတ်မာန်ရဂှ် သ္ဂးရ။

နဒဒှ်ဥပမာဂှ် တုဲကၠုၚ်ခြာဟွံလအ်ဏံ ညံၚ်ရဴကိစ္စ ဒုသ္ကိုပ်ဗိုလ်ဇၞော်မိုဝ်မျေတ်ထောန်ကေုာံ သ္ကိုပ်ဗိုလ်ယာန်နံၚ်သဵုတံ ဒးဒုၚ်ဖျေံလဝ်ဒဏ်ထံၚ် မွဲအာယုက် ညဳသၟဟ်ကဵု (၂၀)သၞာံတံ မဒှ်ရ။

အတိုၚ်တၚ်သဳကၠဳ တၠပညာတံဂှ်မ္ဂး ထိၚ်ဒဝ်လဝ်အဝဵုပေၚ်ၚ်တုဲ အခေါၚ်သုၚ်စောဲအဝဵု အတိုၚ်ကြိုက်စိုတ်တၠအဝဵု နွံမံၚ်မ္ဂး၊ ပရေၚ်ကေတ်လျိုၚ်ဒုၚ်လျိုၚ်တံ ဟၟဲမ္ဂး ပရေၚ်ဗက်စအဂတိတံ သာတုဲဒှ်မာန်ရဂှ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ် ISP-Myanmar ရ။

ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ်တှ်ေ ပရေၚ်ကဵုလာဘ်ဗ္ဇဴဟွံမွဲမ္ဂး ဒၞါဲလဵုမှ ကၠောန်ကမၠောန်ဟွံဂွံရပုဟ်ဂှ် လၟေၚ်ဒဒှ်စၞောန်ထ္ၜးမံၚ် နူဘဝညးဍုၚ်ကွာန်တံ နွံမံၚ်ဗွဲမဂၠိုၚ်ယျတုဲ ယန္တယာသီုဖအိုတ်တံဂှ် ဂေတ်မံၚ် နကဵုပွကဵုကေတ် လာဘ်ဗ္ဇဴတံရဂှ် သ္ၚဳဂၠိပ်လဝ်ရ။

“ပွကဵုကေတ်လာဘ်ဗ္ဇဴတံဂှ်တှ်ေ ပ္ဍဲရုၚ်ဌာနသၟဝ်တဲကံၚ်ဇြဳပၞာန်တှ်ေတုဲဂှ် ဒှ်မံၚ်ရ။ စပ်ကဵုကိစ္စဏံတုဲ ဂကောံဗၠာဲသၟိၚ် ဒးကေတ်တာလျိုၚ်အဓိကဂှ်လေဝ် ပရေၚ်ကဵုကေတ်လာဘ်ဗ္ဇဴတံ ဟၟဲမ္ဂး မုကမၠောန်မှ ကၠောန်ဟွံဂွံရ။ မဝ်တဝ်ပဳကေဝ် လၟုဟ်တံဂှ်လေဝ် ဟွံကဵု (၅၀၀၀၀)မ္ဂး ဒးဂဗမံၚ် ကုအကာဲအရာ ဒးဒုၚ်ပံက်အမှုရ။ ပ္ဍဲရုၚ်ဂဥုဲဏောၚ်ဟီုမ္ဂးလေဝ် သွက်သ္ဂောံဂွံအခေါၚ်လုပ် ပ္ဍဲရုၚ်ဂဥုဲဂှ် ဒးကဵုလာဘ်ကဵု ညးမၚ်ပါၚ်တြၚ်တံမှ ဂွံ။ သရောပ်တုဲ ဒးဟီုမ္ဂး မပ္တံပရေၚ်အုပ်ဓုပ်၊ ပရေၚ်စဳရေၚ်ဂဗုတ်၊ ဌာနဗၠာဲသၟိၚ် စက်ယန္တယာကံၚ်ဇြဳပၞာန်တံ သီုဖအိုတ်ဂှ် ဂေတ်မံၚ်နကဵု ပွကဵုကေတ်လာဘ်ဗ္ဇဴတံရ။ ပရေၚ်ကဵုကေတ်လာဘ်ဗ္ဇဴတံဟၟဲမ္ဂး ဒၞါဲလဵုမှကၠောန်ကမၠောန်ဟွံမာန်ပုဟ်ဂှ် လၟေၚ်ဒဒှ်စၞောန်ပျးမံၚ် နူကဵုဘဝညးဍုၚ်ကွာန်တံ နွံမံၚ်တၟာဂလိုၚ်ရ” သာ်ဝွံ သ္ဂးရ။

ကြဴနူသီအဝဵုတုဲ ကဏ္ဍကၠတ်ထဝ် ထိၚ်ပ္ညဳကဵု ကမၠောန်အလဵုသဳတံ ဟွံမွဲရတုဲ၊ ညးချဳဒရာၚ်ကတိုၚ်ကၟိုဟ်မၚ်ရံၚ်မံၚ်တံ၊ အခန်ကဏ္ဍပရိုၚ်မဳဒဳယာတံဂှ်လေဝ် ဒးဒုၚ်ပိုၚ်ခြာဒၟံၚ် ဗွဲမဇၞော်ကဵုဇြဟတ်ရဂှ် လိက်ဒုၚ်စဳရေၚ်ဂှ် ထ္မံက်ထ္ၜးလဝ်ရ။

မွဲလ္ပာ်ပၠန်ဂှ်လေဝ် သွက်ဂွံဗက် ဒမြိပ်သြန်ဖောဝ်သၠုၚ်တိုန်မံၚ်နကဵုအသိၚ်တံ၊ ခရိတ်အိုတ်နာနာသၠုၚ်တိုန်ကၠုၚ်တံ စိုပ်ဂှ် သြန်ဂိတုညးယိုက်ဝန်အလဵုသဳတံလေဝ် ဟွံပဵုကၠုၚ်ရ။

နှေုန်သၠာဲသြန်၊ ဒမြိပ်သြန်ဖောဝ်တံဂှ် ပ္ဍဲအကာဲအရာ ပရေၚ်ရပ်စပ်သုၚ်စောဲမာန် ညးယိုက်ဝန်တံ စှ်ေကၠုၚ်မံၚ်တံဂှ် မၚ်ရံၚ် အကာဲအရာ ဗက်စအဂတိ သာတုဲပရေံကၠုၚ်တံ ထေက်မံၚ်ရဂှ် ISP-Myanmar ကဵုလဝ်သတိရ။

ပရိုၚ်-သြၚ်လောန်တိုၚ်မ်

ဗီု-MOI