ကျာ်ထဝ်၊ အံက်တိုဗာ(၁၇)
ဥူအံၚ်မျဵုလွေန်(ကော်) သဝ်နာန်ဥူ တၠဆေၚ် ယှိုဲ KTV မၞုံကွာန်အၚ်္ဂဗိုလ်၊ ပွိုၚ်ဍုၚ်ကျာ်ထဝ်၊ တွဵုရးဍုၚ်မန်ဂှ် ပ္ဍဲဂိတုအံက်တဝ်ဗာ စၟတ်တ္ၚဲ (၁၅) အခိၚ်သဝ်တ္ၚဲ ၜိုတ်(၄)နာဍဳဂှ် ဒးဒုၚ်ပန်ကဵုသေနာတ်တုဲ ချိုတ်အာလဝ်ရဂှ် ဂွံတီကေတ် နူညးဒေသတံရ။
ဥူအံၚ်မျဵုလွေန် အာယုက် (၆၂)သၞာံဂှ် နူကဵုဆေၚ် KTV သွက်ဂွံစဴလ္ပာ်ကျာ်ထဝ် မွဲကရောံကဵုဂကောံသ္ၚိကၟိန်တံဂှ် အဃောတိုန်မံၚ်ကာ သၟာသေနာတ်ဟွံတီယၟု (၄)တၠတံ ကၠုၚ်ဗ္ဒါဲဆေၚ် နကဵုကွဳလိုန်ဓါတ်တုဲ ပန်ပှော်ဏာလဝ်ကဵုသေနာတ်ရ။
ဟိုတ်နူဒးဒုၚ်ပန်ပှော်လဝ်ကဵု သေနာတ်တုဲ ဥူအံၚ်မျဵုလွေန်ဂှ် ဂွံလဝ်ဘဲဝပ်သေနာတ် ပ္ဍဲဂၞိၚ် ကေုာံစး (၅)လစုတ်တုဲ အခိၚ်ပလံၚ်ဏာမံၚ် ရုၚ်ဂဥုဲကျာ်ထဝ်ဂှ် ဒးချိုတ်အာလဝ်ရ။
ပ္ဍဲပရေၚ်ပန်ပှော်ဏံ ညးမဒှ်သမ္ဘာ ဒဝ်ကျဳပျာ အာယုက် (၃၂)သၞာံကေုာံ ကောန်ဇာတ် သီု (၃)တၠ ဗၠးအာလဝ်ရဂှ် ဂွံတီကေတ် အတိုၚ်လဟီု ညးဒေသတံရ။
ဥူအံၚ်မျဵုလွေန် ဒးဒုၚ်ပန်ပှော်လဝ်ကဵုသေနာတ်ဂှ် ပ္ဍဲသၞာံ (၂၀၁၁) တုဲကၠုၚ်တေံ နူကဵုကံၚ်ဇြဳပရေၚ်ၜိုဟ်လလမ်ကရေၚ် KNU/ KNLA PC ဂှ် ဒှ်ညးလုပ်ဗ္ဒဗ္ဒါဲလဝ် ဇရေၚ် ကံၚ်ဇြဳပၞာန် စၟတ်(၉၆) တမ်ဒပ်ပၞာန်တွာ် သီုကဵုလွဟ်လက်နက်တံ မဒှ်ရ။
ဥူအံၚ်မျဵုလွေန်ဂှ် ပံၚ်တောဲကုကံၚ်ဇြဳပၞာန်တုဲ ကၠောန်ဒၟံၚ်ပရေၚ်ပိုန်ဒြပ်ကီု၊ ရေၚ်တၠုၚ်မံၚ် ပွကဵုပရိုၚ်တံကီုရဂှ် ၜိုန်လ္ပာ်ညးဒေသတံ ဟီုဂးမံၚ်ကီုလေဝ် နကဵုသြၚ်လောန်တိုၚ်မ်ဂှ် သ္ပဒတန်တၞဟ်ခြာဟွံမာန်ဏီရ။
ပရေၚ်ပန်ပှော်ဏံဂှ် ဒဒှ်ရဂကောံညးတံ ကၠောန်သ္ပလဝ်ဟွံသေၚ်ဂှ် လ္ပာ်ဂကောံဇြဟတ်ပၠန်ဂတးကျာ်ထဝ် (KRF) တးပါဲလဝ်ရ။
တုဲကၠုၚ်ပ္ဍဲဂိတုသေပ်တေမ်ဗာ စၟတ်တ္ၚဲ (၁၈)ဂှ်လေဝ် ပ္ဍဲအရာပ်ဒံၚ်ဒူသု၊ ဍုၚ်ကျာ်ထဝ်ဂှ် ဂကောံသ္ၚိကၟိန် ဒုသ္ကိုပ်ဗိုလ်ဇၞော် ဒေါံဇူ ဥူအံၚ်လွေန်တံ ဒးဒုၚ်ပန်ပှော်လဝ်ဂှ်ရ ညးမဒှ်သမ္ဘာချိုတ်တုဲ ညးမဒှ်ကောန်ဗၠာဲ ကေုာံ ဥူအံၚ်လွေန်တံ က္လိဂွံလဝ်ဘဲဝပ် မကမ်စၟအ်အ်ဏီရ။
ပရိုၚ်-သြၚ်လောန်တိုၚ်မ်
ဗီု-CJ
sanlontai